1 Masu masamano boso bo Pasika, Yesu aimea ta Betania*, esika edaka Ladjalo, moto iyo osisodjaka iyo ta bogwa. 2 Iho, Malata amopaka mia. Ladjalo adaaka omɔti ta tei e bato ibia badaaka na Yesu ta mesa. 3 Iboa Malia atomba mboka e molangi mo malasi ma motswiya monɛnɛ, makɔɔmɔ na nale epele ko amasuoa ta mako ma Yesu, ngɔngɔ amahakoa na swe dji nde*. Ndako esusu eluma na so e malasi. 4 Iboa, omɔti o batingami ba nde na kombe e Yudhasi Isikaliote, iyona omokabadea, abala bo: 5 «Tina edai na wɛ pɛpɛ botɛkɛ malasi mamina na pata dji palanga mikama misato bɛngi bo bapɛ na bakwali nda?» 6 Aibalaka iboa modjɔ mo adaaka na ndjokwa na bakwali, endelo abala ndenge emina modjɔ mo adaaka moibi: adaaka mobanei o ibenga di palanga ko atombaka eka eisaka bo ena. 7 Endelo Yesu abala bo: «Kinani bomotungea! Akɔi iboa tina e bobwana na busa boisabinibo ta ikila. 8 Odabini na bakwali ta ndanda e bino masu masusu*, endelo mbi, otadabini na mbi masu masusu.»

9 Emumu enɛnɛ e Bayudha eoka bo Yesu adaaka ta Betania. Baikɛkɛ iho oto elɔkɔ e Yesu, endelo bakɛɛ pongono bɛngi baɛnɛ Ladjalo iyoo osisodja Yesu ta yogo. 10 Banganga ba Ndjakomba banɛnɛnɛnɛ batomba meko e boowa pongono Ladjalo, 11 modjɔ mo Bayudha banɛnɛ babakinaka ta tina e nde ko badhimeaka Yesu.

12 Ngɔngɔ dji busa bomɔti, emumu e bato banɛnɛ ibibi badoaka ta tɛkɛ e Pasika, eoka bo Yesu aimeaka ta Yelusalɛmɛ. 13 Ibo basusu batombaka magbangu ma mabia ko baimana ta ngando enɛnɛ bɛngi bakɛe asongana na nde; bagamaka bo: «Odjana! Adjongoame moto iyona okɛkɛdea adoe ta kombe e Kumu! Adjongoame iyo odii mokondji o Isalɛlɛ*!» 14 Yesu atanea mwana o tito okabee bo ane ko akondaka diko di nde oko mondumba mo balakadea Makomi:

15 «Pɛpɛ bobanga oko, ngando enɛnɛ e Siona!

Indja, mokondji o wɛ adoi,

abaki ta diko di mwana o tito okabee bo ane*.»

16 Boso mɛnɛ, batingami ba nde baisipoaka mikɔ mi nde; ndelo ebolodja Yesu ekumu, batingami badoalɛdjɛ bo Makomi matɔndɔkɔ modjɔ momina ta tina e nde ko eka ebalaka Makomi tina e nde ekokedjamaka.

17 Bato basusu ibia badaaka na Yesu ta ehole ebeaka yo Ladjalo aimane ta ikila ko iyana amoimanedja iyo ta tei e bato bago, batubanaka midjɔ miɛnɛ ibo. 18 Ta tina emina, emumu e bato edoa asongana na nde: bato baokaka akɔkɔ embete iyena e bokamodja. 19 Iboa Bapalisai basabaleana ta tei e bobo: «Oɛnɛkɛdeani obwanitini bokɔ eka emɔti: moto mosusu atingami ngɔngɔ dji nde!»

20 Ndambo e Bagɛlɛki* badaaka ta tei e bato ibia badoaka akumea Ndjakomba ta Yelusalɛmɛ ta ehole e tɛkɛ. 21 Basabatea mbuti na Pilipo, moto o Betesaida ta Galileya, ko babala na nde bo: «Moomi, lodii na posa e boɛnɛ Yesu.» 22 Pilipo akɛɛ atondea Andele modjɔ momina, ngɔngɔ djimina ibo basusu babae bakɛɛ atɔndea Yesu modjɔ momina. 23 Yesu abasɔmbedja bo: «Ngonga ebwani esi boimea e bonie Mwana o moto abolodje ekumu. 24 Sooti mɛnɛ, naotɔndeakadeani bo: mbuma emɔti e ble ekadikame oko mbuma emɔti emiti kwa ta kpɔtɔ ko emiti gwa. Endelo ekagwa, edii bobota mbuma djinɛnɛ. 25 Iyona okapale bomɔ bo nde mɛnɛ amobungedjadea, endelo iyona opali bobungedja bomɔ bo nde iya ta ngondo iye abolodjadea bomɔ bo kɔbili*. 26 Moto akapala bosaleani, asuseni; iboa, mosali o mbi adadea iya ta esika edii mbi. Sesa akumedjadea moto iyona osaleakadeani.»

