1 Ta ehole esidja Yesu bopa mitindo ta dii batingami ba nde doomi na babae, adonga iyana bɛngi akɛɛ aleha ko botɔndea Bwɛndi Bopele ta ngando djinɛnɛnɛnɛ dji bobo.

2 Enakoboa Yoane, ta bɔlɔkɔ, aokaka babala ta tina e mikɔ mi Kilito. Iboa aso aloma batingami ba nde 3 bawadje Yesu bo: «Ediwɛ Masiya okɛkɛdea adoe kaoko lotungi loambe moto okina?» 4 Yesu abasɔmbedja bo: «Kɛɛni atɔndea Yoane eka eoki ino ko eka eɛni ino: 5 bato ibibi baagwa miso basɔmbi boɛnɛ, bitumbɛ badalakadea, bato ba mabha basɛnɔkɔdea, bato ba matoi mago baokakadea, bato bago basisoakadea ko Bwɛndi Bopele botɔndeamakadea ta dii bakwali*. 6 Ko mongandi ta dii moto iyo odaabi pɛpɛ bodumba edhimeli e nde ta tina e mbi!»

7 Ta ehole eyana batingami ba Yoane, Yesu abanga bobala na emumu e bato ta tina e Yoane bo: «Eka ekɛkino aindja ta etengelenge nda? Mososongo mokumanaki na mopɛpɛ? 8 Iboa ekɛkino aindja nde? Moto omɔti alwaki bisendja bipele? Endelo bato bakalwae bisendja bipele bakadae ta ndako dji bakondji. 9 Ekɛkino aindja nde? Motɛli? Sooti, nabalakadea na nu, iyo anɔi motɛli. 10 Modjɔ mo ekomama ta tina e nde bo: "Nalomadea mwana o elomu o mbi boso bo wɛ, ta tina e bobɔngedja ndjea*." 11 Naotɔndeakadeani sooti mɛnɛ bo: ta tei e bato basusu ba botama na mwali, ediiti na moto omɔti onɔi Yoane Mobatisi; enikoboa, moto odii mokɛkɛ ta Bokumu bo busa amonɔi. 12 Banga ta ehole elehaka Yoane Mobatisi mbunoko busa ibubu, Bokumu bo busa boimea ikambo di boika molema ko edii oko bato ibia banakadea ta edhimeli badii bokwea iho. 13 Modjɔ mo batɛli basusu edae Mobeko ibo basusu batɛlɛ mbunoko ta ehole e Yoane. 14 Ko okapalani bosipoa, djebani bo Yoane adii Eliya iyo otungi adoe. 15 Yɛɛ bo iyona odii na matoi ma booka, aoke!

16 «Moto ndani obwani na mbi boɛngɛ na bato ba busa ibubu? Babwani na baana ibia badii ta esika e masaka manɛnɛ, ko badii badumbeana na bakina: 17 "Iso lobomeini mindulɛ mikɛkɛkɛkɛ ko obuitini! Loembeini ndjembo dji ilaka ko obakeitini mɔmɔ ta molo!" 18 Modjɔ mo, Yoane adoa, aiyakaka ko aimwakaka ko ebalama bo: "Adii na mwembo mobe!" 19 Mwana o moto adoa, ayaka ko amwaka babala na nde bo: "Indjani moto iyo akadjebe oto boyaka ko na bomwaka, iyo adii modjebani o baputedji ba puti ko na bato ba pekato!" Endelo konga e misala mi nde einedji bo adii bodju.»

20 Iboa Yesu abanga bodosa ngando dji nɛnɛnɛnɛ idjia djikɔmɔ midjɔ mi bokamoa, ta tina ebo baipalaka bosɔmbɔtɔnɔ milema: 21 «Ndjokwa e wɛ, Koladjini! Ndjokwa e wɛ Betesaida! Modjɔ mo midjɔ mi bokamoa misa kɔɔmɔ ta dii wɛ miso mikɔɔmɔ ta Tile ko ta Sidona, ka bato bakadikame iho basɔmbɔtɔnɔ milema* mi bobo banga ehele, ko babwanaki bodjinedja na bolwa bisendja bi pili ko na bosasua mihulu ta molo. 22 Ta tina emina nabalakadea na nu, ta busa bo sambi etumbu e bino enɔbi bopipo bonɔ Tile ko na Sidona. 23 Ko wɛ Kapalanaume, olɛdjɛkɛ bo oangɔdjɔmɔbi mbunoko ta busa? Otitedjamadea mbunoko ta ngando e bato bago. Modjɔ mo midjɔ mi bokamoa misa kɔɔmɔ ta dii wɛ miso mikɔɔmɔ ta Sɔdɔmɔ, ka ngando enɛnɛ emina edii mbunoko busa ibubu*. 24 Ta tina emina, naotɔndeakadea bo, ta busa bo Sambi etumbu e wɛ edaabi epipo bonɔɔ ekenge e mokili mo Sɔdɔmɔ.»

25 Oko ta ehole emina iyena, Yesu abala bo: «Oo Sesa, Kumu o busa na kpɔtɔ, naokumedjakadea ta tina e bo obomba midjɔ imimi ta dii bato ba bwanya ko na bato ba bowɛi ko omiinedji ta dii baana bakɛkɛkɛkɛ*. 26 Oko boa, Sesa ta tina e bo opala bo edaame oko iboa.

27 «Sesa apani leka losusu. Pɛpɛ moto okadjebe Mwana dongedja oko Sesa ko pɛpɛ moto okadjebe Sesa dongedja oko Mwana, ko iyona osepadea Mwana bomoinedja Sango.

28 «Doani ta dii mbi ino bato basusu baɛmbɛi na muna ko naopadeani iheme. 29 Tombani muna mo mbi molwani ko ikoani ta dii mbi modjɔ mo nadii na molema mo bwɛli ko bosatitadja, ko obolodjadeani iheme*. 30 Modjɔ mo muna mo mbi modii na mandi ko modii mopele ta bolwa.»