1 Ngɔngɔ djimina, Yesu akɛɛ ta Yelusalɛmɛ ta tɛkɛ emɔti e Bayudha. 2 Ta ngando enɛnɛ emina, mbuti na modipe mo Bhata edaaka na, ediba emɔti ko na mbalasani djitano; ekabeame na monɔkɔ mo Baebele Betesaida*. 3 Ta mbalasani djimina, emumu e bato ba bipeko badaaka basambi ena: bato ba miso mago, bitumbɛ, bato ba binama bikatatake. [Bambaka madiba makumane; 4 modjɔ mo andjelu o Kumu atitaka bihole bikina ta ediba ko akumanedjaka madiba. Mokɔni o boso atiteika ta madiba ehole e kumani mo, ahelaka na epeko ende, na yogo emina edae e mondumba ndani*.] 5 Ta tei e bobo moto omɔti o epeko adaaka ena akɔɔ na epeko ende bianga tuku isato na bomwambe. 6 Ehole emoɛnɛ Yesu asambi ta kpɔtɔ ko, aoka bo ayeyoa na epeko masu manɛnɛ, amowadja bo: «Opalakadea ohele?» 7 Moto o epeko amosɔmbedja bo: «Kumu, mbi naditi na moto o bodumbani ta ediba ta ehole ekakumane madiba; ndelo ahombi mbi bɛngi natitea ta ediba, moto okina asi botitea boso bo mbi ehele.» 8 Yesu abala na nde bo: «Saangɔdjɔ, tomba itɔkɔ di wɛ ko dala.» 9 Na mbala emɔti, moto omina ahela; atomba itɔkɔ di nde ko abanga bodala. Enakoboa, modjɔ momina monɔɔmɔkɔ ta busa bo sabata, 10 ko bakondji ba Bayudha babala na moto iyona ohela bo: «Edii busa bo sabata, odiiti na enɔli e boandoa itɔkɔ di wɛ*.» 11 Abasɔmbedja bo: «Moto iyo oheledjini abali na mbi bo: "Andoa itɔkɔ di wɛ ko dala."» 12 Iboa bamowadja bo: «Moto omina nda iyo obali na wɛ bo: "Andoa itɔkɔ di wɛ ko dala"?» 13 Endelo moto iyoo ohelaka aidjebaka, modjɔ mo Yesu adimoaka ta emumu e bato edaka ta esika emina. 14 Ngɔngɔ djimina, Yesu asongana na nde ta tepelo ko amotɔndea bo: «Indja edɛdiyeye wɛ iyona osa bolodja mohelo, Pɛ bokɔko pekato naikina, bɛngi bo eka emɔti ebe edae pɛ bootanea.» 15 Moto omina akɛɛ atɔndea bakondji ba Bayudha bo edaka Yesu moto omoheledja. 16 Natina emina, Bayudha babanga bohomba bonɔngedja Yesu, modjɔ mo akɔkɔ modjɔ momina ta busa bo sabata. 17 Endelo Yesu abasɔmbedja bo: «Sange mbi akasale ehole esusu ko mbi nakasale oko ondingo iyo.» 18 Ta tina e mobalo momina, bakondji ba Bayudha bahombaka naikina na ngulu mwɛngi mo bowa Yesu; modjɔ mo aisukea oto na bokotoa sabata, endelo abalaka naikina bo Ndjakomba adii Sange nde mɛnɛ ko na mondumba momina asaɛngɛkɛ na Ndjakomba.

