1 Ehole emadja Yesu bileho ibia, abala na batingami ba nde bo: 2 «Odjebakani bo ediki masu mabae bɛngi tɛkɛ e Pasika* eimee: ko Mwana o moto adii mbuti na bomokaba bɛngi abakame ta ekulusu.»

3 Iboa ba nganga ba Ndjakomba banɛnɛnɛnɛ ko na basuku ba Bayudha bakɔɔ inginda ta ikanda di nganga o Ndjakomba o monɛnɛ okabeebo Kaipa; 4 ko batomba meko bapee Yesu na mbombi ko bamowoe. 5 Ekahia babalaka bo: «Lodae pɛpɛ bomopea ta ndelo e tɛkɛ modjɔ mo bato basaka mongangale.»

6 Iyana adaaka Yesu ta Betania, ta ndako e Simona, moto osɛnɔkɔ na mabha, 7 mwali omɔti abatama mbuti na nde apeaka molangi mo momɔti mo alibatele* molumake na malasi ma motswiya monɛnɛ: ko ehole edaaka Yesu ta mesa, mwali omina asopea malasi ta molo mo nde. 8 Ama ɛnɛ batingami iboa, baoka bobe ko balemoa babala bo: «Tina ndani e bobedja malasi ibobo? 9 Babwanaki bomatɛkɛ na motswiya monɛnɛ ko bapi palanga djimina ta dii bakwali!»

10 Ehole eɛnɛ Yesu iboa abala na bu bo: «Tina ndani etungeakadea na nu mwali iyoyo? Akɔi modjɔ mopele adii mbi. 11 Modjɔ mo, okadikameni* na bakwali bihole bisusu; endelo mbi otadikamabini na mbi bihole bisusu. 12 Aka sopea malasi ta mokuku mo mbi aselingoakadea bopuseama bo mbi*. 13 Naotɔndeakadeani sooti mɛnɛ bo: esika esusu etɔndɔbi ibo Bwɛndi Bopele imumu ta ngondo esusu, basɔngɔbi pongono modjɔ imumu mosakɔɔni mwali iyoyo ta tina e bomolɛdjɛ.»

14 Iboa omɔti ta tei e batingami doomi na babae, iyona okabeebo Yudhasi Isikaliote, akɛɛ ta dii banganga ba Ndjakomba banɛnɛnɛnɛ 15 ko abawadja bo: «Epadeani ino nde nakakaba Yesu ta dii ino?» Iboa, bamoputa na pata dji palanga tuku djisato*. 16 Banga ta ehole iyena ahombaka mwɛngi bɛngi amokabe.

17 Busa bo mbangi bo mapa mapɛpɛ boisa bole, batingami bakɛɛ awadja Yesu bo: «Apalakadea wɛ loɛngɛbɛnee mia ma Pasika djɔ?» 18 Abasɔmbedja bo: «Kɛɛni ta ngando enɛnɛ ta dii moto songolo ko balani na nde bo: "Molehi abali bo: Ehole e mbi emei mbuti; edii ta di wɛ esika ekɔɔdea mbi tɛkɛ e Pasika na batingami bambi." » 19 Batingami bakɔɔ oko mondumba mobapa Yesu mitindo, ko baɛngɛbɛnɛ Pasika. 20 Aimea busa mɔkɔmɔkɔ, Yesu adaaka ta mesa na batingami doomi na babae. 21 Ta ehole eyakaka ibo abala bo: «Naotɔndeakadeani sooti mɛnɛ bo: omɔti o bino akabadeani.» 22 Balumaka na ndjokwa enɛnɛ ko moto na moto amowadjaka bo: «Kumu, edii mbi?» 23 Yesu asɔmbedja bo: «Edii iyoyo oyakakadea na mbi saani* emɔti, edii iyo moto okabadeani. 24 Mwana o moto akɛdea oko mondumba motɔndea Makomi ta tina e nde*; endelo ndjokwa ta tina e moto iyona omokabi! Ebɔngɔkɔ ta tina e nde adae pɛpɛ bobotama!» 25 Yudhasi, moto omokabadea, atomba kɔpi ko awadja bo: «Molehi, edii mbi?» Yesu amosɔmbedja bo: «Edii wɛ moto osabala.»

26 Ta ehole eyakaka ibo, Yesu atomba ipa, ngɔngɔ dji nde bosakoa Ndjakomba, adibuka, apa na batingami; ko atɔndɔ na bu bo: «Tombani, yakani, iyeye edii mokuku mo mbi.» 27 Ngɔngɔ djimina atomba kɔbɔ e vino, ko ngɔngɔ dji bosakoa Ndjakomba, abapa ko atɔndɔ bo: «Mwakani ino basusu, 28 iyeye edii makiya ma mbi, makiya ma Mokongo* masopei ta tina e bato banɛnɛ, bɛngi badie ekutubanedji e pekato. 29 Naotɔndeakadeani sooti mɛnɛ bo: natamwabi naikina vino iyeye mbunoko busa bomwakabi mbi na nu vino e yeene ta Bokumu bo Sesa.» 30 Ngɔngɔ dji boemba Ndjembo*, baimana bakɛe ta ngomba dji mele mi Olive.

