1 Ãnzwel ãsuo mɛ̃ hɛ̃ nzal ngamɔ̃ yi elaã, yi kɛɛn onge nkɔɔn yi ɔ̃bvɛn yi Kilisital. Yɔ epal onse kiri li okwɛn e Nziã ye li Muaan-emɛmɛɛ̃, 2 bvool ebwel kal-a-kal a bal-bal a bviil wu ɔ̃nɛn. Nkal ekwel enge-bviaal bvi nzal oyɔ, éli y’ɔ̃ti wu elaã ngɔmɔ̃ wu ákeburu nsia nsa kuun ye yuaal me mvel, nsa ngamɔ̃ me nswii. Ãsɔɔ m’ɔ̃ti ondɛ ãbeboo baal b’ɛ̃kiri. 3 Obwel b’enkɛɛ kieel k’obekal wɛ. Kiri li okwɛn e Nziã ye li Muaan-emɛmɛɛ̃ ekieel ekal onse bviil. Asal a ndɛ akieel alweel ndɛ. 4 Bɔ akieel amwɛn osu o ndɛ, nkuũ a ndɛ ekieel ekal nkal ãmbwii ã bɔ. 5 Tsia kieel k’abekal bvool wɛ, bvool bɔ kieel k’abekal ye kɔɔ, onkyam li oyɔɔl o mbunda, onkyam li oyɔɔl o tal wɛ, ke ngwel wɛ, Mfam Nziã akieel ayɛɛl bɔ. Bɔ akieel akal y’okwɛn ɔ̃bu nkal ɔ̃bu.

6 Obobɔ, ãnzwel ãlieel mɛ̃ bubu: «Ãyɛɛn omɔ̃ ãli mã taa-taa bvool m’ãbvaan m’okiool. Mfam, wu Nziã wu abewa aliaal-ɛ̃kiɛɛn ãndɔɔ m’ebeyɛɛn bɔ, oyuɔɔl ãnzwel me ndɔɔ yi asuo asal a ndɛ ãndɔɔ m’ãsa ãya.

7 Yoo! Mɛ̃ ŋ’esa eya. Esɛ ngamfɛn ola wu ayoo ãyɛɛn m’ãfi ola Nziã bvool asa m’akel onse ɔ̃nkaan wu!»

8 Mɛ̃ wu Dzaã, mɛ̃ wu ngyoo bvool mwɛn ãndɔɔ omɔ̃. Ŋe ngyoo mɛ̃ bvool mwɛn mɔ̃, mɛ̃ mvi ãbuo ke nkwel ãnzwel m’ã́kesuo mɛ̃ mɔ̃, me ndɔɔ yi ebuɛɛn mɔ̃. 9 Kɛn ãnzwel ãlieel mɛ̃ bubu: «Oyɛɛ ke sa obobɔ wɛ! Mɛ̃ ndi kɛn a ndoo a yɛ wu ɔ̃sal ye wu andoo a yɛ b’aliaal-ɛ̃kiɛɛn a Nziã, ye wa b’alweel ãyɛɛn m’ɔ̃nkaan wu. Wu ebuɛɛn yɛ Nziã!»

10 Mɔ̃ bvool ãlieel mɛ̃ bubu: «Bee ãndɔɔ m’ãfi ola Nziã m’akel onse ɔ̃nkaan wu olwɔɔn, ke ngwel wɛ, lio ŋ’eyii esa ekoo. 11 Yɔɔl kwɛn wu oli ɔ̃bi, awɛɛl mpɛn m’obi obesa. Wa ye mbiin, awɛɛl mpɛn m’ãndɔɔ ã mbiin obesa! Wa dzu, awɛɛl mpɛn m’osa b’ãndɔɔ mã dzu! Wa ngel, awɛɛl mpɛn m’osa b’ãndɔɔ mã ngel!»

12 Yeso bvool olieel ndiri: «Yoo! Mɛ̃ ŋ’esa eya. Mɛ̃ eya y’ebva-kab e mɛ̃, me ndɔɔ yi ewa mbuul bwɛn a mbuul kyɛ m’emfa ki ɛ̃sal ɛ̃ ndɛ. 13 Mɛ̃ ndi Alefa y’Omega, wa nkwel ye wa mbee, obɛɛn y’osɛɛl.»

14 Esɛ ngamfɛn ola b’asuɔɔl ɛ̃nkuru ɛ̃ bɔ, me ndɔɔ yɛn awa bɔ nkuul yi adza esia li ɔ̃ti wu elaã, bvool yi asam onse bviil m’ɛ̃nywã ɛ̃ lɔ. 15 Kɛn amva, anga-ebel, anga-esio, abam, abuɛɛn b’etiɔ ye mbuul ɔ̃bi pyɛ wu odzii mfya bvool abetsoo yɔ, àkal onkwel-a-nzi.

16 Yeso olweel bubu: «Mɛ̃ wu Yeso, mɛ̃ ngyuɔɔl ãnzwel ã mɛ̃ me ndɔɔ yi atsweel byɛ ãndɔɔ m’ãtal ãbvɔɔn. Mɛ̃ wu ndi onge ɔ̃swɛɛn wu ɔ̃ti a David, ɔ̃tiɔɔl a ndɛ, ngam-a-ngam wu angal m’epal.»

17 Ɔ̃fel wu Ɔ̃nsensal y’ɔ̃kal ayɛɛn ndiri: «Ya!»

Yɔɔl kwɛn wu ayoo ayɛɛn ndiri: «Ya!»

Yɔɔl kwɛn wa ye nzuaal aya! Wu odzii k’anywã ãdza m’elaã, awal mɔ̃ ngwel!

18 Mɛ̃ wu Dzaã ewa ãnkunkwa me mbuul ɔ̃bi pyɛ wu ayoo ãndɔɔ m’ãfi ola Nziã, m’akel onse ɔ̃nkaan wu. Okɛɛn mbuul olweel ndɔɔ onse mɔ̃, Nziã àlweel ndɛ eyiri bvi asuo onse ɔ̃nkaan wu. 19 Okɛɛn hɛ̃ mbuul ombaal ndɔɔ onse ãndɔɔ m’ãfi ola Nziã, m’akel onse ɔ̃nkaan wu, Nziã àmbaal boo li ndɛ li nsia yi ɔ̃ti wu elaã bvool akii ndɛ nkuul yi asam onse Bviil li Ngel, m’emfa ki akel onse ɔ̃nkaan wu.

20 Wu atsweel ãndɔɔ mã olieel ndiri: «Ngwanya, mɛ̃ ŋ’esa eya!»

Amɛn! Mfam Yeso, ya!

21 Yɔɔl kwɛn Mfam Yeso asio byɛ bueel nyiĩ!