1 Ta busa ibua, Yesu aimana ta ndako* ko adaa ta mokula mo ibeke. 2 Bimumu bi bato biputoana mbuti na nde, Yesu atitea ta bwato ko adaa na mobondo ta bwato o tei. Iyana bato basusu baema ongondo. 3 Abala na bu bobuke mɛnɛ na bikuanedji bo: «Moaneli omɔti akɛkɛ ta tina e boana. 4 Ta ehole eanaka iyo, mbuma djikwaka ta mokpɛngɔ mo ndjea: mbulu ba diko badoa ko badjikoma djisusu. 5 Djikina djikwaka ta diko di ndeke ta esika e pɛpɛ kpɔtɔ djinɛnɛ. Djibota na mbala emɔti ta tina ebo mokpɔtɔ momina moidaaka mo mbɛngɛ. 6 Endelo ta ehole eimana moi, moboma na ngulu ko djikakana ta tina e bo djiidaka na nginga. 7 Djikina djikwa ta esika e ndjubɛ. Ndjubɛ djikandoa ko djimbambamedja mbuma. 8 Djikina djikwa ta kpɔtɔ dji pele ko djibota mbuma dji pele: djikina djibota mbuma mokama, djikina tuku djisamano ko djikina tuku djisato.» 9 Ko Yesu abala naikina bo: «Yɛɛ bo iyona odii na matoi aoke!»

10 Batingami babatama mbuti na Yesu ko baso bamowadja bo: «Tina ndani obalakadea na bu na bikuanedji?» 11 Abasɔmbedja bo: «Edii tina e bo ino obolodjani midjɔ mi mbombi mi Bokumu bo busa midii tina e bino, endelo eipama na bu. 12 Modjɔ mo bapaadea ta dii moto iyona odii na eka ko aimeadea na leka lonɛnɛ; endelo ta dii moto iyona odii pɛpɛ eka bamokatoadea nongo eka epeli yo. 13 Indjani tina ebabaleakadea mbi na bikuanedji: ta tina e bo baindjakadea ko bataɛnɛkɛdea, baokakadea ko batasipoakadea. 14 Naboa mobalo mo motɛli Isaya mokokedjame ta tina e bobo bo:

"Okadeani bopele, endelo otasipoadeani;

oindjadeani bopele, endelo otaɛnɛdeani.

15 Modjɔ mo milema mi bato ibibi midii mipipo;

baditei matoi ma bobo,

ko badipi miso,

bɛngi badae pɛpɛ boɛnɛ na miso ma bobo,

ko matoi ma bobo madae pɛpɛ booka,

milema mi bobo midae pɛpɛ bosipoa

ko iboa bahombedje milema, bɛngi nabaheledje*."

16 «Endelo ino, odiini bato ba mongandi: ta tina e bo miso ma bino maɛnɛkɛdea ko matoi ma bino maokakadea! 17 Naotɔndeakadeani sooti mɛnɛ bo: batɛli banɛnɛ ko na bato ba bodju bahombaka baɛnɛ eka iyeye eɛnɛkɛdea ino endelo baɛniti, bahombaki baoke eka iyeye eokakadea ino ko baeokiti*.»

18 «Hokamedjani eka epalakadea botingodja ekuanedji e moaneli. 19 Ta ehole eoki moto mobalo mo Bokumu ko asipoiti: Mokosi akadoe adongedja eka eanamaki ta tei e molema mo moto omina. Iyo adii ondingo kona iyena ekwa ta mokpɛngɔ mo ndjea. 20 Iyona oana mbuma ta mokpɔtɔ mo ndeke: edii moto iyo ooki Mobalo ko amoasɔi mbala emɔti na mongandi. 21 Endelo djidiiti na nginga ta tei edju, dji dii oko moo ehole mokɛkɛ. Ta ehole e bomekama kaoko minɔngɔ ta tina e Mobalo asundoli mbala e mɔti edhimeli e nde. 22 Iyona oana mbuma ta esika e ndjubɛ: edii wɛtoko moto iyoo ooki Mobalo, endelo posa djibe dji ngondo na bokoso bo madieli bombambamedji Mobalo ta tei e nde iboa mbuma idjia ibwaniti bobota naikina. 23 Iyona oana mbuma ta kpɔtɔ djipele: wɛtoko moto iyoo ooki Mobalo ko amosipoi; abotadea mbuma ko ekina eboti mokama, ekina eboti tuku djisamano, ekina eboti tuku djisato.»

24 Yesu abatɔndea ekuanedji ekina bo: «Bokumu bo busa bokuani na moto iyoo oanaka kona dji pele ta gbie e nde. 25 Na bulu, moloni o nde akɛɛ ana mondjani mobe ta ndanda e ble ko aso anɔɔ. 26 Ta ehole ekandoa kona e ble ko eboti mihɔngbu, mondjani mobe pongono motɔɔ. 27 Basali ba moswa gbie bakɛɛ abala na nde bo: "Kumu, wɛ oiana kona dji pele ta gbie e wɛ? Adongaka ndjani idjidji djibe djɔ?" 28 Abasɔmbedja bo: "Edii moloni moto odjiani." Iboa basali baso bamowadja bo: "Obwani bopala bo lokɛe adjibikoa?" 29 Asɔmbedja bo: "Ngasa, pɛpɛ bokɛni oko ta tina ebo ta ehole edongedjadea ino ndjani djibe osaka bikoani pongono ble. 30 Kinani djisusu djikandoe polo emɔti mbunoko ta ehole e bobuka ko ta ehole emina iyena nabaladea na babuki ba mbuma bo: Dongedjani boso mɛnɛ ndjani djibe djinangani kata bɛngi odjitumbeni, ngɔngɔ djimina obukeni ble odjiseni ta esika e mbombi."»

