1 Yesu aoka Bapalisai batubana bo iyo adiaka ko abatisaka batingami banɛnɛ bonɔ Yoane. 2 Ta bosooti, Yesu iyo mɛnɛ aibatisa nongo moto omɔti, edaka wɛtoko batingami bande bato babatisaka. 3 Iboa Yesu akina Yudhea ko asɔmbɔ ta Galileya. 4 Enakoboa bɛngi akɛe ta Galileya, abwanaka anɔe ta Samalia. 5 Aimea mbuti na ngando emɔti e Samalia kombe eyu Sikale, mbuti na gbie epa Yakobo na mwana o nde Yosepu*. 6 Iyana edaka na ibulu di madiba di Yakobo. Yesu, moɛmbɛke na mɔɔngɔ, adaaka na mobondo mbuti na ibulu. Edaka bokimana ngonga e basamano. 7 Mwali omɔti o Samalia adoa aloka madiba ko Yesu abala na nde: «Pani madiba.» 8 Batingami bande bakɛkɛ a ngando enɛnɛ asomba mia ma boyaka. – 9 Mwali mosamalia abala na Yesu bo: «Endelo, wɛ odi Moyudha! Ndenge ndani, obwani bowadja ni madiba ma bomwaka, mbi iyoo odi, Mosamalia?» – Modjɔ mo, Bayudha tebaokane na Basamalia*. – 10 Yesu amosɔmbedja bo: «Osoodjeba ikabo dikapɛ Ndjakomba, ko eka edii moto iyoo osaosɛngɛ madiba ma bomwaka, ka wɛ moto okɔki mowadja madiba ko abwanaki aopɛ madiba ma bomɔ.» 11 Mwali amosɔmbedja bo: «Kumu, oditi na egbogolo ko ibulu dinɔi mbɛngɛ. Abolodjadea wɛ madiba mamina ma bomɔ djɔ? 12 Kɔkɔ o biso Yakobo alopa ibulu idii; iyo mɛnɛ amwaka pongono madiba imi, bana ba nde na tito ba bobo bamwaka pongono madiba imi. Wɛ opalakadea onɔe Yakobo?» 13 Yesu amosɔmbedja bo: «Iyona obwani bomwaka madiba imi aokadea naikina posa e madiba; 14 endelo iyo omwakadea madiba imi ma mopadea mbi, ataokabi posa e madiba: madiba mamopadea mbi maimeadea adii iyo elokeli bomɔ bokɔbili*.» 15 Mwali abala nande: «Kumu, pani madiba mamina imia, bɛngi nadae pɛpɛ booka posa e madiba naikina ko nadae naikina pɛpɛ bodoa aloka madiba iya.» 16 Yesu abala nande bo: «Kɛɛ bea muma wɛ ko sɔmbɔ iya.» 17 Mwali amosɔmbedja bo: «Naditi na moomi.» Ko Yesu abala na nde: «Odii na elonga ebobala bo oditi na moomi; 18 modjɔ mo odia bami batano, ko iyona odi nawɛ edɛdiye iye aditi muma wɛ. Obali sooti.» 19 Iboa mwali abala na nde: «Kumu naɛnɛkɛdea bo wɛ odii motɛli. 20 Bakɔkɔ ba biso ba Basamalia bakumea Ndjakomba iya ta ngomba iye, endelo ino Bayudha, obalakadeani bo esika ebwani na bomokumea edii ta Yelusalɛmɛ*.» 21 Yesu amosɔmbedja bo: «Dhimeani, ehole ekɛkɛ adoe otakumeadeani Sesa iya ta ngomba iye, na nongo ta Yelusalɛmɛ. 22 Ino, Basamalia, okakumeeni Ndjakomba na pɛ bomodjeba; iso, Bayudha, lokamokumee ko lokamodjebe, modjɔ mo mohelo modongi ta dii Bayudha*. 23 Endelo ehole eimeadea, ko esi boimea ehele, iye bakumei ba sooti mɛnɛ bakumeadea Sesa na Mwembo ko na bosooti; modjɔ mo ibo badii ibia bakapale Sesa. 24 Ndjakomba adi Mwembo, ko ibia bamokumeakadea etungi bamokumee na Mwembo ko na bosooti.» 25 Mwali abala na nde bo: «Nadjebakadea bo Masiya epali bobala bo Kilito akɛkɛdea adoe. Ehole edoadea iyo, alotingodjadea midjɔ misusu.» 26 Yesu amosɔmbedja bo: «Edii mbi, moto iyona obalakadea na wɛ.»

