1 Ta ehole e batama bo na Yelusalɛmɛ ko baimea ta Betepadje, ta ngomba e mele mi Olive*, Yesu aloma batingami babae, 2 ko abala na bu bo: «Kɛɛni ta ngando edii boso bo bino, na mbala emɔti otaneadeani tito omɔti o mwali okabee bo ane* otingi ko mwana o nde moomi mbuti na nde. Motingoani ko balwɛnini basusu babae. 3 Moto omɔti akaowadjani mosɔmbedjani bo: "Kumu* akambakadea na bu." Ko na mbala emɔti abakinadea bakɛe.»

4 Midjɔ imia mikɔɔmɔ bɛngi mibalo mi motɛli mikokedjame:

5 «Bala na moseka o Siona bo:

Indja, mokondji o wɛ adoi adii wɛ,

aluma na bwɛli, akondi ta diko di tito omɔti o mwali okabee bo ane*,

ta diko di mwana o ane o moomi, ta dii mwana o ane o mokɛkɛ.»

6 Batingami bakɛɛ akɔɔ oko mondumba mobaloma Yesu. 7 Bamolwɛɛ tito o mwali okabeebo ane ko na mwana o nde moomi; ibia bakunda bo bisendja bi bobo ko Yesu akonda ta diko di bu. 8 Bato banɛnɛ ba emumu baanda bisendja bi bobo na ndjea; bakina balenaka tape dji mele ko badjiandaka na ndjea*. 9 Bimumu bi bato badalaka boso bo nde ko bakina bamokimanaka ko bagamaka bo: «Odjana adii Mwana o Dhapiti! Yɛɛ bo adjongoame Iyona okɛkɛ adoe na kombe e Kumu! Odjana ta bisika binɔi o diko*!» 10 Ta ehole ekwea yo ta Yelusalɛmɛ, ngando enɛnɛ esusu ekumana. Bawadjaka bo: «Iyoo oko omina nda?» 11 Bimumu basɔmbedjaka bo: «Edii Yesu, motɛli o Nadjalɛtɛ e Galileya.»

12 Yesu akwea ta tepelo ko abengana bato basusu batɛkɛkɛ ko basombaka ta tepelo; akukea mesa dji bato basɔmbɔtɔnɔkɔ palanga ko na bidie dji bato batɛkɛkɛ bimbenga. 13 Ko abala na bu bo: «Ekomama bo "Ndako e mbi ebeamabi ndako e miɔngɔnɔ." Endelo ino oeimedjini esabalaka e bapundji*!»

14 Bato ba miso mago ko na bitumbɛ babatama mbuti na Yesu ta tepelo ko abaheledja. 15 Endelo banganga ba Ndjakomba banɛnɛnɛnɛ ko na balehi ba mobeko balemoa amabo ɛnɛ midjɔ mibokamwa mikɔɔ iyo ko na bɛngɛ ibia bagamaka ta tepelo bo: «Odjana ta dii Mwana o Dhapiti!» 16 Iboa bamowadja bo: «Okakadea eka ebalakadea bo?» Endelo Yesu abasɔmbedja bo: «Okoboa. Oilangani nongo mobalo imumu mo Makomi: "Odiakadea ekumu e wɛ ta minɔkɔ mi bɛngɛ bakɛkɛkɛkɛ ko na ibia banungakadea mabɛi*"?» 17 Ngɔngɔ djimina abakina ko aimana ta ngando enɛnɛ bɛngi akɛe ta Betania ta esika e wɛɛ iyo.

18 Amaya busa, ta ihule di nde ta ngando enɛnɛ, Yesu aso aoka ndja. 19 Aɛnɛ mole mopigi na ndjea ko abatama mbuti na mu, endelo atanea oto kasa. Ko abala na mu bo: «Otabotabi mbuma naikina!» Na mbala emɔti mole mo pigi mokakana. 20 Ama ɛnɛ batingami iboa, bakamoa. Bawadja adii Yesu bo: «Ndenge ndani mole imumu mo pigi mobwani bokakana na mbala emɔti?» 21 Yesu abasɔmbedja bo: «Naotɔndeakadeani sooti mɛnɛ bo: okadaani na bodhima ko na pɛpɛ boisa kitɛ, obwanitini oto bokɔɔ midjɔ imimi misakɔɔ mbi ta mole imumu mo pigi, endelo ehole ebaladeano na ngomba iyeye bo: "Donga iyaya ko sadumba ta dua enɛnɛ", ebwani bokɔɔmɔ. 22 Eka esusu ewadjabi ino na bodhima ta yuunga, oebolodjabini.»

