1 Ngɔngɔ djimina, Yesu akɛɛ ta ngunda ekina e ibeke e Galileya bakaebee pongono ibeke di Tibeliade*. 2 Emumu e bato banɛnɛ bamokimanaka, modjɔ mo baɛnɛkɛ bimbete bi bokamodja bikɔkɔ iyo ta boheledja bato ba bego. 3 Yesu aiwea ta diko di ngomba adaa ena na mobondo na batingami bande. 4 Enakoboa Pasika, tɛkɛ e bayuda, eimeaka mbuti. 5 Yesu aindja ko aso aɛnɛ emumu e bato banɛnɛ badoaka ta dii iyo; awadja Pilipo bo: «Abwani iso bosomba mapa djɔ bɛngi lobapɛ ibo basusu bayake?» 6 Abalaka iboa tina e bomeka Pilipo, modjɔ mo iyo adjebaka eka ndani ebwanadea iyo bokɔ. 7 Pilipo amosɔmbedja bo: «Nongo na pata djipalanga* mikama mibae, lotasombadea mapa manɛnɛ bengi bo omɔti omɔti o bobo abolodje nongo mo ekenge.» 8 Omɔti o batingami bande, Andele, mwange Simona Petelo, abala na nde bo: 9 «Iya edii na mwana moomi amɔti adii na mapa matano makɔɔmɔ na mbuma e ɔlɔdje ko na swi babae. Endelo ebwani bokɔ bato ibi banɛnɛ* na mu nde?» 10 Yesu abala bo: «Dedjani bato basusu na mbondo.» Ndjani djinɛnɛ djidaka ta esika emina. Iboa baso badaa na mbondo; baami mbuti na koto itano. 11 Iboa, Yesu atomba mapa ko, ngɔngɔ dji bosakoa Ndjakomba, amakabana na bato ibibia badaaka ena. Abapa pongono swi oko modumba momina, ta ndenge epalaka ibo. 12 Ehole eyaka ibo basusu na ndja e bobo, Yesu abala na batingami ba nde bo: «Andoani bikenge ibi bidiki, bɛngi bo eka emɔti edae pɛpɛ bonama.» 13 Ba djiandoana ko balumedja mitinga doomi na mibae na bikenge dji mapa matano makɔɔmɔ na mbuma e ɔlɔdje madikaka ta imia mayaka ibo. 14 Ehole eɛnɛ bato bimbete bibokamodja bikɔkɔ Yesu, babala bo: «Moto iyo adi mɛnɛ Motɛli iyo osadoa ta ngondo!» 15 Endelo Yesu adjeba bo baduadea amotomba na ngulu bɛngi bamopɛ bokondji. Iboa, asatuba na ikina yo mɛnɛ, ta ngomba.

16 Yana aimea busa mɔkɔmɔkɔ, batingami ba Yesu batitea ta mokula mo ibeke, 17 batitea ta bwato bomɔti ko babanga bokatisa ta dɔɔngɔ di Kapalanaume. Busa bosiaka bodipa ko Yesu aipetaka imia dɔɔngɔ didaka ibo. 18 Madiba ma ibeke makumana, modjɔ mo mopɛpɛ mobomaka na ngulu. 19 Batingami balukaka bohali bo kilomɛtɛlɛ djitano kaoko djisamano ehole eɛnɛ bo Yesu bobatama mbuti na bwato akɛkɛ adale ta diko di madiba; ko baso baluma na bɔɔ. 20 Endelo Yesu abala na bu bo: «Edii mbi, pɛpɛ bobangani!» 21 Batingami bahombaka bamotitedje ta bwato, endelo na mbala emɔti bwato bosɛmɛɛ, ta polo ekɛkɛ bo.

22 Iyana aya busa, emumu e bato badikaka ngunda ekina e ibeke badjeba bo edaka ena oto na bwato bomɔti; bato baso badjeba bo Yesu aititeaka ta bwato bomina botitea batingami ba nde, endelo batingami bakɛkɛ ibo bɛnɛ. 23 Naboa, makina maato, imia madonga ta ngando enɛnɛ e Tibeliade*, maimeaka mbuti na esika eyakaka bo mapa ngɔngɔ dji Kumu bosakoa Ndjakomba. 24 Ehole eɛnɛ bato bo Yesu na batingami ba nde baidaka ena, batitea ta maato ma mina ko bakɛɛ ta Kapalanaumu ahombe Yesu.

