1 «Iboa Bokumu bo busa bodaabi ondingo baseka doomi ibia batomba milinda mi bobo bɛngi bakɛe asongana na moomi o moki. 2 Batano ta tei e baseka ibia badaaka na milabolabo, ko batano bakina badaaka na konga. 3 Baseka ba milabolabo batomba milinda mi bobo endelo baitomba pitɔlɔ etutu e bodedja. 4 Endelo ibia badaaka na konga batomba milinda mi bobo na pitɔlɔ ta maseli ma bobo. 5 Enakoboa, iyana ayeyoaka moomi o moki; baseka basusu baoka hiɔ ko baso bawɛɛ. 6 Ta ndanda e bulu mogamo momɔti mookama bo: "Indjani moomi o moki! Imanani asongana na nde!" 7 Iboa baseka basusu baso basisoa ko babɔngedja milinda mi bobo. 8 Baseka ba milabolabo bawadja ibia ba konga bo: "Lopani ndambo e pitɔlɔ e bino, modjɔ mo milinda mi biso midoi adimea." 9 Baseka ba konga basɔmbedja bo: "Ediiti enɛnɛ ebwaniti bokoka iso na nu. Edii bopele o kɛɛni pɛpɛlɛ asomba e bino ta dii bato ibia bakatɛkise." 10 Ta ehole ekɛkɛ bo asomba, moomi o moki aimea. Baseka ibia basabwanedjaka bakwea na nde ta ndako e tɛkɛ e moki* ko badipa modipe. 11 Ngɔngɔ djimina, baseka bakina baimea pongono ko bagama bo: "Kumu, kumu, lodipoa!" 12 Endelo asɔmbedja bo: "Naotɔndeakani sooti mɛnɛ bo: nataodjebakadeani." 13 Iboa sɛndjɛlɛni, modjɔ mo, otadjebakadeani isu kaoko ngonga.»

14 «Edaabi ondingo moto omɔti oimea mbuti na bokɛɛ mɔɔngɔ: abeya basali ba nde ko abapa elomu e bobanea leka lo nde. 15 Apa taleta djitano ta dii omɔti, djibae ta dii okina, ko emɔti ta dii moto o basato: engi moto bobwana na ngulu e nde, ko akɛɛ mɔɔngɔ. 16 Iyona o bolodja taleta djitano akɛɛ nadju, akɔe na dju mombongu ko aso abakea djikina djitano diko. 17 Oko mondumba momina momɔti iyona obolodjaka taleta djibae abakea djikina djibae diko. 18 Endelo iyona obolodja oto taleta emɔti akɛɛ alongea mombɔndɔ ta kpɔtɔ ko apusea taleta dji moswa nde.

19 «Ngɔngɔ dji ehole eyai, moswa basali ahula ko abala na bu bo: "Tɔndeanini mondumba mokɔi na nu na bodieli bo mbi." 20 Iyona otombaka taleta djitano abatama ko amolwɛɛ taleta djikina djitano ko abala bo: "Moswa mba, opani taleta djitano. Indja djikina djitano djibakeabi mba." 21 Moswa nde amosɔmbedja bo: "Bopele! Odii mosali mopele ko o iyɔngi. Abo odaaki na iyɔngi ta midjɔ mikɛkɛkɛkɛ, naoimedjadea kapita o midjɔ minɛnɛnɛnɛ. Doa asepe engbanga emɔti na moswa wɛ." 22 Iyona otombaka taleta djibae adoa pongono ko abala bo: "Moswa mba opani taleta djibae. Indja djikina djibae djibakeabi mba." 23 Moswa nde abala na nde bo: "Bopele! Odii mosali mopele ko o iyɔngi. Abo odaaki na iyɔngi ta midjɔ mikɛkɛkɛkɛ, naoimedjadea kapita o midjɔ minɛnɛnɛnɛ. Doa asepe engbanga emɔti na moswa wɛ." 24 Ta suka, iyona otomba oto taleta emɔti abatama pongono ko abala bo: "Moswa mba, nakadjebe bo odii moto mopipo: okatswɛ mbuma ta polo edai wɛ pɛpɛ boana, ko okandoane mbuma ta polo edai wɛ pɛpɛ bomɛsɛ. 25 Naoka bɔɔ, ko na kɛɛ apusea taleta e wɛ ta kpɔtɔ. Naboa indja iyo iyeye tomba taleta e wɛ." 26 Moswa nde amosɔmbedja bo: "Mosali mobe ko o emɛli! Odjebaka bo nakatswɛ mbuma ta polo edai mbi pɛpɛ boana ko nakandoane ta polo edai mbi pɛpɛ bomɛsɛ? 27 Tina ndani oisa taleta e mbi ta ndako e mbombi e palanga, bɛngi ta ihule di mbi nabwanaki natombe taleta e mbi na moo itomba o diko 28 Iboa, motinoani taleta emina ko epani na moto iyoyo odii na taleta doomi. 29 Modjɔ mo bapadea eka ekina ta dii moto iyona opeli ko aimeadea na leka lonɛnɛ; endelo moto odii pɛpɛ eka, bamotinoadea nongo moo eka opeli iyo. 30 Ta tina etingi na mosali omina iyona o mobe, modumbani sokolu ta modidi, iho esika eyeadea iyo biyo ko na bokpɛkɛnɛ miino." »