23 Akwea Yesu ta tepelo ko ta ehole edaaka iyo aleha, banganga ba Ndjakomba banɛnɛnɛnɛ ko basuku ba Bayudha babatama mbuti na nde ko bamowadja bo: «Bokondji ndani bokɔkɔdea na wɛ midjɔ imimi? Oopa bokondji bomina nda?» 24 Yesu abasɔmbedja bo: «Mbi pongono naowadjakadeani iwadja dimɔti, dimɔti pɛ; okasɔmbedjadeanini, iboa, naotɔndeadeani bokondji ndani bokɔkɔdea na mbi midjɔ imimi. 25 Batisimo ba Yoane adonga bo djɔ*? Ta busa isa adii bato?» Ibo balɛdjɛ ko, basaleana bo: «Lokasɔmbedja bo: "Ta busa", alowadjadea bo: "Iboa oimodhimeani* tina ndani?" 26 Endelo, lokasɔmbedja bo: "Badonga ta dii bato", lodii na bɔɔ na emumu e bato, modjɔ mo bato basusu bakatombe Yoane ondingo motɛli.» 27 Iboa, basɔmbedja ta dii Yesu bo: «Lotadjebakadea.» Yesu abasɔmbedja bo: «Ta dii mbiko ngasa, nataotɔndeakadeani bokondji ndani bokɔkɔdea na mbi midjɔ imimi.»

28 «Olɛdjɛkɛdeani bo? Moomi omɔti adaaka na baana ba nde baami babae. Abala na mwana o boso bo: "Mwana o mba, busa ibubu kɛɛ asale ta gbie e mele mi vino." 29 Mwana omina amosɔmbedja bo: "Naloni"; endelo ngɔngɔ dji moo ehole, asɔmbɔtɔnɔ malɛi ko aso akɛɛ ta gbie. 30 Moomi o mina abala adii mwana o babae oko mondumba momina momɔti. Iyoyo obabae asɔmbedja bo: "Okoboa moswa mba nakɛkɛdea akɛe", endelo aikɛ. 31 Okɔɔ bopala bo sangwabu ta tei e bobo babae nda?» Bamosɔmbedja bo: «Mwana o boso». Iboa, Yesu abala na bu bo: «Naotɔndeakadeani sooti mɛnɛ bo: baputedji ba puti na bali ba ndukeli bakweabi boso bo bino ta Bokumu bo Ndjakomba. 32 Modjɔ mo Yoane adua adii ino na ndjea e bodju, ko ino oimodhimeani; endelo baputedji ba puti na bali ba ndukeli bato bamodhimea. Nongo aɛnɛ ino midjɔ mimina, oisɔmbɔtɔnɔni milema ta tei e bino bɛngi omodhimeeni.»

33 «Hokamedjani ekuanedji ekina: Edaaka na moswa ndako omɔti oana gbie e nde e mele mi vino; aehikaka ikutu, alongea mombɔndɔ mo songa e boama mbuma dji vino, apika diako di ekpalaka eyai tina e bosɛndjɛlɛ*. Ngɔngɔ djimina, aisa baaneli ba gbie e mele mi vino baputele ena ko aso akɛɛ mɔɔngɔ. 34 Iyana aimea mbuti na ehole e bobuka mbuma, aloma basali ba nde ta dii baaneli ba gbie e mele mi vino bɛngi bakɛe amotombea mbuma dji nde. 35 Endelo baaneli ba gbie e mele mi vino bapea basali ba mina, boso baboma o babae bamoowa, ko o basato bamoowa na mabɔkɔ. 36 Iboa, aloma pongono basali bakina banɛnɛ, bonɔ ibia bakɛkɛ boso; endelo baaneli ba gbie e vino babakɔɔ oko mondumba momina momɔti. 37 Ta suka, abalomea mwana o nde iyo mɛnɛ o moomi ko abalaka bo: "Basumadea mwana o mbi." 38 Endelo ehole aɛnɛ baaneli ba gbie e vino Mwana baso basabaleana bo: "Indjani mosangoi! Doani lomowoe ko losangoadea bodieli bo nde!" 39 Iboa, bamopea, bamodumba sokolu e gbie e mele mi vino ko bamoowa.

40 «Ta ehole edoabi moswa gbie e mele mi vino akɔɔbi iyo baaneli ba gbie e mele mi vino nde?» 41 Bamosɔmbedja bo: «Abaowedjabi yogo emɔti ebe mɛnɛ ko aisabi baputeli bakina baaneli ta gbie e mele mi vino, ibia babwani bomopa mbuma ta ehole ekoki.» 42 Yesu abala na bu bo: «Oilangani ta makomi?

"Ibanga idia didumba batongeli ba ndako

diimea ikwee indonga.

Ido diidonga ta dii Kumu,

edii modjɔ mobokamwa ta miso ma biso*!"

43 «Ta tina emina, naotɔndeakadeani sooti mɛnɛ bo: Bokondji bo Ndjakomba bodongedjamabi ta tei e bino ko bopamabi ta ekomi ekina emɔti ebotabi mbuma. [ 44 Moto mosusu okwabi ta diko di ibanga imina abukeanabi bikenge bikenge ko moto iyona oo gbatimedjabi ibanga dimina, aminianabi bipɛndjɛ bipɛndjɛ*.]»

45 Ngɔngɔ dji booka bikuanedji bimina ibia bi nde, banganga ba Ndjakomba banɛnɛnɛnɛ ko Bapalisai basipoa bo Yesu abalaka na bu. 46 Bahomba mondumba mo bopea, endelo babangaka bimumu bi bato ta tina e bo bimumu bitombaka Yesu olongo motɛli.