25 Batanea Yesu ta ngunda ekina e ibeke ko baso babala na nde bo: «Molehi, oimeaki djɔno ehole nda?» 26 Yesu abasɔmbedja bo: «Naotɔndeakadeani, sooti mɛnɛ bo: otahombakadeanini modjɔ mo oɛnini bimbete bi bokamodja bikɔki mbi, endelo modjɔ mo ayakabini mapa ko ogolabini. 27 Kinani bosalani oto ta tina e mia imia makabehe, endelo tina e miya imia makayeyoe ko imia madii molo mo edhiba e bomɔ bo kɔbili. Mia mamina Mwana o moto aopabini, modjɔ mo Ndjakomba, Sango, amoisa embete e bokondji bo nde.» 28 Iboa bamowadja bo: «Ebwani iso bokɔ nde bɛngi lokokedje mikɔ mi Ndjakomba?» 29 Yesu abasɔmbedja bo: «Mosala mopalakadea Ndjakomba tina e bino, modii bo odhimeeni iyo oloma iyo.» 30 Bamowadja bo: «Endelo wɛ modjɔ mo bokamodja ndani mobwani wɛ bolokɔmea bɛngi bo iso lodhimee? Mosala ndani mokɔdea wɛ? 31 Bakɔkɔ ba biso bayakaka mana ta edhu, mondumba mobalakadea Makomi bo: "Abapa mapa ma boyaka imi madonga ta busa*."» 32 Yesu abasɔmbedja bo: «Naotɔndeakadeani sooti bo: editi Mose moto oopani mapa ma busa, endelo edii Sange e mbi moto opakadeani mapa ma sooti mɛnɛ ma busa. 33 Modjɔ mo mapa makapɛ Ndjakomba, edii wɛtoko iyona odongi ta busa ko opakadea bomɔ ta ngondo» 34 Iboa, babala na nde bo: «Kumu, lopa masu masusu mapa ma mina imia.» 35 Yesu abasɔmbedja bo: «Mbi nadii mapa ma bomɔ. Iyona odoi ta dii mbi ataokabi ndja ko iyona odhimeni, atadaabi na posa e madiba. 36 Endelo nabala na nu modjɔ momina bo: oɛnɛnini ko otadimakadeani*. 37 Moto mosusu opini Sesa aduabi ta dii mbi, ko iyona odoi ta dii mbi, natamodumbabi sokolu; 38 modjɔ mo naidonga ta busa tina e bokɔɔ bopala bo mbi, endelo tina e bokɔɔ bopala bo iyona olomani. 39 Enakoboa indja bopala bo iyona olomani: edii bo nadae pɛ bobungedja nongo omɔti obia bapani yo, endelo na basɔmbedje ta bomɔ ta busa bo suka. 40 Bopala bo Sange mbi mɛnɛ, bodii bo: ibia basusu baɛni Mwana ko bomodhimea badiadea bomɔ bo kɔbili ko mbi na basɔmbedjebi ta bomɔ ta busa bo suka.» 41 Bayudha banungubanaka na nde modjɔ mo iyo abalaka bo: «Edii mbi moto odii mapa imimi madonga ta busa.» 42 Basawadjaka bo: «Iyo te Yesu, mwana o Yosepu? Lodjebakadea sango na nango*. Ndenge ndani ebwani iyo bobala edɛdiyeye bo: "Edii mbi moto odii mapa imi madonga ta busa"?» 43 Yesu abasɔmbedja bo: «Kinani bonungubana ta tei e bino. 44 Moto abwaniti bodoa ta dii mbi emiti daa bo Sesa iyo olomani amobee, ko mbi, namosɔmbedjabi ta bomɔ ta busa bo suka. 45 Indja ndenge ekomama ta mikanda mi Batɛli: "Ibo basusu balehamabi na Ndjakomba."* Moto mosusu iyona ooka Sesa ko odia bileho binde adoakadea ta dii mbi. 46 Iyena epaliti bobala bo moto omɔti aɛnɛ Sesa; dongedja oko iyona odonga ta dii Ndjakomba moto oɛnɛ Sesa*. 47 Oko iboa, naotɔndeakadeani, sooti mɛnɛ bo: iyona odhimi adii na bomɔ bo kɔbili. 48 Nadii mapa ma bomɔ. 49 Bakɔkɔ ba bino bayaka mana ta edhu ko baso bagwa. 50 Endelo mapa imimi madonga ta busa madii imia ma bo moto iyona omayakadea adae pɛpɛ bogwa. 51 Mbi nadii mapa ma bomɔ imi madonga ta busa. Moto akamayaka mapa ma mina, aheladea kɔbili na kɔbili. Mapa mapadea mbi, edii mokuku mo mbi; namopadea bɛngi ngondo edie bomɔ.» 52 Iyana boa Bayudha babukanaka na ngulu mɛnɛ ta tei e bobo; basawadjaka iboa: «Ndenge ndani moto iyoo abwani bolopa mokuku mo nde lomoyake?» 53 Yesu abasɔmbedja bo: «Naotɔndeakani sooti mɛnɛ bo: omiti yakani mokuku mo Mwana o moto ko omiti mwakani makiya ma nde, adaetebini na bomɔ ta tei e bino. 54 Iyona oyakadea mokuku mo mbi ko omwakadea makiya ma mbi adabi na bomɔ bo kɔbili ko mbi na mosɔmbedjabi ta bomɔ ta busa bo suka. 55 Modjɔ mo mokuku mo mbi modii mia ma sooti, ko makiya ma mbi madii emweli e sooti. 56 Moto iyoo oyaki mokuku mo mbi ko omwaki makiya ma mbi adii ta tei e mbi ko mbi ta tei e nde. 57 Sesa iyo olomani adii na bomɔ ko nahelakadea tina e nde; oko boa, iyoo oyakakadea ni aheladea na ndjea e mbi. 58 Indja mapa imimi madonga ta busa. Madiiti ondingo imia mayaka bakɔkɔ ba bino, ibibi bagwa. Endelo iyona oyakadea mapa imimi ahelabi kɔbili na kɔbili.» 59 Yesu abala mɛko mimina imia ehole elehaka iyo ta ndako e miɔngɔnɔ e Bayudha e Kapalanaume.