31 Yesu abatubanea ekuanedji ekina bo: «Bokumu bo busa bokuani na mbuma e mutalade etomba moto omɔti ko aso aana ta gbie e nde. 32 Edii kona emɔti enɔi bokɛkɛ ta tei e kona djisusu; endelo ta ehole ekandoi iyo, eimeadea kona enɛnɛ bonɔ kona djikina ta tei e gbie: eimeadea mole, ta mɛti na bo mbulu ba diko badoadea akɔɔ moopo ma bobo ta tape dji mu.»

33 Yesu abatubanea ekuanedji ekina bo: «Bokumu bo busa bokuani na bole bo mapa ibubu bokabeebo levile, bokatombe mwali omɔti ko aisi ta kilo dji paline tuku djibae na itano, mbunoko anila o mapa mosusu ahaloe.»

34 Yesu abalaka na bimumu bi bato midjɔ imia misusu na bikuanedji; ehole ebalaka iyo na bu aitakaka bobabalea na bikuanedji. 35 Akɔɔkɔ iboa bɛngi bo eka ebala motɛli ekokedjame:

«Natombadea kɔpi bɛngi na babalehe na bikuanedji,

naotɔndeadeani midjɔ mi mbombi banga ta bokɔɔmɔ bo ngondo*.»

36 Iboa Yesu akina bimumu bi bato ko akwea ta ndako. Batingami ba nde bakɛɛ amowadja bo: «Lotingodja ekuanedji e mondjani mobe ta gbie.» 37 Abasɔmbedja bo: «Moto okaane kona epele, edii Mwana o moto; 38 gbie edii wɛtoko ngondo; kona epele edii baana ba Bokumu bo busa; mondjani mobe edii wɛtoko baana ba Mokosi; 39 moloni oani edii djabulu; ehole e bobuka edii wɛtoko suka e ngondo; babuki ba mbuma, edii wɛtoko babwɛndi. 40 Iboa, oko mondumba modongedjakadea bo ndjani djibe ta tina e bodjidumba ta mosa, oko mondumba momina momɔti modaabi ta suka e ngondo. 41 Mwana o moto alomabi babwɛndi ba nde badongedjabi ta tei e Bokumu bo nde eka esusu ekalome bato bakina bakɔe pekato ko na bato bakakɔe mabe, 42 ko abadumbabi ta ibonge di mosa mopipo; iho edakabi oto biyo ko na bokpɛkɛnɛ miino. 43 Iboa bato ba bodju bangɛsɛbi ondingo modaakabusa ta Bokumu bo Sangwabu*. Yɛɛ bo iyona odii na matoi aoke!»

44 «Bokumu bo busa bokuani na bodieli bobolama ta gbie. Moto o sa tɔngɔlɔ bodieli bomina abobombadea naikina. Na mongandi momina akɛɛdea atɛkɛ leka losusu lodaaka na nde bɛngi asombe gbie emina.

45 «Bokumu bo busa bokuani na ikina na moto o mombongu okahombe mayaka ma motswiya mapele. 46 Ta ehole etanei iyo iyaka di motswiya monɛnɛ, akɛdea atɛkɛ leka lo nde losusu bɛngi adisombe.

47 «Bokumu bo busa bokuani naikina na modjanga modumbi ibo ta ibeke ko motaedji swi mindumba misusu. 48 Ta ehole elumi mo na swi, bamotubadea ta bokula, iboa badadea bɛngi bahɔe swi bapele baise ta egbogolo ko badumbadea ibia ba pɛpɛ sɔngi. 49 Edaabi oko mondumba momina momɔti ta suka e ngondo: babwɛndi baduabi abɔtodja bato babe na bodju 50 bɛngi babadumbe ta ibonge di mosa mopipo; iho edakabi oto biyo ko na bokpɛkɛnɛ miino.»

51 Yesu abawadja bo: «Osipoini midjɔ imimi misusu?» Bamosɔmbedja bo: «Okoboa.» 52 Abala na bu bo: «Ta tina emina, molehi o mobeko mosusu oikoakadea Bokumu bo busa akuani na moswa ndako iyona oiwakadea ta bodieli bo nde bo motswiya bobolama bo tɛtɔ leka loyeene ko na loyou.»

53 Ta ehole esidja Yesu bobala bikuanedji djimina, aso adonga iyana 54 ko akɛɛ ta ngando e nde*. Abanga boleha ta ndako dji miɔngɔnɔ dji bobo ko bato basusu bakamoa ko basawadjanaka bo: «Abolodji iyo konga ko na bopilo bo bokɔɔ midjɔ mi bokamoa ibo djɔ? 55 Iyo te mwana o mosapate? Nango te Malia*? Ko baana ba nango te Djake, Yosepu, Simona ko Yudhe? 56 Ko ngɛnɛ dji nde badiiti basusu iyaya ta tei e su? Abolodji iyo midjɔ imimi misusu djɔ?» 57 Iboa edaaka ta tina e bobo ibaku ta edhimeli ebobo. Iboa Yesu abasɔmbedja bo: «Motɛli te akume ta ngando isa ta ibota di nde*.» 58 Iboa Yesu aikɔɔ midjɔ mi bokamoa minɛnɛ iho ta tina taka e bobo e edhimeli.