1 Yesu abala bo: «Sooti, mɛnɛ naotɔndeakadeani bo: iyona odai pɛpɛ bokwea ta ikutu di bhata ta modipe*, endelo aiwei dɔɔngɔ dikina, iyo adii moibi, ko mopundji. 2 Endelo iyona okwei ta modipe adii mobanei o bhata. 3 Sindjili abwani bodipoa modipe ko bhata bakaoke moholi monde. Akabee bhata bande mɛnɛ na kombe ko akabaimanedje sokolu. 4 Ehole ebaimanedji iyo basusu sokolu, akadale boso bo bobo ko ibo bakamokimane, modjɔ mo bakadjebe moholi monde. 5 Endelo bhata batakimanadea moto o tongono; bamotiadea bohali, modjɔ mo batadjebakadea moholi mo nde.» 6 Yesu abala nabu ekuanedji iye, endelo ibo baisipoa eka ebalaka iyo na bu.

7 Natina emina, Yesu abala na bu naikina: «Sooti mɛnɛ, naotɔndeakadeani bo: Edii mbi moto odii modipe mo bhata. 8 Ibia basusu badoa boso bo mbi badii baibi ko bapundji*; endelo bhata baibahokamedja. 9 Mbi moto odii modipe. Moto aka akakwea ta ndjea e mbi aheladea, abwani bokwea ko boimana, ko ataneadea mia ma nde. 10 Moibi akadoe oto tina e boiba, boowa ko bobeedja. Mbi, nadoa bɛngi bo badie mohelo ko bamodie bobuke mɛnɛ. 11 Mbi nadii mobanei o bhata mopele*. Mobanei mopele akadae mbuti na bopa mohelo mo nde mɛnɛ tina e bhata ba nde. 12 Moto okasale oto tina e palanga aditi mɛnɛ mobanei o bhata; bhata badiiti ba nde. Abwani bobakina; ko asatiedji ta ehole eɛnɛdea iyo swa akwei ko asasabi diko di bhata ko abanaganedji. 13 Indja eka ebwani boimana modjɔ mo iyona okasale tina e palanga aditi na pɛhɛ na bhata. 14 Nadii mobanei o bhata mopele. Nakadjebe bhata ba mbi ko bhata bambi bakadjebeni, 15 oko mondumba mokadjebeni Sesa ko mbi pongono nakadjebe Sesa oko iboa*. Ko nakapɛ bomɔ bo mbi tina e bhata ba mbi. 16 Nadii pongono na bakina bhata ibia badii pɛ boda ta ikutu idii. Natungi pongono bo badaledja nahule na bu, baokadea moholi mo mbi, ko baimeadea bwela bomɔti bo bhata ko mobanei omɔti. 17 Sesa akapaleni modjɔ mo napi bomɔ bo mbi tina e bobobolodja naikina. 18 Pɛpɛ nongo moto okatoadeani bomɔ bomina, endelo mbi nabopi na bopala bo mbi mɛnɛ nadii na bokondji bo bopa bomɔ bo mbi ko nadii na bokondji bo bobobolodja naikina. Iyena ebwani na mobeko modia mbi ta dii sesa.» 19 Bayudha babɔtɔɔ pongono tatei ebobo naikina tina e mibalo mimina. 20 Banɛnɛ tatei ebobo babalaka bo: «Apeami na mwembo mobe! Adii na igboma tina e mohokamedjakadea na nu nda?» 21 Bakina babalaka: bo «Kɔpi dji nde djidiiti dji moto odii na mwembo mobe. Mwembo mobe mobwani bodipoa miso ma moto okadae pɛpɛ boɛnɛ?»

22 Ta masu mamina, tɛkɛ emɔti e Bayudha edaka ta Yelusalɛmɛ edaka busa bo Bobudjeama bo tepelo ko edaka ehole e piɔ enɛnɛ*. 23 Yesu apukanaka ta mbalasani e Sɔlɔmɔ ta tepelo. 24 Bayudha bamohika na ikina ko babalaka na nde bo: «Mbunoko ndelo ndani edadea wɛ oalokina milema diko? Lo tɔndea sooti mɛnɛ, ekadaa bo odii Masiya.» 25 Yesu abasɔmbedja bo: « Nabala na nu modjɔ mo mina ehele, endelo todhimeenini. Eka ebalakadea tati e mbi wɛtoko bimbete djikɔkɔdea mbi ta kombe e Sesa. 26 Endelo ino otadhimakadeanini, modjɔ mo odiitini ta ndanda e bhata ba mbi. 27 Bhata ba mbi bakaoke moholi mo mbi; mbi nabadjebakadea ko bakimanakadeani. 28 Napakadea bomɔ bo kɔbili, batabungamabi ko pɛpɛ nongo moto omɔti obatinoabi ta mɔmɔ ma mbi. 29 Eka epaani Sesa enɔi bobuke bonɔ losusu ko moto nongo omɔti abwaniti boetinoa ta mɔmɔ ma Sesa. 30 Mbi na Sesa, lodii omɔti.» 31 Bayudha baandoa naikina mabukutulu bɛngi bamolɛ*. 32 Yesu abala na bu bo: «Naonidjani bimbete binɛnɛ bipele bidonga ta dii Sesa. Ta tina e bimbete bimina ohombakadeani olɛnini mabɔkɔ?» 33 Bayudha bamosɔmbedja bo: «Lotapalakadea loowoe na bola mabɔkɔ eloke tingi na embete epele, endelo modjɔ mo osingakadea Ndjakomba: wɛ odii moto ko opalakadea osaimedje Ndjakomba*!» 34 Yesu abasɔmbedja bo: «Ekomama ta mobeko mo bino bo Ndjakomba abala bo: "Odiini ba ndjakomba.*" 35 Lodjebakadea bo obwaniti bodongedja eka ebala Makomi. Enakoboa, Ndjakomba abea ba ndjakomba ibia bapa iyo Mobalo mo nde. 36 Ko mbi, Sesa ahɔɔni ko alomani ta ngondo. Ndenge ndani ebwani na nu bobala bo nasingakadea Ndjakomba modjɔ mo naotɔndeini bo nadii Mwana o Ndjakomba? 37 Namiti kɔɔ mikɔ mi Sesa, pɛpɛ bodhimeanini. 38 Endelo naka mikɔɔ, nongo omiti dhimeanini, dhimeani nongo mikɔ mimina bɛngi odjebeni ko osipoeni na mbala emɔti bo Sesa adii ta tei e mbi ko mbi nadii ta tei e Sesa.» 39 Na tina emina, bahombaka naikina bomopea, endelo asadindedja swɛ na bu. 40 Yesu asɔmbɔ naikina ta ngunda ekina e Yɔlɔdane ta esika ebatisaka Yoane boso* ko aso adikama iyana 41 Bato banɛnɛ badoa ta dii iyo. Babalaka bo: «Yoane aikɔɔ nongo embete emɔti e bokamodja, endelo midjɔ misusu mibala yo tina e moto iyo midaka sooti.» 42 Ko iyana, bato banɛnɛ badhimea Yesu.