1 Iboa Pilato apa ndjea bo batombe Yesu ko bamokɛsɛkɛke mbalake. 2 Basoda bayoa isuku di ndjubɛ ko baloadja Yesu ta molo ko bamoloadja pongono mokoto mokpetu. 3 Babatamaka mbuti na nde ko babalaka bo: «Mokondji o Bayudha bwandae!» Ko bamobomaka bipapata. 4 Pilato aimana naikina ko abala na Bayudha bo: «Hokamedjani naolwɛkɛdeani moto omina iyaya osokolu bɛngi odjebeni bo mbi naɛniti nongo modjɔ mɔti mobwani bomotitedja na ikambo.» 5 Iboa Yesu aimana; alwaka isuku di ndjubɛ ko na mokoto mokpetu. Ko Pilato abala na bu bo: «Moto omina iyona!» 6 Endelo ehole emoɛnɛ banganga ba Ndjakomba banɛnɛnɛnɛ ko na basindjili baso bagama bo: «Mobaka ta ekulusu! Mobaka ta ekulusu!» Pilato abasɔmbedja bo: «Kɛamobakeni ta ekulusu ino bɛɛnɛ, modjɔ mo mbi nitaɛnɛkɛdea modjɔ mɛɛnɛ mobwani bo motitedja ta ikambo.» 7 Bayudha bamosɔmbedja bo: «Iso lodii na mobeko momɔti, ko bobwana na mobeko momina etungi na nde bogwa, modjɔ mo asatukoa bo adii Mwana o Ndjakomba*.» 8 Ehole eoka Pilato mibalo mi mina aoka naikina bɔɔ na bonɔ. 9 Akwea naikina ta ndako e gupɛlɛnɛlɛ ko awadja Yesu bo: «Wɛ odongi djɔ?» Endelo Yesu aimosɔmbedja. 10 Pilato abala nande ibo: «Otapalakadea bosɔmbedjani? Otadjebaka bonie mbi nadii na bokondji bo botingoa ko pongono boobakedja ta ekulusu?» 11 Yesu amosɔmbedja bo: «Odiiti na bokondji bomɔti ta diko di mbi dongedja oko bokondji ibua bodongi ta busa. Na tina emina, moto osakabani tadii wɛ isumu di nde dinɔi di wɛ.» 12 Bobanga oko ta ehole emina, ahombaka mwɛngi mo botingoa Yesu. Endelo Bayudha babanga ogama bo: «Okatingoa moto omina, odiiti na ikina mwange Kaisala! Moto mosusu iyona osatukoakadea bo adii mokondji, adii moloni o Kaisala!» 13 Ehole eoka Pilato kɔpi djimina, aimanedja Yesu sokolu; adaa ta kiti ekataka iyo makambo e beyaka bo polo e anda bo mabanga bakaebee na monɔkɔ mo alameɛ* «Gabata». 14 Edaka busa bo Mosɛlingo mo Pasika, ta ehole e midi*. Pilato abala na Bayudha bo: «Indjani mokondji o bino iyo!» 15 Endelo ibo basusu bagama bo: «Agwɛ! Agwɛ! Mobakani ta ekulusu!» Pilato abala na bu ibo: «Nabakee mokondji o bino ta ekulusu?» Bakondji ba bonganga ba Ndjakomba basɔmbedja bo: «Iso lodiiti na okina mokondji, o biso omɔti oko Kaisala.» 16 Iboa Pilato abapa Yesu, bɛngi bamobake ta ekulusu.

Baso batomba Yesu. 17 Yesu atomba yo mɛnɛ ekulusu ende aimana ta ngando enɛnɛ akɛɛ ta esika ebeyaka bo na kombe e Gologota ta monɔkɔ mo alameɛ* esika e «Engɔngɔlɔ e molo». 18 Iyena edii esika e baka bo Yesu ta ekulusu. Oko ta ehole emina, babaka bakina bato baami babae ta ekulusu omɔti ngambo, okina ngambo ko Yesu iyo mɛnɛ adaaka ndanda. 19 Pilato apa pongono ndjea bakome ikomi dimɔti ko badibake ta ekulusu; ikomi dimina dibalaka bo: «Yesu o Nadjalɛtɛ, mokondji o Bayudha.» 20 Bayudha banɛnɛ balanga ikomi dimina, modjɔ mo esika ebakaka bo Yesu ta ekulusu edaka mbuti na ngando ɛnɛnɛ, ko ikomi dimina idaka na monɔkɔ mo Baebele, na latɛ ko na gɛlɛki. 21 Iboa banganga ba Ndjakomba banɛnɛnɛnɛ babala na Pilato bo: «Obwaniti bokoma "mokondji o Bayudha" endelo obwani bokoma wɛtoko bo: "Moto asasatukoa bo: Nadii mokondji o Bayudha."» 22 Pilato asɔmbedja bo: «Modjɔ mokomi mbi modikami oko mondumba mokomi mbi.»

