1 Yesu abala na bu bo: «Pɛpɛ bodaani oko milema diko, dhimeani Ndjakomba, ko dhimeani pongono mbi. 2 A ndako e Sesa bisika bidii binɛnɛ; pɛpɛ boda boa ka naibala na nu bo nakɛɛkɛ abɔngedja esika tinae bino? 3 Ngɔngɔ dji bokɛɛ a obɔngedjeani esika, nasɔmbɔdea ko naotombadeani mbuti na mbi, bɛngi bo ino pongono, odaeni iyana ta esika edii mbi. 4 Odjebini ndjea eimedjakadea pamba ekɛkɛdea mbi akɛe.» 5 Toma amowadja bo: «Kumu, lotadjebakadea esika ekɛkɛ wɛ. Lobwani bodjeba ndjea emina ndenge nda?» 6 Yesu amosɔmbedja bo: «Mbi nadii ndjea, bosooti ko na bomɔ. Moto omɔti abwaniti boimea ta dii Sesa amiti nɔɔ na ndjea e mba. 7 Okadjebani mbi, odjebadeani pongono Sesa. Ko edɛdiyeye, omodjebini, omoɛnini.»

8 Pilipo abala na nde bo: «Kumu, looinedja Sesa ko lotadaadea na posa eka ekina.» 9 Yesu amosɔmbedja bo: «Ekoka edaa mbi nu ko wɛ opakina djebani oko, Pilipo? Moto iyona oɛnɛni aɛnɛ Sesa. Tina ndani obalakadea bo: "Loinedja Sesa"? 10 Otadhimakadea bo mbi nadii ta tei e Sesa ko Sesa adii ta tei mbi? Mibalo mibalakadea mbi na nu te midonge ta dii mbi mɛnɛ. Edii wɛteko Sesa iyoo odii ta tei e mbi akokedjakadea mikɔ mi nde iyo mɛnɛ. 11 Dhimeanini: mbi nadii ta tei e Sesa ko Sesa adii ta tei e mba. Ko naikina, dhimani ta tina e mikɔ mimina. 12 Naotɔndeakadea, sooti mɛnɛ bo: iyo odhimeini, akɔdea pongono mikɔ mikɔkɔdea mbi. Amikɔdea kutu na bonɔ, modjɔmo nakɛkɛdea ta dii Sesa. 13 Ko mbi nakɔdea midjɔ misusu miwadjakabi ino na kombe e mbi, bɛngi Sange moto adie ekumu ta tei e Mwana. 14 Okawadjanini eka emɔti na kombe e mbi, naekɔbi.»

15 «Ekadaa bo opalakadeanini, osumadeani mibeko mi mbi. 16 Nasɛngɛdea ta dii Sesa aopɛni Mbaeli bɛngi adae aokamoani, ko adikame na nu seko: 17 edii Mwembo mo bosooti. Ngondo ebwaniti bomoasɔ, modjɔ mo ngondo ebwaniti bomoɛnɛ ko bomodjeba. Endelo ino, omodjebakadeani, modjɔ mo akadikame na nu ko adadea na nu seko. 18 Nataokinakani ino bɛnɛ ondingo bana ba malike; nasɔmbɔdea ta dii ino. 19 Ngɔngɔ dji moo ehole mokɛkɛ ngondo etaɛnɛdeani naikina, endelo ino, oɛnɛdeanini modjɔ mo nahelamakadea ko ino ohelamadeani pongono. 20 Ta busa bomina ibua osipoabini bo mbi nadi atei e Sesa, ko ino ta tei e mbi ko mbi ta tei e bino.

21 «Moto akabanea mibeko mi mbi ko akamisuma, indja moto okapaleni. Sesa apaladea moto okapaleni; mbi pongono namopaladea ko nasaɛnɛmedjadea na nde.»

22 Yudhe, endelo te Yudhasi Isikaliote, abala na nde bo: «Kumu, ndenge ndani ebwani bokɔɔmɔ bo otungi bosaɛnɛmedja oto na su pɛ ko odae pɛ bosaɛnɛmedja na ngondo?» 23 Yesu amosɔmbedja bo: «Moto opalakadeani asumadea eka ebalakadea mbi. Sesa amopaladea; lodoadea ta dii iyo mbi na Sesa, ko lodikamadea ta dii iyo. 24 Moto iyo okadae pɛpɛ bopalani ta sume mibalo mi mbi. Mɛko imimi miokakadea ino nabala mitadongakadea ta dii mbi, endelo midongakadea ta dii Sesa iyona olomani. 25 Naotɔndeini mɛko mimina ta ehole eye edii mbi nanu. 26 Mbaeli iyona odoadea aokamoani, Mwembo Mosɛnɔke, imua molomadea Sesa na kombe e mbi, moolehadeani midjɔ misusu ko aolɛdjedjadeani mɛko misusu mibala mbi na nu.

27 «Naokineakadeani bogo, naopakadeani bogo bombi*, nataboopakadeani mondumba mokapɛ bato ba ngondo. Pɛpɛ bodainioko milema diko, pɛpɛ bobangani 28 Ookakinini nabala bo: "Nakɛi, endelo nasɔmbɔdea adii no." Okapalanini, ino osepakini bodjeba bo nakɛi ta dii Sesa, modjɔ mo Sesa anɔini na bonɛnɛ. 29 Naotɔndeini modjɔ momina edɛdiyeye, boso bo mɛko mimina mi imee, bɛngi bo ehole eimeadea mo, odhimeni. 30 Natabaladea na nu naikina bobuke, modjɔ mo mokondji o ngondo iye akɛkɛdea adoe. Adiiti nongo na bokondji bomɔti diko di mbi, 31 endelo etungi na ngondo bodjeba bo nakapale Sesa ko nakakɔe oko mondumba molomani iyo. Angɔni lodonge iya!»