1 «Pɛpɛ bosambedjani binanu, bɛngi bo badae pɛpɛ bosambedjani. 2 Modjɔ mo baosambedjabini oko mondumba mosambedjakadea ino binanu; ko baongɛbini oko na mwɛngi imua mokaengɛe na nu bato bakina. 3 Tina ndani oɛnɛkɛdea ebumbu e epɛtɛ edii ta diiso di mwangwao, ko otaɛnɛkɛdea ibaya isulu idia idii ta diiso di wɛ? 4 Kaoko ndenge ndani obwani bobala na mwangwao bo: "Amba nadongedje ebumbu e epɛtɛ edii ta diiso di wɛ", enakoboa ibaya i sulu idii ta diiso di wɛ? 5 Moto o ndango e mongi, dongedja boso mɛnɛ ibaya di sulu ta diiso di wɛ iboa ngɔngɔ oso odjebedea bodongedja ebumbu e epɛtɛ edii ta diiso di minɔ.

6 «Pɛpɛ bopani mia madjongoamake ta dii mbwa, basaka sɔmbɔ bootswani; ko pɛpɛ bodumbani leka lo bino lomotswiya ta boso bo ngulu modjɔ mo basaka lodalakaka.»

7 «Wadjani ko baopadeani; hombani ko odiadeani; bomani modipe ko bamoodipoadeani. 8 Ta tina ebo moto mosusu owadjabi bamopaabi, iyona ohombabi abolodjabi ko iyona obwani boboma ta modipe bamodipoabi. 9 Moto ndani ta ndanda e bino obwani bopa mwana o nde ibanga akamowadja mwɛmbɛ? 10 Kaoko iyona obwani apɛ mwana o nde epakapengi akamowadja moswi? 11 Ko ekadaabo ino bato babe odjebini bopa leka lopele ta dii baana ba bino. Ndenge ndani Sangwanu iyoo odii ta busa abwaniti bopa leka lopele ta dii ibia bamowadjakadea!

12 «Ino pongono kɔɔni ta dii binanu eka ndani epalakadea ino baokɔeni: tina e bo iyena edii eleho e Mobeko ko e bileho bi Batɛli*.»

13 «Kweani ta modipe mokɛkɛ modjɔ mo! Modipe monɛnɛ ko imua molomakadea bato ta bobedjama; endelo bato banɛnɛ bakweabi ta mu. 14 Endelo modipe mokɛkɛ kaoko edii ndjea iyena ekakɛe ta bomɔ edii ekototake; ko edii na bato bakɛkɛ ibia baka edie.»

15 «Kebani na batɛli ba bokuta. Bakɛkɛdea adoe ta dii ino bakalwae bisendja bɛngi baeɛnɛme olongo bhata endelo ta tei e bobo badii mɛɛnɛ swa baluma na kɛlɛ. 16 Obadjebabini na misala mi bobo. Ndenge ndani obwanini bodongedja mbuma dji vino ta mole mo ndjubɛ kaoko obuke mbuma dji pigi ta mole mo ndjubɛ? 17 Mole mosusu mopele mokabote mbuma dji pele endelo mole mokadaa na yogo mokabote oko mbuma dji be. 18 Mole mo pele mobwaniti bobota mbuma djibe kaoko mole mo yogo mobwaniti bobota mbuma dji pele. 19 Mole mosusu mobwani bodaa pɛpɛ bobota mbuma dji pele ba molenadea ko bamodumbadea ta mosa. 20 Iboa, odjebadeani batɛli ba bokuta na mikɔ mi bobo.»

21 «Ediiti bo bato ibia bakabeeni "Kumu, Kumu", bakweabi ta Bokumu bo busa, oko bato ibia bakakɔe bopala bo Sesa iyona odii ta busa. 22 Bato banɛnɛ babalabi na mbi ta busa ibua bo Sambi bo: "Kumu, Kumu, iso loitɛlɛkɛ na kombe e wɛ, ko loibenganaka membo mibe na kombe e wɛ ko loikɔɔkɔ midjɔ mi bokamoa minɛnɛ na kombe e wɛ?" 23 Naboa nabatɔndeabi bo: "Naiodjebani nongo; dongani mbuti na mbi bakɔmeli ba midjɔ mibe*!" »

24 «Iboa, moto mosusu okadea mibalo imimi mibalakadea mbi ko akamisa ta mosala adadea ondingo moto o dii na ndjɛnɛ eyai osapika ndako e nde ta diko di mabanga. 25 Ta ehole ekwii mbua ipɛtɔ ko na mipɛpɛ mikwei ta ndako, endelo ndako ebukeiti, modjɔ mo ndako epiki ta diko di mabanga. 26 Endelo moto mosusu iyona ookadea mibalo mi mbi ko amisiti ta mosala adii ondingo endanga iyona opika ndako ta diko di djɛlɔ. 27 Mbua akakwa, ipɛtɔ ko pwea ekumbi ta diko di ndako emina ko ekwi: enangani esusu.»

28 Ta ehole esidja Yesu bobala mɛko imia, bato basusu bakamoa na bileho bimina; 29 Modjɔ mo abalehaka na kpati esusu botikoana na mondumba mo balehaka balehi ba mobeko.