31 «Ehole edoabi Mwana o moto ta ekumu e nde na babwɛndi basusu, adaabi ta ekumu ta kiti e nde e bokumu. 32 Bikomi bisusu bidaabi biputoanake ta boso bo nde. Abɔtodjabi bato bamɔti na bakina ondingo mondumba mokabɔtodje mobaneli o tito bhata na kambeli; 33 aisabi bhata ta ebɔ e nde e baami ko kambeli ta ebɔ e nde e bali. 34 Iboa mokondji abalabi na ibia badaabi ta ebɔ e nde e baami bo: "Doani ino ibia badjongoami na Sesa, sangoani Bokumu bosia bobɔngedjama ta tina e bino donga mbangi e ngondo. 35 Modjɔ mo nadaaka na ndja opakanini mia; naokaka posa e bomwaka ko opakanini madiba; nadaaka mokɛndɛli ko oasɔkɔnini; 36 nadaaka mbundu ko olwadjanini bisendja; nadaaka na epeko ko okamoakanini; nadaaka ta bɔlɔkɔ ko odoani aindjanini." 37 Iboa bato ba bodju bamosɔmbedjabi bo: "Kumu, ehole ndani eoɛnɛ iso na ndja ko loopa mia? Ehole ndani eoɛnɛ iso na posa e bomwaka ko loopa madiba? 38 Ehole ndani eoɛnɛ iso mokɛndɛli ko loasɔ ta dii iso? Ehole ndani eoɛnɛ iso mbundu ko loolwadja bisendja? 39 Ehole ndani eoɛnɛ iso na epeko isa ta bɔlɔkɔ, ko iso lodua aoindja?" 40 Ko mokondji abasɔmbedjabi bo: "Naotɔndeakani sooti mɛnɛ bo, oko mondumba mokɔɔ ino na omɔti onɔi mokɛkɛ ta tei e denga di mbi, edii wɛtoko mbi moto okɔmedjano."

41 «Ngɔngɔ djimina mokondji abalabi na ibia badaabi ta ebɔ e nde e bali bo: "Dongani mbuti na mbi, bato balakedjamake! Kɛɛni ta mosa mo kɔbili mobɔngedjama ta tina e djabulu ko na babwɛndi ba nde! 42 Modjɔ mo naoka ndja ko oipanini mia; naoka posa e bomwaka ko oipanini madiba; 43 nadaaka mokɛndɛli ko oiasɔnini; nadaaka mbundu ko oilwadjanini bisendja; nadaaka na epeko ko ta bɔlɔkɔ, ko oidoani aindjanini." 44 Iboa ibo pongono bamosɔmbedjabi bo: "Kumu, ehole ndani eoɛnɛ iso na ndja isa na posa e madiba, isa mokɛndɛli, isa mbundu, isa na epeko kaoko ta bɔlɔkɔ, ko loiokɔmedja?" 45 Mokondji abasɔmbedjabi bo: "Naotɔndeakadeani sooti mɛnɛ bo: oko mondumba modaa ino pɛpɛ bokɔmedja omɔti iyoyo onɔi bokɛkɛ, oikɔmedjani mbi pongono." 46 Iboa, ko bato mina bakɛbi ta etumbu e kɔbili, endelo bato ba bodju bakɛbi ta bomɔ bo kɔbili.*»