1 Bapalisai ko na Basadukai badoa ta dii Yesu bɛngi bamopikee elambo. Ko baso bamowadja bɛngi abainedje embete emɔti bodonga ta busa. 2 Abasɔmbedja bo: «Ta ehole e mɔkɔmɔkɔ, okabaleni bo: "Edii ehole epele, ta tina e bo diko dikpeti." 3 Ko ehuma, okabaleni bo: "Mbua akwadea busa ibubu, ta tina e bo mbua adoi ko diko dihindi." Odjebakadeani botingodja bimbete bi diko, endelo otadjebakadeani botingodja bimbete bi ehole iyeye*! 4 Bato ba mbota ebe ko ba pɛpɛ botingama na Ndjakomba, bahombakadea embete, endelo batabainedjadea embete ekina oko e Yona*.» Ngɔngɔ djimina abakina ko akɛɛ.

5 Ta ndelo ekatisa batingami ta ngunda ekina e ibeke, babosana botomba mapa. 6 Yesu abala na bu bo: «Tomadingani! Kebani na levile e Bapalisai ko na e Basadukai.» 7 Batingami balɛdjɛkɛ ko basabaleana bo: «Abalakadea iboa tina e bo lotombiti mapa.» 8 Yesu asipoa modjɔ momina mobalaka ibo ko abawadja bo: «Tina ndani osabaleanakadeani bo oditini na mapa? Edhimeli e bino edii ekɛkɛ! 9 Opakitasipoani oko? Lɛdjɛkɛdeani bopele: oandoani mitinga meka ta ehole ekabana ino mapa matano ta dii bato koto itano*? 10 Ko otalɛdjɛkɛdeani mapa sambo makabana ino ta dii bato koto inɛi ko motswiya mo mitinga miandoana ino*? 11 Tina edakadea na nu pɛpɛ bosipoa bo naibalaka na nu ta tina e mapa, ehole abalaka mbi na nu bo: Okebeni na levile e Bapalisai ko na e Basadukai?»

12 Iboa batingami basipoa bo aibalaka na bu ta tina e bokeba na levile endelo bakebe na bileho bi Bapalisai ko na Basadukai.

13 Yesu aimea ta ekenge mokili mo Sedjale e Pilipo awadja batingami ba nde bo: «Ekabale bato nde ta tina e Mwana o moto?» 14 Basɔmbedja bo: «Bato bakina bakabale bo odii Yoane Mobatisi, bakina odii Eliya, bakina ko odii Yilimia kaoko omɔti o batɛli.» 15 Yesu abawadja bo: «Ko ino, okabaleni mbi na dii nda?» 16 Simona Petelo atomba kɔpi ko asɔmbedja bo: «Odii Kilito, Mwana o Ndjakomba odii na bomɔ.» 17 Yesu amosɔmbedja bo: «Simona, mwana moomi o Yona, odii moto o mongandi, modjɔ mo editi mini na makiya misaotɔndea modjɔ momina, endelo Sesa odii ta busa. 18 Ko mbi naotɔndeakadea bo, odii Ibanga ko diko di ibanga imina napikadea Ekelesa e mbi*. Ko bikuke bi ngando e bato bago etaelongabi. 19 Naopadea pongola dji Bokumu bo busa: eka etingeabi wɛ iyaya ta kpɔtɔ etingeamabi ta busa; eka edipoabi wɛ iyaya ta kpɔtɔ edipoamabi ta busa*.» 20 Iboa Yesu atuba batingami matoi badae pɛpɛ botɔndea moto bo iyo adii Kilito.

21 Banga ehole iyena, Yesu abanga boinedja batingami ba nde bo: «Etungi na nde bokɛɛ ta Yelusalɛmɛ anɔngɔmɔ ta mabɔ ma basuku, banganga ba Ndjakomba banɛnɛnɛnɛ, ko na balehi ba mobeko. Bamowoe ko asisoe ta yogo ta disu di basato.» 22 Iboa Petelo amotuba ngungusa ko abanga bomodosa bo: «Kumu, Ndjakomba aobanee! Midjɔ imia midae pɛpɛ bootanea!» 23 Endelo Yesu aso ahombana ko asɔmbedja Petelo bo: «Kɛɛ bohali na mbi, Satana! Wɛ odii ibaku ta tina e mbi, ta tina e bo malɛi ma wɛ madiiti ondingo ma Ndjakomba endelo madii ma bomoto.»

24 Iboa Yesu abala na batingami ba nde bo: «Moto akapala bokimanani, asalone iyo mɛnɛ, atombe ekulusu e nde ko akimaneni. 25 Modjɔ mo moto opaladea boheledja bomɔ bo nde abotakadea; endelo moto otakadea bomɔ bo nde ta tina e mbi abobolodjadea. 26 Tɛtɔ ndani ebwani moto bodia bɛngi abolodje ngondo esusu, endelo abedje bomɔ bo nde? Ebwani bopa moto nde bɛngi asikoe bomɔ bo nde? 27 Naboa Mwana o moto adoadea na ekumu e Sango engbanga na babwɛndi ba nde, ko iboa aputadea engi moto bobwana na mikɔ mi nde*. 28 Naotɔndeakadeani sooti mɛnɛ bo: bato bakina ta tei e bato ibibi batagwabi boso bo Mwana o moto adoe ondingo mokondji.»