1 Coríntios 9

Pool atsweel ontam o ndɛ

1 Mɛ̃ hɛ̃ ke ndi ndii wɛ? Mɛ̃ ke ntam ndi wɛ? Mɛ̃ k’émwɛn Yeso wu Mfam a bia-byɛ wɛ? Byɛ ŋ’eyii obobɔ, ke m’ɔ̃sal a mɛ̃ me ndɔɔ a Mfam wɛ? 2 Okɛɛn bakyɛ abetsam ndiri mɛ̃ ke ndi ntam wɛ, me ndɔɔ a byɛ, mɛ̃ ndi ntam. Ke ngwel wɛ, byɛ eli eliĩ eki esuo ontam o mɛ̃ onse Mfam. 3 Wu ɔ̃mveel a mɛ̃ ola b’apfiɔɔl mɛ̃: 4 K’awi bee nkuul yi edza ye yi enywã wɛ? 5 K’awi bee nkuul yi ebiri nkyel ngɔmɔ̃ wu ɔ̃kiool onge ɔ̃kal, onge b’ebesa antam bakyɛ, y’andoo a Mfam, ye Sefas wɛ? 6 Eli kɛn a mɛ̃ ye Balanabas bɛn ebvaan esal? 7 Mbuul nã wu abesa ɔ̃sal wu ombwel-mbwel me nzi e ndyam? Wu abekwɛn bvine nã, wɛn k’abedza nsia e lɔ wɛ? Wu abuaal anyam nã, wɛn k’anywã ãbiaal ã bɔ wɛ?

8 Mɛ̃ eyɛɛn obobɔ kɛn a m’emfa ki ombuul? Ngel wɛn k’eyɛɛn obobɔ wɛ? 9 Ngwanyã, ákel onse Ngel a Moyize bubu: «Ŋ’esal ngwɛmbɛ me lio li aka eluɔ, bee ndɛ ɔ̃nywã okuru✝9.9 Det 25.4; 1Ti 5.18.» Nziã abekɛɛ angwɛmbɛ nguo? 10 Ke yam, ŋ’eyɛɛn ndɛ obobɔ, ke me ndɔɔ a bia-byɛ wɛ? Ngwanyã, ákel obobɔ me ndɔɔ a bia-byɛ! Ke ngwel wɛ, ebvaan kwɛn wu asal, asal ye kaã. Wu asal me lio li aka bele ebvaan akal ye kaã li abɔɔ boo li ndɛ. 11 Bee ekwɛn ãndɔɔ mã ngesɛ m’Ɔ̃fel onse byɛ. Okɛɛn bee ebɔɔ ebvakab ki opfel bɛn ke b’ɔ̃fel wɛ ola byɛ, oyɔ ndɔɔ yi ɛ̃kam? 12 Okɛɛn bakyɛ akoo k’abɔɔ eluɔ ola byɛ, bɛn bee k’ekoo k’ebɔɔ bvam bvi enduru wɛ? Kɛn a bee k’ewel eluɔ obvɛ bvɛn ebvaan bee ekeewal wɛ. Bee ekuru mwiĩ me mbueel, me ndɔɔ yi ebee Nsia yi Ngesɛ yi Mãsia okii. 13 B’asa ɔ̃sal onse Nzɔ a Nziã, yi eliil bɔ Nzɔ a Nziã yiyi. B’asal ke nkiin yi awa Nziã ãmpɔɔ, abɔɔ boo li bɔ li ãmpɔɔ omɔ̃. 14 Emfa kiki hɛ̃, Mfam owi ngel ndiri b’atsal Nsia yi Ngesɛ akal mpɛn me Nsia yi Ngesɛ. 15 Me b’otal mɛ̃, mɛ̃ ke mbɔɔ eluɔ si ngemɔ̃ kyɛn ebvaan mɛ̃ ekeebɔɔ wɛ. Mɛ̃ hɛ̃ ke nswɛn ɔ̃kaan wu me ndɔɔ yi ebii kwɛn awa mɛ̃ eluɔ obvɛ wɛ. Ke ngwel wɛ, ngesɛ me nkwa, ke mboo a k’ewa mɛ̃ nkuul kwɛn ambaal dzuun e mɛ̃. 16 Ke yam, otsal o Nsia yi Ngesɛ k’eli ndɔɔ yi esa mɛ̃ nzal-a-nsia wɛ, ke ngwel wɛ eli ndɔɔ yɛn ebvaan mɛ̃ esa. Okɛɛn mɛ̃ ke nsal Nsia yi Ngesɛ wɛ, olɔ fool li bwɛn me ndɔɔ a mɛ̃! 17 Okɛɛn myam wu esueel k’esa ɔ̃sal wu otsal o Nsia yi Ngesɛ ondɛ, mɛ̃ ekeebɔɔ furu. Kɛn onge bɛn yɔ ke ndɔɔ yi ewɛɛ mɛ̃ wɛ, mɛ̃ ebiri kɛn a pfuũ li atam mɛ̃ obiri. 18 Obobɔ, furu e mɛ̃ emã? Furu e mɛ̃ eli li etsal mɛ̃ Nsia Ngesɛ ngwel. Mɛ̃ k’ebɔɔ eluɔ kyɛn ebvaan mɛ̃ ekeebɔɔ me Nsia yi Ngesɛ oyɔ wɛ.