23 Ehole esidja basoda bobaka Yesu ta ekulusu, batomba bisendja bi nde ko babikabana na mabondo manɛi, engi soda* na inde ibondo. Batomba naikina mokoto mo nde, mokoto momina moitongama na bipasa dji bisendja, motongamaka oto na esendja emɔti banga o diko mbunoko nase. 24 Basoda basasabaleana bo: «Lotalakadea mokoto imu, endelo lobome djeke bɛngi lodje moto omotombadea.» Ekɔmɔkɔ oko mondumba mokoma bo ta Makomi bo: «Bakabana bisendja bi mbi ko baboma mokoto mo mbi djeke*.» Basoda bakɔɔ oko iboa.

25 Indja bato baemaka mbuti na ekulusu e Yesu: Nange ende, mwange nango, Malia, mwali o Kolopasi ko na Malia o ngando e Magadala. 26 Yesu aɛnɛ nange ende ko na motingami opalaka iyo aemi mbuti na nango. Abala na nango bo: «Mwali, indja mwana o wɛ.» 27 Ngɔngɔ djimina abala na motingami omina bo: «Indja nange ewɛ.» Oko ta ehole emina, motingami omina amotomba ta dii iyo.

28 Ngɔngɔ djimina, abo Yesu adjebaka bo edɛdiyeye, midjɔ misusu midaka mikokedjamake, abala bɛngi akokedje Ikomi abala bo: «Naoki posa e madiba*.» 29 Edaaka na egbogolo emɔti ena elumake na vino e ngai*. Basodha badubea imbusu ta vino emina, bainanga ta sɔngɔ e etape e idjɔpe ko balinda mbuti na monɔkɔ mo Yesu. 30 Yesu amwaka mana ma ngai ngɔngɔ abala bo: «Modjɔ misusu mikokedjami!» Iboa adumba molo ko agwa.

31 Edaka busa bo Mosɛlingo* mo sabata, bakondji ba Bayudha baipalaka bibembe bidikame bibaki ta ekulusu mbunoko ta ehole e sabata, ta modjɔ mo bo sabata emina edaka na tɛtɔ enɛnɛ; iboa bawadja Pilato apɛ ndjea e bobuka mako ma bato babakamaka ta bikulusu* ko bobakoa bibembe dji bobo ta bikulusu. 32 Iboa basoda badoa, ababukaka mako ma moto o boso o baka bo ta ekulusu na Yesu pongono, ngɔngɔ djimina iyona o babae. 33 Ehole eimea bo ta dii Yesu batanea amasia bogwa ta tina emina baimobukaka mako. 34 Endelo soda omɔti ta tei e basoda amolusa mopandje na ikɔngɔ ko a mbuku makiya na madiba nakɛlɛ. 35 Moto iyona oɛnɛ midjɔ mimina amiɛnɛ, ko tati e nde edii sooti; iyo adjebakadea bo abalakadea bosooti. Atɔndeakadea tati emina bɛngi ino pongono odhimeni. 36 Na tina emina, mobalo mo Ikomi ididi mokokedjami: «Bamobuketebi nongo mokua momɔti*.» 37 Ko ta ikina Ikomi ibala bo: «Baindjabi moto iyona olusa bo mopandje*.»

38 Ngɔngɔ djimina Yosepu moto o ngando e Alimate awadja Pilato ndjea e botomba ebembe e Yesu. Yosepu adaaka motingami o Yesu ta mbombi modjɔ mo abangaka bakondji ba Bayudha ko Pilato aso amopa ndjea. Yosepu aso akɛɛ atomba ebembe e Yesu. 39 Nikodɛmɛ moto iyona okɛɛkɛ mbala emɔti ta dii Yesu na bulu, adoa pongono ko apeaka kilo dji malasi bokimana tuku djisato maputoanedja bo na mile ko na aloesi*. 40 Ibo basusu babae batomba ebembe e Yesu bahua na bipasa bi bisendja, basopea ebembe mosula mo malasi, bobwana na momɛsɛno mo Bayudha ehole ekapusee bo bibembe bi bobo. 41 Ta esika ebakaka bo Yesu ta ekulusu, gbie emɔti edaka ena, ko ta gbie emina ikila imɔti di yeene idaka ena ko baipaka pusea nongo moto omɔti. 42 A bo edaka ta busa bo Mosɛlingo* mo sabata* ko ikila dimina idaka mbuti, basambea Yesu ena.