27 «Edɛdiye molema mo mbi motungeamakadea. Ko nabale bo? Sesa, otatingoani ta ehole iyee e saya? Endelo nadoa sooti mɛnɛ oko bɛngi naɛnɛ saya emina. 28 Sesa, pa ekumu ta kombe e wɛ!» Kɔpi emɔti edonga ta busa ebala bo: «Nasia bo ekumedja ehele ko naekumedjadea naikina.» 29 Emumu e bato edaka ena ko eoka kɔpi emina ebabalaka bo: «Yena edaka wɛtoko mogbulumo mo kake!» Bakina babalaka bo: «Andjelu amobalei!» 30 Endelo Yesu abasɔmbedja bo: «Kɔpi emina eokamiti tina e mbi, endelo edii tina e bino. 31 Edɛdiye edii ehole e bosambedja ngondo iye; edɛdiyeye, mokondji o ngondo bamobenganadea. 32 Ko mbi, ehole eangɔdjɔbini bo ta kpɔtɔ*, natubabi bato basusu ta dii mbi.» 33 Ta mibalo mimina, Yesu ainedjaka mondumba mo yogo egwabi yo. 34 Emumu e bato bamosɔmbedja bo: «Lookaka ta Mobeko bo Masiya adikamabi kɔbili. Iboa, ndenge ndani ebwani wɛ bobala bo Mwana o moto atungi boiweama? Mwana omina o moto oni?» 35 Yesu abasɔmbedja bo: «Bohu bodii oko ta ndanda e bino, endelo tina e moo ehole mokɛkɛ. Medalani ta ehole iye edii ino na bohu, bɛngi bo modidi modae pɛpɛ boimaneani, modjɔ mo moto iyona odalakadea ta modidi tadjebe esika ekɛkɛdea iyo akɛe. 36 Dhimeani bohu ta ehole edii ino na bu, bɛngi oimeeni bato ba bohu.»

Ngɔngɔ dji bobala iboa, Yesu akɛɛ ko abolama bohali na bu. 37 Nongo akɔɔ iyo bimbete bi bokamodja binɛnɛ ta boso bo bobo, baimodhimeaka. 38 Oko iboa eka ebala motɛli Isaya ekokedjami:

«Kumu, omina odhimea bwɛndi bo biso nda?

Omina oinedja Kumu ebɔ ende nda*?»

39 Isaya abala pongono bo tina ndani bato ibi baihɔnɔ bodhima bo:

40 «Adipa miso ma bobo,

apingedja milema mi bobo,

bɛngi bo miso ma bobo madae pɛpɛ boɛnɛ,

ko milema mi bobo midae pɛpɛ bosipoa.

Ko indja tina ndani, bata hombedjakadea milema ta dii mbi

bɛngi bo nabaheledje*.»

41 Isaya abala iboa modjɔ mo aɛnɛ ekumu e Yesu ko abalak tina e nde.

42 Ekahia, ta tei e bakondji ba Bayudha ibo bɛɛnɛ, banɛnɛ badhimea Yesu. Endelo, ta tina e Bapalisai, basabombaka, basakaababengana ta ndako e miɔngɔnɔ e Bayudha*. 43 Bapalaka ekumu edongi ta dii bato endelo te iyena edongi ta dii Ndjakomba.

44 Yesu agama bo: «Moto iyona odhimeini, ta bosooti adhimeitini, endelo adhimei iyona olomani. 45 Moto iyona oɛnini, aɛni iyona olomani. 46 Mbi, nadoa ta ngondo olongo bohu, bɛngi bo iyona obwani bodhimeani adae pɛpɛ bodikama ta modidi. 47 Moto omɔti akaoka mibalo mi mbi ko adai pɛpɛ bomiisa ta mosala, mbi nitamotitedjadea na ikambo, modjɔ mo nadoa ta tina e boheledja ngondo endelo te ta tina e boedumba na ikambo. 48 Moto akalonani, ko adhimiti mibalo mi mbi adii bodia ena eka ndani edii bomodumba na ikambo: edii bileho bipa mbi bimodumbabi na ikambo ta busa bo suka. 49 Modjɔ mo nabaliti na bopala bo mbi mɛnɛ, endelo Sesa olomani iyo mɛnɛ apani eka ebwani na mbi bobala ko boleha. 50 ko mbi nadjebakadea bo: mibeko mi nde mikapɛ bomɔ bo kɔbili. Oko boa midjɔ imimi mibakadea mbi, namibalakadea oko mondumba molomani Sesa.»