1 Ta ehole eɛnɛ Yesu bimumu bi bato, aso aiweya ta diko di ngomba ko aso adaa na mobondo. Batingami ba nde basalinda mbuti na nde 2 Iboa aso abanga bobaleha bo:

3 «Mongandi ta dii bakwali ba mwembo,

modjɔ mo Bokumu bo busa bodii bo bobo!

4 Mongandi ta dii ibia bayeakadea,

modjɔ mo badaadea bagɔmbedjamake!

5 Mongandi ta dii ibia badii na milema mititatake,

modjɔ mo basangoabi kpɔtɔ!

6 Mongandi ta dii ibia badii na ndja ko na posa e bodju,

modjɔ mo bagolabi!

7 Mongandi ta dii ibia badii na pɛhɛ,

modjɔ mo badiabi pɛhɛ!

8 Mongandi ta dii ibia badii na molema mosɛnɔke,

modjɔ mo baɛnɛbi Ndjakomba!

9 Mongandi ta dii ibia bakahombe bogo,

modjɔ mo babeamabi baana ba Ndjakomba!

10 Mongandi ta dii ibia banɔngɔmɔkɔdea ta tina e bodju,

modjɔ mo Bokumu bo busa bodii bo bobo!

11 Mongandi tadii ino ta ehole eosingakadeani bo, baonɔngedjakadeani ko babalakadea na nu bobe ta mindumba misusu ta tina e mbi. 12 Sepani ko daani na mongandi, modjɔ mo iputi i bino idadea inɛnɛ ta busa. Edii oko mondumba momina momɔti monɔngedjabo batɛli banɔɔ boso bo bino*.»

13 «Ino bato badii monana mo ngondo. Endelo monana mokasia edjɛ e mu, babwani bosɔmbedja edjɛ emina mondumba nda? Etungi oko bamodumbe sokolu ko bamodalakake na mako.

14 «Ino odiini bohu bo ngondo. Ngando enɛnɛ iyena ebaki ta diko di ngomba ebwaniti bobolama. 15 Tebabwanedjake molinda bɛngi bamoise ta nase dji poke, endelo bakamobakee ta ebakeli e mu, ko bɛngi moinedje bohu tadii bato basusu ibia badii ta tei e ndako 16 Ta tina emina, yɛɛ bo bohu bo bino bongɛse ta boso bo bato, bɛngi bo baɛnɛ mikɔ mi bino mipele ko bakumedje Sangwanu odii ta busa.»

17 «Pɛpɛ bolɛdjɛni bo mbi nadoa ta tina e bodongedja Mobeko kaoko bileho bi batɛli. Naidoa amodongedja endelo akokedja. 18 Modjɔ mo naotɔndeakadeani sooti mɛnɛ bo: boso bo diko na kpɔtɔ bodimoa pɛpɛ nongo itɔnɔ imɔti ta makomi kaoko molɔngɔ momɔti mobwani bohakoama ta mobeko, mbunoko midjɔ misusu mikokedjame 19 Ta tina emina, moto iyona odabi pɛpɛ bosuma nongo elomu emɔti enɔi na bokɛkɛ ko alehi bato bakina bakɔe boa, adaabi moto o pɛpɛ tɛtɔ ta Bokumu bo busa. Endelo iyona osumabi ko olehabi bato bakina bakɔe boa bamoimedjabi monɛnɛ ta Bokumu bo busa. 20 Modjɔ mo, nabalakadea na nu bo: bodju bo bino bomiti nɔɔ ibua bo balehi ba mobeko ko na Bapalisai otakweabini ta Bokumu bo busa.»

21 «Ookani ebalama na bakɔkɔ bo: "Otaowabi moto*; moto mosusu obwani boowa moto atungi asambedjame." 22 Endelo mbi naotɔndeakadeani sooti bo: moto mosusu obwani bokangea mina nde kɛlɛ atungi bosambedjama; moto iyona osingadea mina nde: "Endanga!" Asambedjamadea ta boso bo Ikita dinɛnɛ; iyona obaladea na mina nde bo: "Moto o igboma!" Adumbamadea ta mosa mo ipelu. 23 Ekadaa bo okapa ibondja di wɛ ta etumbelo, ko iho okalɛnɛ bo odii na modjɔ na mwangwao, 24 kina ibondja di wɛ ta boso bo etumbelo, ko pete kɛɛ boso abɔngedja na mwangwao, ngɔngɔ djimina oso odoe apa ibondja di wɛ.