Pool okiool k’akal ɔ̃nkyal a baal bueel

19 Ke ngwel wɛ, onkyam ŋɛn mɛ̃ ndi ndii ke nkwel a baal bueel, mɛ̃ nkiool k’ekal ɔ̃nkyal a baal bueel, kwɛn mɛ̃ mbɔɔ baal b’anduru olɔɔ. 20 Ŋ’ekekal mɛ̃ y’Ayuda, mɛ̃ ekekal onge Ɔ̃yuda, kwɛn mɛ̃ mbɔɔ Ayuda. Ŋ’ekekal mɛ̃ ye b’ali ke nsɛn a Ngel, mɛ̃ ekekal onge wu oli ke nsɛn a Ngel, kwɛn ŋɛn myam ke ndi ke nsɛn a Ngel wɛ. 21 Ŋ’ekekal mɛ̃ ye b’aywɛn a Ngel, mɛ̃ ekekal onge wu oywɛn a Ngel, kwɛn mɛ̃ mbɔɔ b’aywɛn a Ngel, kwɛn ŋɛn mɛ̃ ke ngywɛn a Ngel a Nziã wɛ. Ke ngwel wɛ, mɛ̃ ebekiaal Ngel a Mãsia. 22 Ŋ’ekekal mɛ̃ ye baal bɛn kɛn awam onse okiool wɛ, mɛ̃ ekekal onge bɔ, kwɛn mɛ̃ mbiri bɔ ola Mãsia. Obobɔ, mɛ̃ nsi mbueel me ndɔɔ a baal bueel, kwɛn mɛ̃ mvuul baal ke kwɛ m’emfa kieel. 23 Mɛ̃ ebesa ãndɔɔ omɔ̃ mbueel, me ndɔɔ a Nsia yi Ngesɛ, kwɛn mɛ̃ mbɔɔ boo li Nsia yi Ngesɛ oyɔ.

Ãndɔɔ mɛn b’atsuu ntiin abvaan asa

24 Byɛ eyɛɛ wɛn ke mbaa yi abesa ɛ̃taan, b’abetsuu ntiin abetsuu yɔ bɔ bueel, kɛn a mbuul ngɔmɔ̃ abebɔɔ ebva-kab. Obobɔ, etsuu ntiin m’emfa kyɛn byɛ ebɔɔ ebva-kab. 25 Baal bueel b’abetsuu ntiin abebee eluɔ bibi. Bɔ abesa obobɔ, me ndɔɔ yi abɔɔ ekɔrɔ ki abewa wu obvel, kyɛn k’eyiil k’ofool wɛ. Kɛn a bia-byɛ ebesa obobɔ, me ndɔɔ yi ebɔɔ ekɔrɔ ki abewa wu obvel, kyɛn k’efool bam wɛ. 26 M’emfa okyɛ, mɛ̃ k’etsuu ntiin epwa wɛ. Ŋ’ekii mɛ̃ ɛ̃nkwaã, mɛ̃ k’ekii myɛ̃ kii-a-kii wɛ. 27 Kɛn a mɛ̃ ebetuaal nzuru mpal, mɛ̃ ndi y’okwɛn nkal a yɔ, me ndɔɔ yɛn, ke mbee a ŋe ntee-ntee mɛ̃ bakyɛ, abee mɛ̃ me pyɛ osuul.