19 Yesu asɔmbɔ naikina bobala bo: «Sooti mɛnɛ, naotɔndeini bo: Mwana abwaniti bokɔ eka emɔti oto na nde iyo mɛnɛ; ebwani bokɔ seko modjɔ moɛnɛkɛdea iyo Sango akɔ. Modjɔ mosusu mokakɔe Sange moto Mwana akakɔe oko iboa. 20 Modjɔ mo sange moto akapale Mwana ko amoinedji midjɔ misusu mikakɔe iyo mɛnɛ. Amoinedjadea na ikina midjɔ minɛnɛnɛ bonɔ imimi bo okamoadeani. 21 Modjɔ mo, oko ndenge emɔti esisodjakadea Sesa bato bago ko bobapa bomɔ, oko iboa Mwana pongono apakadea bomɔ adi iyona opali iyo. 22 Ko Sesa tasambedjake moto, endelo apana enɔli e bosambedja misusu adii Mwana, 23 bɛngi bo bato basusu bakumedje Mwana oko mondumba mokumedjakadea ibo Sange moto. Iyona odaakadea pɛ bokumedja Mwana, atakumedjakadea Sange moto iyoo omoloma. 24 Sooti mɛnɛ, naotɔndeini bo: iyona obwani booka mobalo mo mbi, ko akadhime iyoo olomani, adii na bomɔ bo kɔbili. Atanɔbi ta sambi, endelo anɔɔ yogo ehele ko asɔmbɔ ta bomɔ. 25 Sooti mɛnɛ, naotɔndeakadeani bo: ehole ekɛkɛadoe, ko eimei mbuti, iyee eokadea bato bago, kɔpi e Mwana o Ndjakomba ko ibia bamookabi baheladea. 26 Modjɔ mo, Sesa iyo mɛnɛ adii molo mo ediba mo bomɔ oko mondumba momɔti apa Mwana adae molo mo ediba e bomɔ. 27 Ko apa Mwana bokondji bo bosambedja, modjɔ mo adii Mwana o moto. 28 Pɛpɛ bomokamwadeani oko, modjɔ mo ehole ekɛkɛdea adoe bato bago basusu badii ta mimbɔndɔ mi makila baokadea kɔpi ende 29 ko baimanadea ta makila ma bobo. Ibia bakɔ bopele basisoadea ta bogwa bɛngi badie bomɔ, endelo ibia bakɔɔ bobe basisoadea bɛngi basambe*. 30 Nabwaniti bokɔ eka mbi mɛnɛ: Nakasambedje ngɔngɔ dji eka ekabaleeni ibo, ko bosambedja bo mbi bodii na bosooti modjɔ mo natahombakadea bokɔ bopala bo mbi mɛnɛ, endelo bopala bo iyona olomani.»

31 «Ekada mbi nabali tati tina e mbi mɛnɛ, tati e mbi etadadea sooti. 32 Endelo edii wɛteko okina moto abale tati tina e mbi ko nadjebakadea bo tati iyena edii tina e mbi edii sooti. 33 Ino olomani bato ta dii Yoane, ko iyo abala tati ta bosooti*. 34 Nitakambakadea na tati e moto; endelo nabalakadea modjɔ momina oto bɛngi ino odaeni bahelake. 35 Yoane adaaka molinda imumu mobwanedjama bɛngi moenɛmedje ko ino bɛɛnɛ opalakani bosepa ehole ekɛkɛ na bohu bo nde. 36 Endelo adii mbi nadii na tati enɔi enɛnɛ bonɔ iyena e Yoane: mikɔ mokɔkɔdea mbi, edii oko imia mipani Sesa bɛngi bo namikokedje, minedjakadea tati e mbi ko minedjakadea bo Sesa alomani. 37 Ko Sesa iyoo mɛnɛ olomani abalakadea tati ta tina e mbi. Ino, opakinaokani moholi mo nde ko opakinaenɛni mbanda e nde. 38 Otabaneakadeani mibalo mi nde Ta tei e bino, modjɔ mo otadhimeakadeani iyona oloma iyo. 39 Ino oikoakadeani Makomi bopele modjɔ mo olɛdjɛkɛdeani bo odiadeani na mu bomɔ bo kɔbili: enakoboa Makomi mamina imo mɛnɛ mabalakadea tati ta tina e mbi*! 40 Tina emina, otapalakadeani bodoa ta dii mbi bɛngi bo odieni bomɔ.

41 «Mbi nitahombakadea ekumu ta dii bato. 42 Endelo mbi: nadjebakadea bo ta tei e bino oditini na bwela ta dii Ndjakomba. 43 Mbi nadoa ta tina e kombe e Sange mbi, ko ino olonakadeani boasɔnini. Endelo moto okina akadoa na kombe ende iyo mɛnɛ ena, omosɔɔdeani! 44 Ino opalini bodia ekumu ta dii bina nu ko otahombakadeani bodia ekumu ekadonge ta dii Ndjakomba iyo mɛnɛ; mondumba ndani mobwani na nu bodhimeanini? 45 Pɛpɛ bolɛdjɛdeani oko bo naopundandeani ta dii Sesa. Edii Mose moto opundadeani*, iyo moto oisa ino elɛndɛ. 46 Osodhimeani mɛnɛ Mose okɔki dhimeani mbi pongono modjɔ mo iyo akoma ta tina e mbi*. 47 Endelo ta mɛti na bo otadhimakadeani eka ekoma iyo, ndenge ndani edhimadea na nu mibalo mi mbi?»