25 «Okadaa na modjɔ na moloni o wɛ, bɔngedja pɛpɛlɛ mɛnɛ na moto odii na wɛ na modjɔ ta ehole edii ino oko na ndjea. Esakadaa bo aopunde ta dii ba djudji basakaoimedja ta dii mbulu bahindo ko basakaoisa ta bɔlɔkɔ. 26 Naotɔndeakadea sooti mɛnɛ bo: Otaimanadea iyana omiti puta nyongo e wɛ mbunoko ta pata e palanga e suka.»

27 «Ookani babala bo: "Otakɔkɔɔbini bɔɔli*." 28 Endelo mbi, nabalakadea na nu bo: Moomi mosusu omungoi mwali akɔi na nde bɔɔli ehele ta molema mo nde. 29 Ekadaa diiso di wɛ di ebɔ e baami di olomakadea ta pekato, didongedja ko di dumba bohali na wɛ: modjɔ mo edii bopele otake nongo e nama ewɛ emɔti e mokuku ka te bo mokuku mosusu mo wɛ modumbame ta ipelu. 30 Ekadaa bo ebɔ e wɛ e baami eolomakadea ta pekato, elena ko edumba bohali na wɛ: modjɔ mo edii bopele ta tina e wɛ botaka enama e wɛ emɔti e mokuku endelo te bokɛɛ mokuku mosusu ta ipelu.»

31 «Ebalama pongono bo: "Moomi odongedji mwali o nde amopɛ mokanda mo bobɔtɔ*." 32 Endelo mbi, naotɔndeakadeani sooti bo: moomi mosusu odongedji mwali o nde, dongedja oko akamodia na modjɔ motingi na bɔɔli adjebe bo*, amodipoi ndjea e bokɔɔ bɔɔli, ko moomi iyona oasɔi mwali odongedji bo ta moki akɔi pongono bɔɔli.»

33 «Ookani pongono ebalama ta dii bakɔkɔ bo: "Pɛpɛ bokata seleka e bokuta, endelo kokedja ndikano e dikanedja wɛ na ndjea e seleka ta boso bo Kumu*." 34 Endelo, mbi nabalakadea na nu odaeni pɛpɛ bokata nongo seleka e mɔti: edae ta kombe e busa, ta tina ebo busa bodii kiti e bokumu bo Ndjakomba; 35 edae ta kombe e kpɔtɔ, ta tina ebo kpɔtɔ djidii esika ebakeli e mako ma nde, edae ta kombe e Yelusalɛmɛ elɔkɔ ebo edii ngando enɛnɛ e Mokondji o monɛnɛ. 36 Pɛpɛ bokata nongo seleka ta molo mo wɛ mɛnɛ, modjɔ mo obwaniti boimedja moswee mo wɛ momɔti mombwi isa bomoimedja mohindo. 37 Yɛɛ bo, modhimo mo wɛ modae "modhimo", ko ngasa edikame oko "ngasa", modjɔ mo mobalo mosusu mobwani bobakeama modongi ta dii Mokosi.»

38 «Ookani ebalama bo: "Diiso tina e diiso ko diino tina e diino*". 39 Endelo, mbi nabali na nu bo pɛpɛ bobukanedjani bobe ta dii moto o bobila. Moto akaoboma epapata ta mobanga mo baami, mopa pongono mobanga mo bali. 40 Moto akapala aopunde ta dii badjudji tina e botomba simisi e wɛ, mopa pongono mokoto mo wɛ. 41 Ekadaa bo moto aolomi na ngulu odale kilomɛtɛlɛ emɔti bodala engbanga emɔti na nde kilomɛtɛlɛ ibae. 42 Pa eka ta dii moto oowadjakadea; pɛpɛ bodaa na molema mopipo ta dii moto iyona opalakadea bobeka eka ta dii wɛ.»

43 «Ookani ebalama bo: "Pala mina wɛ* ko lona moloni o wɛ." 44 Endelo, mbi naotɔndeakadeani sooti bo: Palani baloni ba bino ko angɔnɔni ta tina e bato ibia bakaonɔngedjeni. 45 Na boa odadeani baana ba Sangwanu iyona odii ta busa. Modjɔ mo akayedje busa ta tina e bato bapele ko na babe, ko akadumbe mbua ta tina e bato ba bodju ko na ibia ba taka e bodju. 46 Modjɔ mo okapalani ibia bakaopaleni tɛtɔ mɛnɛ ebolodjadea ino nda? Baputedji ba puti te bakɔe pongono iboa! 47 Ko okaiseanani oto na denga di bino, modjɔ mo bokamwa mɛnɛ mokɔi ino nda? Bato badii pɛpɛ bodaa Bayudha te bakɔe ibo bɛnɛ pongono iboa! 48 Naboa, odaadeani bato babwanake, oko mondumba modii Sangwanu odii ta busa*.»