1 Edaka na moto omɔti kombe e nde Nikodɛmɛ, iyo odaaka ta iputo di Bapalisai ko iyo adaaka omɔti o bakondji ba Bayudha.

2 Adoa na bulu adii Yesu ko abala na nde bo: «Molehi, lodjebakadea bo Ndjakomba aoloma bɛngi ololwɛe bileho; modjɔ mo moto omɔti abwaniti bokɔ bimbete dji bokamoa mondumba mokɔkɔdea wɛ Ndjakomba amiti daa na nde.» 3 Yesu amosɔmbedja bo: «Sooti mɛɛnɛ, naotɔndeakadea bo: moto abwaniti boɛnɛ Bokumu bo Ndjakomba amiti botama naikina.» 4 Nikodɛmɛ amowadja bo: «Ndenge ndani moto mopingamake abwani abotama naikina? Ndenge ndani ebwani na nde bosɔmbɔ ta sɔpɔ dji nango bɛngi abotame mbala ebabae?» 5 Yesu amosɔmbedja bo: «Sooti mɛnɛ, naotɔndeakadea bo: moto amiti botama na madiba ko na Mwembo atakwea ta Bokumu bo Ndjakomba. 6 Eka ebotami na mini edii mini; ko eka ebotami na Mwembo edii mwembo. 7 Pɛpɛ bokamwa tina e bo nabali nawɛ bo: "Etungi na nu bobotama naikina." 8 Mopɛpɛ mokakɔe pamba djisusu djikapale mo; okaoke ngilimo dji mu, endelo todjebe nongo pamba edongi mo kaoko pamba ekɛkɛdea imo. Indja eka ekakɔme adii iyona obwani bobotama na Mwembo mo Ndjakomba.» 9 Nikodɛmɛ amowadja naikina bo: «Modjɔ momina mobwani bokɔmɔ mondumba nda?» 10 Yesu amosɔmbedji bo: «Wɛ moto odii molehi o djebami ta Isalɛlɛ, otasipoakadea midjɔ mimina? 11 Sooti mɛnɛ, naotɔndeakadea bo: lobalakadea mɛko imii midjebadea iso, ko lobalakadea tati e midjɔ imia miɛnɛ iso, endelo otapalakadeani bodhima tati e biso. 12 Omiti dhimani ehole e babalakadea mbi na nu mɛko mi kpɔtɔ, ndenge ndani edhimabini na nu nakabala mɛko mi busa? 13 Pɛpɛ nongo moto omɔti oiwea ta busa, dongedja oko Mwana o moto iyoo otita ta busa! 14 Oko ndenge emangɔdjɔ Mose ekeko e ndjɔ ta edhu*, etungi na Mwana o moto angɔdjɔme oko mondumba momina momɔti, 15 bɛngi bo iyona obwani bomodhimea adie bomɔ bo kɔbili. 16 Modjɔ mo Ndjakomba apala ngondo na bonɔ aso apa Mwana onde omɔti, bɛngi bo iyona obwani bomodhimea adae pɛpɛ bobeha endelo adie bomɔ bo kɔbili. 17 Ndjakomba ailoma Mwana onde ta ngondo bɛngi bo aesambedje, endelo bɛngi ngondo ehele na ndjea ende. 18 Iyona omodhimei aditi mosambedjamake; ekahia iyona odai pɛpɛ bodhima asi bosambedjama ehele, modjɔ mo aidhima Mwana omɔti o Ndjakomba. 19 Indja mondumba mokɔmɔbi sambi emina: bohu bodoi ta ngondo, ko bato bapala modidi bonɔ bohu, modjɔ mo mikɔ mi bobo midii mibe. 20 Iyona okakɔe bobe akalone bohu, modjɔ mo akabange midjɔ mi nde mibe misaka imana ta bohu. 21 Endelo iyona okakɔe bosooti akaimane ta bohu, bɛngi bo baɛnɛ sooti bo mikɔ mi nde mibwani na bolulea bo Ndjakomba.»

22 Ngɔngɔ djimina, Yesu akɛɛ na batingami bande ta Yudhea. Iho adikamaka nabu baa masu, ko abatisaka*. 23 Yoane pongono abatisaka, ta Enoni mbuti na Salimi*, modjɔ mo iho madiba madaaka manɛnɛ. Bato bakɛkɛ ta dii iyo ko ababatisaka. 24 Modjɔ mo, Yoane aipetaka isama ta bɔlɔkɔ*. 25 Enakoboa, ndambo emɔti e batingami ba Yoane batubana na Moyudha omɔti ta momɛsɛno mo bobo mo bosasɛnodja. 26 Bakɛɛ atanea Yoane ko bamotɔndea bo: «Molehi, obwani bodjeba moto iyona odaki nawɛ ta ngunda ekina e Yɔlɔdane, iyona otɔndɔkɔbi wɛ tati ende? Edɛdie koko, iyo abatisakadea ko bato basusu bakɛkɛdea amoindja!» 27 Yoane abasombedja bo: «Moto omɔti abwaniti bokɔɔ eka emɔti emiti daa Ndjakomba amopɛ. 28 Ino bɛnɛ obwani bobala tati bo nabala bo: "Mbi naditi Masiya, endelo nalomama boso bonde*." 29 Iyo odii ondingo moomi iyona obolodji mwali; endelo mwange moomi akadae seko mbuti na nde ko amohokamedja, iyo akadae seko na mongandi mo booka kɔpi e moomi. Mongandi modii wɛteko mo mbi, ko edɛdiyeye modii mosusu. 30 Etungi gala e nde enangane, ko e mbi etite.»

31 «Moto iyo adongi ta busa anɔi basusu; iyo odii ta kpɔtɔ adii o kpɔtɔ ko akabale midjɔ mi kpɔtɔ. Iyo adongi ta busa [adii ta diko di bato basusu]; 32 abalakadea tati e midjɔ miɛnɛ iyo ko mioka iyo ko pɛpɛ nongo moto omɔti odhima tati e nde. 33 Iyo oasɔi tati e nde, adhimedji bo Ndjakomba akabale sooti. 34 Iyo oloma Ndjakomba akabale mɛko mi Ndjakomba, modjɔ mo Ndjakomba amolumedja na Mwembo mo nde mosusu. 35 Sange moto apala Mwana ko apa misusu amɔmɔ ma nde. 36 Iyo odhimei Mwana adii na bomɔ bo kɔbili; iyona odai pɛpɛ bodhimea Mwana adiiti na bomɔ bomina, endelo kɛlɛ e Ndjakomba edaabi ta diko di nde.»