31 Iboa Yesu abala na batingami bo: «Ta bulu bo busa ibubu, odumbadeani edhimeli e bino ta tina e mbi, modjɔ mo Makomi mabala bo: "Nabomadea mobaneli ko bwela bo bhata bonanganadea*." 32 Endelo ngɔngɔ dji bosisoa bo mbi ta bogwa nasuadea boso bo bino ta Galileya.» 33 Petelo atomba kɔpi ko abala na nde bo: «Nongo bato basusu bakadumbadea edhimeli e bobo ta tina e wɛ, mbi pɛpɛ.» 34 Yesu amosɔmbedja bo: «Naotɔndeakadea sooti mɛnɛ bo, oko ta bulu bo busa ibubu, boso kɔkɔ abekoe, oinganadeani mbala dji sato.» 35 Petelo amosɔmbedja bo: «Nongo ekadaa bo nagwɛ engbanga emɔti na wɛ nabwaniti boinganea.» Ko batingami basusu babala oko mondumba momina momɔti.

36 Ngɔngɔ djimina, Yesu aimea na batingami ba nde ta esika ekabeebo Getesemani* ko abala na batingami bo: «Daani na mbondo iyaya, ta ehole esatubadea mbi ta tina e boangɔnɔ.» 37 Atomba Petelo ko na baana baami ba Djebede babae. alumaka na ndjokwa ko na bosatungea. 38 Ko abala na bu bo: «Molema mo mbi molumi na ndjokwa mbuti na bogwa; dikamani iyaya ko osɛndjɛlɛni engbanga na mbi.» 39 Akɛɛ moo bohali, akwa boso ta kpɔtɔ ko aangɔnɔ bo: «Sesa, ekabɔngɔ, dongedja mbuti na mbi kɔbɔ iyeye e saya. Ekahia pɛpɛ bokɔ oko bopala bo mbi, endelo mondumba mopalakadea wɛ.» 40 Asɔmbɔ mbuti na batingami, ko abatanea bawɛli. Iboa abala na Petelo bo: «Obwanitini bohɔnɔ bosɛndjɛlɛ nongo ngonga emɔti engbanga na mbi? 41 Sɛndjɛlɛni ko angɔnɔni bɛngi odaeni pɛpɛ bokwa ta bomekama. Mwembo modii mopipo endelo mokuku modii na bwɛmbu.»

42 Asatuba naikina mbala e babae ko angɔnɔ bo: «Sesa, ekadaa bo odongedje kɔbɔ iyeye bɛngi nadae pɛpɛ boemwaka, yɛɛ bo bopala bo wɛ bokɔɔme!» 43 Asɔmbɔ naikina abatanea oko bawɛli; modjɔ mo miso ma bobo makɔkɔ mandi. 44 Abakina, asatuba naikina ko ainga yuunga mbala e basato oko na mibalo mi mina mimɔti. 45 Ta suka, adoa ta dii batingami ko abala na bu bo: «Owɛlinioko, ko ohemakadeani oko? Edɛdiyeye ngonga eimei ko bakabi Mwana o moto ta mɔmɔ ma bato ba pekato. 46 Angɔɔni, lokɛe! Moto okabini abatami!»

47 Oko ta ehole ebalaka Yesu, Yudhasi, omɔti o batingami doomi na babae, aimea engbanga emɔti na emumu e bato banɛnɛ bapeli bipeko bi bila ko na pengu. Balomamaka na banganga ba Ndjakomba banɛnɛnɛnɛ ko na basuku ba Bayudha. 48 Moto o mokaba abakɔɔ embete bo: «Iyona obhimbanadea na mbi edii iyo yona. Mopeani.» 49 Mbala emɔti abatama mbuti na Yesu ko abala na nde bo: «Molehi, bosako!» Ko amobhimba. 50 Yesu amosɔmbedja bo: «Mina mbi modjɔ modoi wɛ akɔ mokɔɔ.» Iboa bato ibia babatama, baisa mɔmɔ diko di Yesu ko baso bamopea. 51 Omɔti ta ibia badaaka na Yesu agbula mɔmbi mo nde, akwɛlɛ mosali o nganga o Ndjakomba o monɛnɛ ko amolena itoi*. 52 Iboa Yesu abala na nde bo: «Sɔmbedja mɔmbi mo wɛ ta igbogbo, modjɔ mo moto mosusu okatombe mɔmbi aane na mu akagwɛ oko na mɔmbi. 53 Olɛdjɛkɛdea bo nabwani boangɔnɔ Sesa, iyoyo obwani bolomeani edɛdi mɛnɛ bingbanga bi babwɛndi bonɔɔ doomi na ibae? 54 Ekadaa bo ekɔɔme iboa, mondumba ndani mobwani bokokedjama na Makomi mabala bo midjɔ mimina mitungi mikɔɔme iboa?» 55 Oko ta ehole emina iyena, Yesu abala na emumu e bato bo: «Oimanini na mɛmbi ko na pengu bɛngi odapeanini ondingo naimei mokondji o batɔmbɔki? Masu masusu nadaaka na mobondo ta tepelo ta tina e bolehani, ko oidoani apeani. 56 Endelo midjɔ imia misusu mikɔmi bɛngi bo Makomi ma batɛli makokedjame.» Iboa batingami basusu bamosundola ko batia*.

