Apocalipse 20

Akuru Satana mvel miil ngɔmɔ̃ (1.000)

1 Mɛ̃ bu mwɛn ãnzwel ngãmɔ̃ ãfi ywel. Onse kuɔɔl, mɔ̃ ãsiin ɔ̃wɔɔl a ywɛn li ela li ke nsɛn a nsie ye mpaa yam yi nɛn. 2 Ãnzwel omɔ̃ ãyesiin dalagɔ̃, wu ntaal wa tsɔɔn-tsɔɔn, wu oli ɔ̃pfu bvool oli Satana, bu akuru ndɛ mpaa yi esa ye ndɛ mvel miil ngɔmɔ̃ (1.000). 3 Mɔ̃ ãtyel ndɛ onse ywɛn li ela li ke nsɛn a nsie, ãwɔɔl lɔ, bu ãsi eliĩ ke ywel a lɔ kwɛn ndɛ abee ɛ̃kiri obepfuru tiil k’ekoo mvel miil ngɔmɔ̃ (1.000). Ke mbee oŋɔ̃, ebvaan kwɛn apaal ndɛ me ndɔɔ a lio etsi-etsiri. 4 Mɛ̃ mwɛn ãkiri m’okwɛn. Awi b’abvi nsɛn nkal a mɔ̃ okwɛn b’atsiil ãndɔɔ. Mɛ̃ mwɛn hɛ̃ baal b’átsiil ɛ̃tswɛ m’ekuu me ndɔɔ yi étsweel bɔ Yeso y’Endɔɔ e Nziã, bvool ábee k’abuɛɛn onkyam nyam, onkyam etiɔ e ndɛ, ye bɛn k’ábɔɔ eliĩ me mbwii wuo me kuɔɔl wɛ. Bɔ asiool bvool akal m’ompu ye Mãsia mvel miil ngɔmɔ̃ (1.000). 5 Bakyɛ b’ákwi k’asiool wɛ, tiil ye k’ebwel mvel miil ngɔmɔ̃ (1.000) oyɔ. Obɔ osiool b’ɛ̃kwel. 6 Esɛ ngamfɛn ola b’eseel Nziã ɛ̃kwel onse b’ákwi-ákwi, bɔ ali ba ngel. Epfu li yuaal k’eli y’okwɛn nkal a bɔ wɛ. Bɔ akieel akal angaa-a-Nziã bvool ba Mãsia. Bɔ akieel akal m’ompu ye ndɛ wu Mãsia mvel miil ngɔmɔ̃ (1.000).

Abvel Satana mpɛn

7 Ŋ’ekieel ekoo mvel miil ngɔmɔ̃ (1.000), akieel apaal Satana me bwal e ndɛ. 8 Ndɛ akieel ayepfuru Gog ye Magog, ŋ’ayɛɛn ndiri ãyam ã baal b’ɛ̃soo ɛ̃ nsie ɛ̃nge-ɛ̃na. Ndɛ akieel abvool bɔ me ndɔɔ yi adzwaan eta. Bɔ akieel akal booboo onge esɛɛ bvi nku-a-nku ãdza m’ɔ̃ngwa. 9 Bɔ akɔɔn me nsie yueel, bvool adzii mboo yi eli ba ngel ye bviil e ndɛ li ɔ̃tio. Kɛn a mbaa efi ywel edziool bɔ. 10 Ɔ̃pfu wu ákepfuru bɔ, atyel ndɛ onse ywɛn e mbaa y’ɔ̃fel a sofolo, mboo yi eli nyam y’ɔ̃liaal-ɛ̃kiɛɛn wa mfya. Bɔ akieel amwɛn fool ɔ̃bu, tsia mwiĩ.

Otsiil b’ãndɔɔ bo ntɔ

11 Mɛ̃ bu mwɛn kiri li okwɛn li nɛn li fuu ye wu ábvi nsɛn nkal a lɔ. Nsie ye ywel ebal ke nkwel a lɔ, bvool k’abemwɛn bvɛ wɛ. 12 Mɛ̃ bu mwɛn b’ákwi-ákwi, akuul y’akiɔɔl, tɛ ke nkwel a kiri li okwɛn. Adzweel ɛ̃nkaan bvool adzweel ɔ̃nkaan ɔ̃kyam wu oli ɔ̃nkaan wu elaã. Atsiil ãndɔɔ ã b’ákwi-ákwi onge b’ákel onse ɛ̃nkaan omyɛ̃, m’emfa ki ɛ̃sal ɛ̃ bɔ. 13 Ãdza m’ɔ̃ngwa ãloo b’ákwi-ákwi me mɔ̃, epfu y’ola o b’ákwi-ákwi, oloo b’áli okɔ: Atsiil ãndɔɔ ã bɔ, mbuul bwɛn a mbuul m’emfa ki ɛ̃sal ɛ̃ ndɛ. 14 Atyel epfu y’ola o b’ákwi-ákwi onse yɛɛ e mbaa*20.14 yɛɛ e mbaa ŋ’ayɛɛn ndiri ywɛn e mbaa.. Yɛɛ e mbaa eli epfu li yuaal*20.14 epfu li yuaal eli etumbu ki ɔ̃bu.. 15 Mbuul wɛn nkuun k’áswɛn onse ɔ̃nkaan wu elaã wɛ, atyel ndɛ onse ywɛn e mbaa.