1 Tɛkɛ e Pasika eimeaka mbuti. Yesu adjebaka bo ehole eimeaka mbuti tina ende bokina ngondo iye bɛngi akɛe mbuti na Sange ende. Adaka seko apala bato ba nde ibia badaaka ta ngondo ko abapala tee mbunoko ta suka. 2 Yesu na batingami ba nde bayakaka mia ma mɔkɔmɔkɔ. Djabulu asia bokwea ta molema mo Yudhasi, mwana o Simona Isikaliote, bɛngi atɛke Yesu. 3 Yesu adjebaka iyo mɛnɛ bo adongaka ta dii Ndjakomba ko asɔmbɔdea ta dii Ndjakomba, ko Sange ende amopaka bokondji bosusu. 4 Aangɔɔ ta mesa, aiwa esendja ende e diko ko atomba esendja emɔti iboa asadinga ta bongo. 5 Ngɔngɔ djimina, aisa madiba ta saani ko abanga bososa mako ma batingami bande ko bomahakoa na esendja emina esadingaka iyo ta bongo. 6 Iboa aimea yo mbuti na Simona Petelo, iyo abala na nde bo: «Kumu, wɛ ososadea mako ma mbi?» 7 Yesu amosɔmbedja bo: «Midjɔ imimi mikɔkɔdea mbi edɛdiyeye wɛ otamidjebakadea, endelo omidjibadea ngɔngɔ.» 8 Petelo abala na nde bo: «Ngasa, otasosadea mako ma mbi!» Yesu amosɔmbedja bo: «Namiti o sosa mako, otadiadea nongo kabo emɔti ta tei e djia dji doi na mbi.» 9 Simona Petelo abala na nde bo: «Kumu, ekadaa boa, pɛpɛ bososani otomako, endelo sosani pongono mɔmɔ na molo!» 10 Yesu abala na nde bo: «Moto iyoo osi bosasosa mokuku mosusu, asi boimea mosɛnɔke atungi bososa oto mako. Ino odiini basɛnɔke, endelo te ino basusu.» 11 Yesu adjebaka iyona omokabadea; na tina emina abala bo oka: «Ino basusu oditini basɛnɔke.»

12 Ngɔngɔ dji bobasosa mako, Yesu alwaka esendja e nde, adaa naikina ta mesa ko abala na bu bo: «Osipoini eka esakɔɔni mbi? 13 Obeakadeanini "Molehi" ko na "Kumu", odiini na molonga, modjɔ mo adii mbi oko iboa. 14 Iboa mbi, Kumu ko Molehi mbi naososini mako, ino pongono otungini bososanani mako. 15 Modjɔ mo naoinedjini eka ebwani na nu bokɔɔ ndenge esakɔɔ mbi tina e bino. 16 Sooti mɛnɛ, naotɔndeakadeani bo: mosali tanɔe moswa nde ko mwana o elomu tanɔe moto iyona omoloma*. 17 Edɛdiye odjebakadeani mɛko mimina; odadeani na sepi okaisadeani midjɔ mimina ta mosala. 18 Nitabalakadea na nu basusu; nadjebi ibia bahɔɔ mbi. Endelo etungi bo midjɔ mibala Makomi mikokedjame: "Moto iyoo okabanaka na mbi ipa ta saani emɔti ahokoi ta diko di mbi*." 19 Nasi bootɔndeani, boso bo modjɔ momina moimee, bɛngi ehole eimeadea modjɔ momina, odhimeni bo "Mbi nadii". 20 Naotɔndeakadeani sooti mɛnɛ bo: moto oasɔdea iyona olomi mbi, aasɔini pongono; ko iyona oasɔdeani, asɔi Iyona olomani.»

21 Ngɔngɔ dji mɛko mimina, Yesu aoka saya ta molema ko abala na bu bo: «Sooti mɛnɛ, naotɔndeakadeani bo: omɔti o bino akabadeani.» 22 Batingami basaindjana, basawadjana bɛngi badjebe moto obalakadea na nde. 23 Omɔti o batingami, iyona opalaka Yesu, adaaka adii mbuti na Yesu. 24 Simona Petelo amonitea, bɛngi awadje Yesu moto obalakadea na nde. 25 Motingami omina akukama ta bupa bo Yesu ko amowadja bo: «Kumu, moto omina nda?» 26 Yesu amosɔmbedja bo: «Nadubeakadea ekenge e ipa ta mosua: moto opadea mbi ekenge emina, edii iyo iyona.» Iboa Yesu atomba ekenge e ipa, aedubea ko aepa Yudhasi Isikaliote, mwana moomi o Simona. 27 Ehole ematomba Yudhasi ekenge e ipa, Satana akwea ta tei ende. Yesu abala na nde bo: «Modjɔ mopalakadea wɛ bokɔ, kɔɔ pɛpɛlɛ!» 28 Bato ibia badaaka ta mesa pɛ nongo moto omɔti osipoa tina ebalaka iyo na nde iboa. 29 Abo Yudhasi adaaka adedja palanga, bakina batingami balɛnɛkɛ bo Yesu amolomaka akɛe asomba leka lobwani bobakamoa ta tɛkɛ, kaoko bokɛ akamoa bakwali. 30 Yudhasi atomba ekenge e ipa ko, na mbala emɔti aimanaka; busa bodipaka.

31 Ngɔngɔ dji Yudhasi boimana, Yesu abala bo: «Edɛdiye Mwana o moto abolodji ekumu, ko Ndjakomba asi bodia ekumu na ndjea ende. 32 [Ko edaabo ekumu e Ndjakomba ekainedjama ta tei e nde,] Ndjakomba pongono amokumedjadea iyo mɛnɛ ekumu e Mwana ko ediki mweka bɛngi amopɛ okumu emina. 33 Bana ba mba, mbi nadii na nu naikina oto moo ehole mokɛkɛ. Ohombadeanini, endelo edɛdiyeye nabalakadea na nu eka ebala mbi na Bayudha: otahɔnɔdeani bokɛɛ iho akɛkɛdea mbi akɛe*. 34 Naopakadeani mobeko moyene: palanani ta tei e bino. Etungi na nu bopalana ta tei e bino modumba moopalani mbi. 35 Okapalanani ta tei e bino, iboa bato basusu badjebadea bo odini batingami ba mbi.»

36 Simona Petelo amowadja bo: «Kumu, okɛkɛdea djɔ?» Yesu amosɔmbedja bo: «Wɛ otakoka bokimanani ta esika ekɛkɛdea mbi edɛdiyeye, endelo okimanadeani ngɔngɔ.» 37 Petelo amowadja naikina bo: «Kumu, tina ebwani na mbi bodaa pɛpɛ bookimana edɛdiyeye nda? Nadii mbuti na bopa bomɔ bombi tina e wɛ!» 38 Yesu amosɔmbedja bo: «Odii mɛnɛ mbuti na bopa bomɔ bo wɛ tina e mbi? Naotɔndeakadea, sooti mɛnɛ bo: oinganadeani mbala isato boso bo kɔkɔ bobekoa.»