1 Ngɔngɔ dji bobala iboa, Yesu angɔdjɔ miso ta odiko ko aangɔnɔ bo: «Sesa, ehole eimei. Inedja ekumu e Mwana owɛ, bɛngi bo Mwana ainedje pongono ekumu e wɛ. 2 Omopa bokondji diko di bato basusu, bɛngi bo apɛ bomɔ bo kɔbili ta dii ibia bamopa wɛ. 3 Bomɔ bo kɔbili bodii wɛtoko bodjeba wɛ, Ndjakomba omɔti ko o sooti, ko bodjeba Yesu Kilito, iyona oloma wɛ. 4 Nainedja ekumu e wɛ ta kpɔtɔ; ko nasiedji mosala mopani wɛ nakɔe. 5 Iboa edɛdiyeye, Sesa, pani ta boso bo wɛ ekumu iyena edaka na mbi boso bo ngondo ekɔɔme*. 6 Nadjebedji kombe ewɛ ta dii bato ibia batomba wɛ ta ngondo mbunoko obapani. Badaaka bato ba wɛ, obapani ko basuma mobalo mo wɛ. 7 Edɛdiye mɛnɛ badjebi bo mɛko misusu miipani wɛ midonga ta dii wɛ, 8 modjɔ mo nabapa mibalo mipani wɛ, ko bamiasɔɔ. Badjeba bo mbi mɛnɛ nadonga ta dii wɛ ko badhima bo olomani.

9 «Naangɔnɔkɔ tina e bobo. Nitangɔnɔkɔdea tina e ngondo, endelo ta tina e ibia bapani wɛ, modjɔ mo badii ba wɛ. 10 Eka esusu e dii na mbi edii e wɛ ko eka esusu edii na wɛ edii e mbi; ko ekumu e mbi einedjami ta dii ibo. 11 Nadiiti naikina ta ngondo, endelo ibo badii ta ngondo; mbi nakɛkɛakɛe ta adii wɛ. Sesa o mosɛnɔke, babanea na kombe e wɛ, kombe epani wɛ, bɛngi badae omɔti ondingo mbi nasa wɛ ndenge edii mbi nasa wɛ omɔti. 12 Ehole edaka mbi na bu, nababaneaka oko na ngulu e kombe e wɛ, iyena epani wɛ. Nababaneaki ko pɛpɛ nongo omɔti o bobo obunga, dongedja oko iyona obwanaka na bobunga, bɛngi Ikomi ikokedjame. 13 Ko edɛdiyeye nakɛkɛdea ta dii wɛ. Nabalakadea iboa ta ehole iye edii mbi oko ta ngondo, bɛngi badie ta tei e bobo bɛnɛ mongandi mo mbi mosusu. 14 Mbi nabapi mobalo mo wɛ ko ngondo ebaokea swɛ, modjɔ mo badiiti bato ba ngondo oko ondingo mbi. 15 Nitaoangɔnɔkɔdea bɛngi bo obadongedjeni ta ngondo, endelo bɛngi obabanee badae pɛpɛ bokwa ta midjɔ Mibe*. 16 Badiiti bato ba ngondo, na mbi pongono nadiiti moto o ngondo. 17 Badjongoa baimee bato ba wɛ mɛnɛ, ta ndjea e bosooti; mobalo mo wɛ modii sooti. 18 Nabaloma ta ngondo oko mondumba moma wɛ lomani ta ngondo. 19 Nasapakadea ta dii wɛ tina e bobo, bɛngi ibo pongono badjongoame mɛnɛ na bosooti.

20 «Nataoangɔnɔkɔdea oto tina e bobo, endelo tina e bato ibia badhimeadeani pongono na ndjea e mobalo mo bobo. 21 Naoangɔnɔkɔdea bɛngi ibo basusu badae omɔti. Sesa, badae baputoanake na su, mondumba moputoana wɛ na ko mbi. Badae omɔti bɛngi ngondo edhime bo olomani. 22 Nabapi ekumu epani wɛ, bɛngi badae omɔti mondumba modii mbi na wɛ moto omɔti. 23 Mbi ta tei e bobo ko wɛ ta tei e mbi; iyena edii mwɛngi mobwani na bu bodaa mɛnɛ omɔti, bɛngi ngondo edjebe naikina bo olomani ko okabapale oko mondumba mokapaleni wɛ. 24 Sesa, obapani ko napalakadea bo badae na mbi engbanga iho ta dii mbi, bɛngi baɛnɛ ekumu e mbi, iyena epani wɛ modjɔ mo opalani boso bo ngondo ekɔɔme. 25 Sesa o bodju, ngondo eiodjeba, endelo mbi naodjeba ko bato ibi badjeba bo olomani. 26 Nasia bobadjebedja kombe e wɛ ko nabadjebedjadea naikina, bɛngi bo epaeli edii na wɛ ta dii mbi edae ta dii ibo ko bɛngi bo mbi mɛnɛ nadae ta tei e bobo.»