1 Ta ehole iyena, Yesu akatisa gbie dji mbuma dji ble ta busa bo sabata. Batingami ba nde badaaka ndja; babanga bobuka mihɔngbu mi ble ko bayaka*. 2 Ehole eɛnɛ Bapalisai modjɔ momina, babala na Yesu bo: «Indja batingami ba wɛ bakɔkɔdea midjɔ misiama ta busa bo sabata*!» 3 Endelo Yesu abasɔmbedja bo: «Oilangani eka ekɔɔ Dhapiti busa bomɔti iyo na bato badalaka na nde adaaka bo na ndja? 4 Akweya ta ndako e Ndjakomba, ko ayaka mapa imia mapamaka iyo na bato badalaka na nde; a bonie baipama ndjea e bomayaka dongedja oko banganga ba Ndjakomba*. 5 Kaoko na ikina, oilangani ta mibeko bo, ta busa bo sabata banganga ba Ndjakomba ibia bakasale ta tepelo te basume mobeko mo sabata, ko batakwaka na mobeko momina*? 6 Enakoboa naotɔndeakadeani bo, iya lodii na moto onɔi tepelo! 7 Oso sipoani eka epalaka kɔpi iyeye botingodja: "Mbi nakapale molema mo pɛhɛ bonɔɔ mbeka*", obwanakitini bopa etumbu ta dii bia badii pɛpɛ bodaa na modjɔ. 8 Modjɔ mo Mwana o moto adii Kumu o sabata.»

9 Yesu akina ena ko akɛɛ ta ndako e bobo e miɔngɔnɔ. 10 Edaka na moto omɔti ena adaaka na ebɔ ekatatake. Bapalisai bawadja Yesu bo: «Ebwani bopama ndjea bo baheledje moto ta busa bo sabata?» Iyena edaaka mondumba mo hombaka bo bamopunde. 11 Yesu abasɔmbedja bo: «Ekadaa omɔti ta tei e bino akadaa na bhata o nde omɔti ko bhata omina akakwa ta mombɔndɔ ta busa bo sabata, abwaniti bomodubodja? 12 Singandeloko moto onɔi bhata na motswiya! Iboa elomama bokɔɔ bopele ta busa bo sabata.» 13 Iboa abala na moto omina bo: «Ninodja ebɔ.» Aninodja ebɔ ko eimea bopele ondingo iyena ekina. 14 Bapalisai baimana ko baso bakɔɔ inginda bɛngi bahombe mondumba mo bomowa.

15 Endelo Yesu amayo djeba modjɔ momina, adonga ta esika emina ko bimumu bi bato banɛnɛ bamokimana. Aheledja bato ba bipeko basusu, 16 endelo abatuba matoi badae pɛpɛ botɔndea eka edii iyo. 17 Akɔɔ iboa bɛngi eka ebala motɛli Isaya ekokedjame:

18 «Indja mosali o mbi ohɔɔ mbi,

Mopalani o mbi ko iyoo nasepi na nde.

Naisabi Mwembo mo mbi ta dii iyo

ko atɔndeabi bodju ta dii bikomi.

19 Atanoanabi na bato ko atagamabi,

ko moto omɔti ataokabi nongo moholi mo nde ta ndjea djinɛnɛnɛnɛ.

20 Atabukabi mososongo moɛmbɛke mosia boimbama

ko atadimabi esendja e molinda mokaimedje mididi.

Mbunoko abolodje bodju bolongake;

21 Ko bikomi biisabi elɛndɛ ta kombe e nde*.»

22 Iboa balwɛɛ Yesu moto apeamaka na mwembo mobe adaaka na miso mago ko adaaka pongono emimi. Amoheledja, ta mondumba mo bo emimi aimea bobala ko na boɛnɛ. 23 Bimumu bi bato basusu bakamoa, ko babalaka bo: «Iyoo te Mwana o Dhapiti?» 24 Ta ehole eoka Bapalisai, babalaka bo: «Abenganakadea membo mibe na ngulu e Bɛlɛdjɛbule*, mokondji o membo mibe!» 25 Endelo Yesu asipoa malɛi ma bobo; iboa aso abala na bu bo: «Bokondji bosusu bokabotɔɔ ta tei e bu bɛnɛ bokabehe. Ko ngando enɛnɛ esusu ko na ndako esusu edii bato bayu pɛpɛ bookana ebwaniti bombimbima. 26 Ekadaa Satana abengani Satana, iyana aimei bosanedja iyo mɛnɛ; bokondji bo nde bobwani bombimbima ndenge nda? 27 Ko ekadaa bo mbi nabenganakadea membo mibe na ngulu e Bɛlɛdjɛbule; ko batingami ba bino babenganakabi na ngulu e nda? Ta tina emina ibo bɛɛnɛ badaabi ba djudji ba bino! 28 Endelo ekadaa bo mbi nabenganakadea membo mibe na Mwembo mo Ndjakomba, etingodjakadea bo Bokumu bo Ndjakomba boimei ta dii ino.