57 Bato ibia bapea Yesu bakɛɛ na nde adii nganga o Ndjakomba o monɛnɛ akabeebo Kaipa, iho balehi ba mobeko ko na basuku baputoana. 58 Enakoboa, Petelo amokimanaka ngɔngɔ moo bohali, tii mbunoko ta ndako e nganga o Ndjakomba o monɛnɛ. Akwea ta ikanga ko adaa ta esika ekadae basindjili, bɛngi aindje mondumba mosukeadea modjɔ momina imua.

59 Banganga ba Ndjakomba banɛnɛnɛnɛ na Ikita dinɛnɛ disusu bahombaka tati dji bokuta ta tina e Yesu bɛngi bamowoe; 60 endelo baibolodja eka emɔti, nongo ko apa bo tati dji bokuta djinɛnɛ*. Ta suka, bato babae baimana 61 babala bo: «Moto iyoyo atɔndea bo: "Nabwani bobuka tepelo e Ndjakomba ko naetonge na masu masato*."» 62 Nganga o Ndjakomba o monɛnɛ aangɔ ko awadja Yesu bo: «Otasɔmbedjakadea nongo eka emɔti ta tina e tati idjidji djisusu dji opundakadea na bu?» 63 Endelo Yesu apɔpɔnɔ. Iboa, nganga o Ndjakomba o monɛnɛ abala bo: «Ta kombe e Ndjakomba odii na bomɔ, olotɔndee na bokata seleka bo odii Kilito, Mwana o Ndjakomba?» 64 Yesu amosɔmbedja bo: «Edii wɛ moto obali. Endelo naotɔndeakadeani bo: oko edɛdiyeye oɛnɛdeani Mwana o moto adii ta ebɔ e baami e Ndjakomba o ngulu; ko omɛnɛdeani pongono bodoa ta matute ma busa*.» 65 Iboa Nganga o Ndjakomba o monɛnɛ aala bisendja bi nde ko abala bo: «Asingakadea Ndjakomba! Tina ndani ohombakadeani naikina batemo! Ookini mondumba mosingakadea iyo Ndjakomba. 66 Olɛdjɛkɛdeani bo?» Basɔmbedja bo: «Abɔngi na yogo*.» 67 Ngɔngɔ djimina, bamotswea bikɛtoa ta boso ko bamola mabɔtɔ; bakina bamogipea bipapata 68 ko babala bo*: «Kilito, tɛlɛ tina e biso, ko lotɔndea osa oboma nda!»

69 Enakoboa, Petelo, adaaka adii na mobondo sokolu, ta ikanga. Mosali mwali omɔti abatama na nde ko abala bo: «Wɛ pongono odaaki na Yesu moto o Galileya.» 70 Endelo aingana ta miso ma bato basusu, ko atɔndɔ bo: «Natadjebakadea eka epalakadea wɛ bobala.» 71 Iyana akɛkɛ Petelo ta dɔɔngɔ di modipe mo ikanga mosali mwali okina amoɛnɛ ko abala na bato badaaka iyana bo: «Moto iyoyo adaaki na Yesu, moto o Nadjalɛtɛ.» 72 Amoinganea naikina na bokata seleka bo: «Natadjebakadea moto iyona.»

73 Ngɔngɔ dji moo ehole, bato badaaka iyana babatama ko babala na Petelo bo: «Sooti mɛnɛ odii pongono omɔti o bato ibia, mondumba mo wɛ mo bobala moinedjakadea bopele mɛnɛ.» 74 Iboa abanga bosabhɛlɛ ko na agama bo: «Kanga Ndjakomba mɛnɛ natadjebakadea moto iyona!» Mbala emɔti kɔkɔ abekoa, 75 ko Petelo alɛdjɛ mobalo momobaleaka Yesu bo: «Boso bo kɔkɔ abekoe, oinganeadeani mbala djisato*.» Iboa aimana sokolu ko iho ayea na saya enɛnɛ.