27 Ta ehole emina, batingami ba Yesu baimea; ko bakamo amoɛnɛ bo asoola na mwali. Endelo pɛ nongo omɔti o bobo omowadja bo: «Ehombakadea wɛ nde?» kaoko: «Eka esolakadea wɛ nande nda?» 28 Iboa mwali akina mondungulu mo nde, ko asɔmbɔ ta ngando enɛnɛ, iho abala na bato: 29 «Doaindjeni Moto omɔti adii bobo abali na mbi mɛko misusu mikɔɔ mbi. Edadea ndelo ekina Masiya?» 30 Baimana ta ngando enɛnɛ bakɛɛ adii Yesu. 31 Ta ehole emina, batingami baɔngɔnɔkɔ Yesu ko babalaka bo: «Molehi, yaka!» 32 Endelo abasɔmbedja bo: «Mbi nadii na miya ma boya imi madaaka ino pɛpɛ bodjeba.» 33 Batingami basawadjana bo: «Emolwɛki moto omɔti mia ma boyaka?» 34 Yesu abala nabu bo: «Mia ma mbi, edii wɛtoko bosuma bolulea bo moto olomani ko bosidja mosala mopani iyo. 35 Ino okabaleni bo: "Ediki naikina na songe banɛi bɛngi ehole ebotsoa mbuma eimee." Endelo mbi nabali na nu, indjani gbie bopele: mbuma dji dii djipingake ko dji dii mbuti na bodjitsoa! 36 Iyona okatsoɛ akabolodje iputi di nde ko akaputoanedje mbuma tina e bomɔ bo kɔbili; na boa, moto okaone na moto akatsoɛ bakasepe engbanga. 37 Natina emina edii sooti na isese dia dibala: "Omɔti aoni ko okina atsui." 38 Mbi, naolomini atsoa ta gbie iyena edaa ino pɛpɛ bosala; bakina basala ko ino, oimeini atina e botsoa mbuma dji mosala mo bobo.» 39 Basamalia banɛnɛ ba ngando enɛnɛ emina badhimea Yesu modjɔ mo mwali iyona abala bo: «Abali na mbi misusu mikɔɔ mbi.» 40 Na tina emina, ehole edoa Basamalia mbuti na Yesu, bamowadja bɛngi adikame na bu; ko iyo adikama ena masu mabae. 41 Badaa naikina banɛnɛ mɛnɛ abodhimea, ta tina e midjɔ minɛnɛ mibalaka iyo; 42 ko babalaka na mwali bo: «Edɛdiye iso lodhimiti oto eloke midjɔ milotɔdeaki wɛ, endelo modjɔ mo iso bɛnɛ lomooki, ko lodjebakadea bo adii sooti mɛnɛ Moheledji o ngondo.»

43 Ngɔngɔ dji masu mamina mabae ta esika emina, Yesu adonga ena ko akɛɛ ta Galileya. 44 Modjɔ mo Yesu iyo mɛnɛ abala bo: «Motɛli takume ta ngando ende*.» 45 Endelo ehole eimea iyo ta Galileya, bato ba Galileya bamoasɔɔ bopele mɛnɛ, modjɔ mo ibo pongono bakɛkɛ ta tɛkɛ* e Pasika ta Yelusalɛmɛ baɛnɛkɛ midjɔ misusu imimi mikɔkɔ iyo. 46 Iboa Yesu ahula ta Kanana e Galileya, iho a esika ekindodja madiba vino. Iyana edaka na mosali omɔti o basoda ba mokondji*, adaaka na mwana moomi na epeko ta Kapalanaume. 47 Iyana aoka yo bo Yesu aimei ta Yudhea bɛngi akɛe ta Galileya, akɛɛ adii iyo ko amoɔngɔnɔ bɛngi bakɛe ta Kapalanaume aheledja mwana moomi o nde, odaaka mbuti na bogwa. 48 Yesu abala na nde bo: «Omiti ɛnɛ bimbete bi bokamodja ko na bingengo otadhimadea!» 49 Mosali o basoda amosɔmbedja bo: «Molehi, doa tadii mbi boso bo mwana ombi bogwa.» 50 Yesu amosɔmbedja bo: «Yana! mwana o wɛ aheli.» Moto omina adhima mɛko mi motɔndeaka Yesu ko ayana. 51 Ta iyane di nde na ndjea, basali ba nde badoa asongana na nde ko bamotɔndea bo: «Mwana o wɛ aheli!» 52 Iyo abawadja ngonga ndani ebanga mwana boka bopele, ko bamosɔmbedja bo: «Pɛpɛlɛ e nde esiaki mɔkɔ ta ngonga e boso ngɔngɔ dji midi.» 53 Sange mwana adjebaka bo edaka oko ngonga emaka motɔndea Yesu bo: «Mwana o wɛ aheli.» Iboa adhimea Yesu na denga di nde disusu*. 54 Iyena edaka embete e babae ekɔɔ Yesu, ngɔngɔ dji ihule di nde ta Yudhea bɛngi akɛe ta Galileya*.