1 «Kebani, pɛpɛ bokɔɔni oko bodju bo bino ta miso ma bato, bɛngi baonɛni. Emiti daa boa, otadiabini iputi di Sangwanu odii ta busa. 2 Okapa ikabo di pɛhɛ ta dii bakwali, pɛpɛ bohueya mondulɛ, mondumba mokakɔe bato ba ndango e mongi ta tei e ndako dji miɔngɔnɔ mi Bayudha ko na ndjea: bɛngi bato ba babakumedje. Naotɔndeakadeani sooti mɛnɛ bo: Babolodji iputi di bobo ehele. 3 Endelo okapa ikabo di pɛhɛ, ebɔ ewɛ e bali edae pɛpɛ bodjeba eka ekɔkɔdea ebɔ e baami. 4 Iboa etungi ikabo di wɛ di pɛhɛ ipame ta mbombi; ko Sangwao, iyona okaɛnɛ midjɔ mi mbombi, aopute.»

5 «Ehole eangɔnɔkɔdea ino, pɛpɛ bodani ondingo bato ba ndango e mongi: ibia bakasepe boangɔnɔkɔ ta ndako dji miɔngɔnɔ baemamaki ko na ta matano ma ndjea djinɛnɛnɛnɛ* bɛngi bato babaɛnɛke. Naotɔndeakadeani sooti mɛnɛ bo: badiabi iputi di bobo ehele. 6 Endelo wɛ, okapala boangɔnɔ, kwea ta ekenge e wɛ e ndako, dipa modipe ko angɔnɔ Sangwao odii ta esika e mbombi; ko Sangwao okaɛnɛ ta mbombi, aoputadea.

7 «Ta ehole eangɔnɔkɔdea ino, pɛpɛ botubani milɔkɔ miyai miyai ondingo bato ibia badii pɛpɛ bodaa Bayudha: ibia baka dingedje bo babwani bobaokea bato na milɔkɔ miyai miyai. 8 Pɛpɛ bobakwanani, modjɔ mo Sangwanu adjebakadea eka ndani ekambakadea na nu boso bo bo omowadjeni. 9 Indjani mondumba ndani mobwani na nu boangɔnɔkɔ:

"Sangwasu odii ta busa,

yɛɛ bo Kombe e wɛ edae esɛnɔke,

10 yɛɛ bo Bokumu bo wɛ bodoe

yɛɛ bo bolulea bowɛ bokɔme iyaya ta kpɔtɔ ondingo ta busa.

11 Lopa busabubu boyaka bo biso boengi busa.

12 Loyɛɛ na mabe ma biso,

ondingo aka yɛɛ iso ibia bakalokɔe bobe.

13 Pɛpɛ bolokina oko lokwee ta tei e mameko,

endelo lotingoa ta bobe.

[Ta tina ebo adii wɛ edina bokumu, bopilo, ko na ekumu kɔbili na kɔbili*.]"

14 «Modjɔ mo okama yɛɛni bato na pekato dji bobo, Sangwanu odii ta busa aoyɛɛbini pongono. 15 Endelo omiti yɛɛni bato, Sangwanu ataoyɛɛbini pongono pekato dji bino.»

16 «Ta ehole ekɔino mongilo, pɛpɛ bodaani na boso bo ndjokwa mondumba mokakɔe bato ba ndango e mongi: bakainedje ndjokwa ta mbanda dji bobo bɛngi bainedje moto mosusu bo badii ta mongilo. Naotɔndeakadeani sooti mɛnɛ bo: babolodja iputi i bobo ehele. 17 Endelo ta ehole esakɔɔ wɛ mongilo, sopea malasi ta molo mo wɛ ko sosa boso bo wɛ, 18 bɛngi bato badae pɛpɛ bodjeba bo odii ta mongilo. Endelo dongedja oko Sangwao odii iho, ta esika e mbombi, ko Sangwao, okaɛnɛ, ta mbombi aoputadea.»

19 «Pɛpɛ boboleani oko bodieli iyaya ta kpɔtɔ, ta polo ebwani sɛɛ na ngusu bonɛlɛkɛkɛ, ta polo ebwani baibi bobuka bɛngi baibe. 20 Endelo boleani bodieli bobino wɛtoko ta busa, iho abwani sɛɛ na ngusu bodaa pɛpɛ bonɛlɛkɛkɛ kaoko, baibi babwaniti bobuka bɛngi baibe. 21 Modjɔ mo iho ta polo edii bodieli bo wɛ, molema mo wɛ modaadea oko iyana.»

22 «Diiso didii molinda mo mokuku. Diiso di wɛ dikada bopele, mokuku mo wɛ mosusu modadea na bohu; 23 endelo diiso di wɛ dikadaa na epeko, mokuku mo wɛ moimeadea na modidi. Ekadaa bo bohu ibubu bodii ta tei e wɛ boimei modidi, modidi momina modaadea mopipo mɛnɛ!»

24 «Pɛpɛ moto omɔti obwani bosalea bakumu babae: modjɔ mo ndelo ekina alonadea omɔti kaoko apaladea okina; kaoko aokanadea na omɔti ko atsioladea okina. Obwanitini bosalea Ndjakomba ko na Palanga engbanga emɔti.»

25 «Ta tina emina naotɔndeakadeani bo: Pɛpɛ bosatungeanioko ta tina e bomɔ bo bino, na eka eyakadea ino kaoko eka emwakadea ino, kaoko esendja e bolwa ta mokuku. Bomɔ bonɔi mia maboyaka ko mokuku monɔi bisendja, ediiti oko iboa? 26 Pete indjani mbulu ba diko: te baane ko te babuke mbuma, badiiti na bibombelo bi mbuma, endelo Sangwanu odii ta busa akabayakedje! Iboa ino onɔitini mbulu na tɛtɔ? 27 Omina obwani bobakea nongo moo ehole mokɛkɛ ta bomɔ bo nde ta tei e bino ta tina e miyeano mi nde nda?

28 «Ko tina ndani ebwani na nu bosatungea ta tina e bisendja? Indjani mondumba mokakandoe pulɛlɛ dji gbie: te djisale ko te djitonge bisendja. 29 Enakoboa naotɔndeakadeani sooti bo edae nongo Sɔlɔmɔ, ta tei e ekumu e nde esusu*, ailwa esendja epele ondingo pulɛlɛ emɔti ta tei e dju. 30 Iboa ko Ndjakomba alwadjakadea ndjani dji gbie idii iya busɛbubu puma badjidumbi ta mosa: abwaniti bokɔɔ na bonɔɔ ta tina e bino? Bato ba bodhima bokɛkɛ! 31 Iboa pɛpɛ bosatungeani oko na bobala bo: "Eyakadea iso nde? Emwakadea iso nde? Elwadea iso nde?" 32 Iyena esusu edii leka lokahombe bato bakadae pɛpɛ bodjeba Ndjakomba na pɛpɛ boɛmbɛ. Modjɔ mo Sangwanu odii ta busa adjebakadea bo odiini na posa na lu. 33 Hombani boso mɛnɛ Bokumu bo Ndjakomba ko na bodju bo nde, iboa ilua losusu losadika lopamadea na nu. 34 Ta tina emina pɛpɛ bosatungea na disu di puma: ta tina e bo puma esatungeadea iyo mɛnɛ. Engi busa na momina moya.»