29 «Mondumba ndani mobwani moto bokwea ta ndako e moto o ngulu bɛngi akatoe leka lo nde amiti nanga moto omina mbɔti; endelo ngɔngɔ dji bomonanga mbɔti akatoadea leka losusu lo ndako e nde. 30 Moto odii pɛpɛ bodaa engbanga emɔti na mbi adii moloni o mbi; ko moto okadae pɛpɛ boputoanedja na mbi aka nangakake. 31 Ta tina emina naotɔndeakadeani sooti bo: pekato djisusu ko na masinga masusu makasinge bato Ndjakomba makutubanabi, endelo moto obwani bosinga Mwembo Mosɛnɔke abwaniti bodia ekutubanedji. 32 Moto obwani bobala bobe ta tina e Mwana o moto adiabi ekutubanedji; endelo moto obalabi bobe na Mwembo Mosɛnɔke atadiabi ekutubanedji edae ta ngondo iyeye, edae ta ngondo ekɛkɛdea adoe.»

33 «Mole mo pele, mokabote mbuma dji pele; mole mobe mokabote mbuma djibe. Modjɔ mo bakadjebe mole na mbuma dji mu. 34 Ibota di mimbitɔ! Obwanini bobala midjɔ mipele mondumba nda, abo odiini bato babe? Modjɔ mo mibalo mi moto mikainedje malɛi madii ta molema mo nde. 35 Moto mopele akabale midjɔ mipele mikadonge ta molema mo nde mopele; moto mobe akabale midjɔ mibe mikadonge ta molema mo nde mobe. 36 Naotɔndeakadeani bo: ta busa bo Sambi, bato basambabi na mibalo mi pɛpɛ sɔngi mi balaka ibo. 37 Modjɔ mo mibalo mi wɛ mɛnɛ mibwani bolongedja isa mibwani boodumba.»

38 Iboa bakina balehi ba mobeko ko na Bapalisai babala na Yesu bo: «Molehi, lopalakadea oloinedje embete emɔti.» 39 Abasɔmbedja bo: «Mbota ebe ko e bɔɔli ehombakadea embete, endelo bataopadeani embete ekina oko embete e motɛli Yona. 40 Modjɔ mo, abo Yona akɔɔ masu mayake ko na madipake masato ta sɔpɔ dji moswi* monɛnɛ, Mwana o moto pongono akɔɔdea masu mayake ko na madipake masato ta molema mo kpɔtɔ. 41 Ta busa bo Sambi, bato ba Niniwe baangɔbi ko bapabi bato ba mbota iyeye etumbu, modjɔ mo basɔmbɔtɔnɔ milema ta ehole eokabo eleho e Yona*. Enakoboa iyaya edii na Iyona onɔi Yona! 42 Ta busa bo Sambi, mokondji mwali o Satina apabi bato ba mbota iyeye etumbu, adonga ta suka suka e ngondo ta tina e bohokamedja konga e Sɔlɔmɔ*. Enakoboa iyaya edii na Iyona onɔi Sɔlɔmɔ!»

43 «Ta ehole ekaimane mwembo mo pita ta dii moto, mokakɛe apukane ta bitengelenge ahombe esika e iheme. Endelo te mobolodjake, 44 naboa akasabalee bo: "Nasɔmbe ta ndako e mbi, iyena ekinakabi mbi." Ta ehole eimeadea iyo ko aetanei pɛpɛ eka otei, baambɔ, ko ebɔngedjami bopele. 45 Iboa akɛdea atomba membo mibe mikina sambo mimonɔi na bobe; bakweadea ena ko badikamadea. Mondumba mo moto iyona moimeadea mobe bonɔ modaki iyo boso. Ko edabi oko mondumba momina momɔti ta tina mbota iyeye ebe e busa ibubu.»

46 Iyana abalaka Yesu naikina na bimumu, nango ko baangi i nde baemaka sokolu bahombaka mwɛngi mo bosola na nde. 47 Moto omɔti abala na nde bo: «Ngwao na baana ba ngwao ba baami badii sokolu ko bakambakadea basole na wɛ*.» 48 Endelo asɔmbedja moto iyona obalaka na nde bo: «Odii nange o mbi nda ko baangi i mbi banda?» 49 Iboa aninodja ebɔ ta dii batingami ba nde ko abala bo: «Indja nange o mbi ko bangi i mbi. 50 Modjɔ mo moto mosusu okakɔe bolulea bo Sesa iyona odii ta busa edii iyo moto odii mwange o mbi, ngɛnɛ o mbi ko nange o mbi.»