60 Ngɔngɔ dji bohokamedja Yesu, batingami ba nde banɛnɛ babala bo: «Iyana, agbasoi! Mobalo mondumba imu mobwani bodhimama ndenge nda?» 61 Yesu adjeba ta tei ende bo batingami bande banungunaka tina e modjɔ momina. Na tina emina abawadja bo: «Modjɔ momina mootsuini? 62 Modabi boni ehole eɛnɛbi ino Mwana o moto boiwea ta polo edaka iyo boso*? 63 Edii wɛtoko Mwembo imua mokapɛ bomɔ; moto iyo mɛnɛ abwaniti bokɔ eka emɔti. Mibalo imi misabala mbi na nu midi Mwembo ko bomɔ. 64 Endelo edii na bakina ta tei e bino batadhimakadea.» Modjɔ mo, Yesu adjebaka donga mbangi bandani ibia badaaka pɛpɛ bodhima ko na iyona omokababi. 65 Abala naikina bo: «Indja tina ebala mbi na nu bo moto abwaniti bodoa ta dii mbi Sesa amiti mopa enɔli.»

66 Bobanga ta ehole emina, batingami ba nde banɛnɛ basatuba na nde ko baidala na nde nakina. 67 Yesu awadja batingami doomi na babae bo: «Ino pongono, opalakadeani okɛeni?» 68 Simona Petelo amosɔmbedja bo: «Kumu, akɛkɛdea iso ta dii nda? Wɛ odii na mibalo mi bomɔ bo kɔbili. 69 Iso, lodhimi ko lodjebakadea bo: wɛ odii Mosɛnɔke olomama Ndjakomba*.» 70 Yesu abasɔmbedja bo: «Editi mbi moto oohɔɔni ino doomi na babae? Endelo omɔti ta tei e bino adii djabulu!» 71 Abalaka tina e Yudhasi, mwana o Simona Isikaliote. Modjɔ mo Yudhasi nongo edaka iyo omɔti ta tei e batingami doomi na babae akɔkɔ mokaba*.