1 Yeso oyɛɛn bubu: «Taa-taa bam, mɛ̃ eyɛɛn byɛ wɛn, mbuul wɛn k’asam onse ekɔɔ ki emɛmɛɛ̃ m’ɔ̃nywã a kyɛ wɛ, kɛn a ndɛ owueel kyɛ ke mboo nkyam, ndɛ ondɛ oli mbuul a pfuul, bvool oli edzuul. 2 Kɛn a wu asam m’ɔ̃nywã, oli ɔ̃mbuaal a emɛmɛɛ̃. 3 Ndɛ ondɛ, wu edzweel ɔ̃nkiaal edzoo, emɛmɛɛ̃ eyoo nkii a ndɛ. Ndɛ ata emɛmɛɛ̃ e ndyam mbel m’ãnkuũ ã bvɛ, bvool abiri bvɛ onkwel-a-nzi. 4 Ŋ’epaal ndɛ bvɛ bvieel nkwel-a-nzi, ndɛ adzuu ke nkwel a bvɛ. Emɛmɛɛ̃ eluɛɛn a ndɛ, ke ngwel wɛ bvɛ eyɛɛ nkii a ndɛ. 5 Bvɛ k’èluɛɛn ɔ̃nzii bam wɛ, bvɛ èbal ndɛ, ke ngwel wɛ bvɛ k’eyɛɛ nkii a anzii wɛ.» 6 Yeso olieel bɔ ãyɛɛn omɔ̃ m’ãmboo, kɛn a bɔ k’akwaal m’ékeyɛɛn ndɛ otsɛn wɛ.

7 Yeso bvool olieel bɔ ndiri: «Taa-taa bam, mɛ̃ eyɛɛn wɛn, mɛ̃ wu ndi edzoo ki emɛmɛɛ̃. 8 Baal bueel b’ayi nkwel a mɛ̃ ali baal a pfuul, bvool ali edzuul. Kɛn emɛmɛɛ̃ k’eyoo bɔ wɛ. 9 Mɛ̃, mɛ̃ ndi edzoo: Okɛɛn mbuul osam me mɛ̃, ndɛ àbvuul. Ndɛ àsam, àpal, bvool àbɔɔ bvi-odza. 10 Mbuul a pfuul abeya kɛn a m’oturu, m’obam, bvool m’otsal. Mɛ̃, mɛ̃ ngyi, me ndɔɔ yɛn baal akal y’elaã, akal ye lɔ lam ngamfɛn. 11 Mɛ̃ wu ndi ɔ̃mbuaal a emɛmɛɛ̃ wa ngesɛ. Ɔ̃mbuaal a emɛmɛɛ̃ wa ngesɛ akab omwiĩ o ndɛ me ndɔɔ emɛmɛɛ̃ e ndɛ. 12 Ŋ’emwɛn mbuul wu awel m’owal enga-mbwel ayeya, ndɛ wɛn k’ali ɔ̃mbuaal wɛ, bvool wɛn emɛmɛɛ̃ hɛ̃ k’eli bvi ndɛ wɛ, ndɛ adzam ntiin ayiri emɛmɛɛ̃. Oŋɔ̃ enga-mbwel eyiool me bvɛ, bu etsal bvɛ. 13 Ndɛ wu awel me ndɔɔ ɔ̃sal, ndɛ k’akɛɛ emɛmɛɛ̃ nguo wɛ. 14 Mɛ̃ wu ndi ɔ̃mbuaal a emɛmɛɛ̃ wa ngesɛ. Mɛ̃ ngyɛɛ emɛmɛɛ̃ e mɛ̃, emɛmɛɛ̃ e mɛ̃ hɛ̃ eyɛɛ mɛ̃. 15 Emfa ngemɔ̃ kyɛn, Taal oyɛɛ mɛ̃, bvool kyɛn mɛ̃ hɛ̃ ngyɛɛ Taal, mɛ̃ ekab elaã e mɛ̃ me ndɔɔ a emɛmɛɛ̃ e mɛ̃. 16 Mɛ̃ kɛn ndi y’emɛmɛɛ̃ ekyam bvɛn k’eli onse ekɔɔ ki wɛ. Bvɛ obvɛ, ebvaan mɛ̃ ebiri bvɛ hɛ̃. Bvɛ ekieel eyoo nkii a mɛ̃. Obobɔ, bvɛ ekieel ekal nkel ngamɔ̃, bvool ekal ɔ̃mbuaal ngɔmɔ̃. 17 Okɛɛn Taal odzii mɛ̃, me ndɔɔ yɛn mɛ̃ ekab elaã e mɛ̃, m’owal o lɔ bvool. 18 Mbuul si ngɔmɔ̃ k’akoo m’ombaal o mɛ̃ lɔ wɛ, kɛn a myam mbuul wu ewa lɔ m’ãtsam ã myam. Mɛ̃ ndi y’omfam b’ewa lɔ, mɛ̃ hɛ̃ ndi y’omfam b’ewal lɔ bvool. Obɔ ontam b’etam Taal mɛ̃.» 19 Okab bvool osam onse Ayuda me ndɔɔ ãyɛɛn omɔ̃. 20 Bibi onse bɔ ákeyɛɛn ndiri: «Ndɛ oli y’ɔ̃fel wu ɔ̃bi-ɔ̃bi, ndɛ oli y’owool, ki eyoo byɛ ndɛ emã?» 21 Bakyɛ ákeyɛɛn ndiri: «Ãyɛɛn omɔ̃ k’ãli mã mbuul wa y’ɔ̃fel wu ɔ̃bi-ɔ̃bi wɛ. Ɔ̃fel wu ɔ̃bi-ɔ̃bi lɔɔ-okal okoo k’adzweel mviil m’ɛ̃nkwa-mviil?»

22 Ŋ’esa oŋɔ̃, abɛɛl pfuun li osuɔɔl o nzɔ a Nziã ke Yelusalem. Éli me lio li mfyɛ. 23 Yeso ákedzuu onse ekɔɔ e Nzɔ a Nziã ke pfoo a Salomɔ̃. 24 Ayuda bu adzii ndɛ, bvool alieel ndɛ bubu: «Yɛ bee ɛ̃kwal ke ywel tiil mpanki asuul? Okɛɛn Mãsia yɛ, mpii liaal bee ndɔɔ kal-a-kal!» 25 Yeso obveel bɔ ndiri: «Mɛ̃ ngyɛɛn byɛ yɔ, byɛ k’ekiool wɛ. Ki etsweel mɛ̃, eli ɛ̃sal mi esa mɛ̃ ndyam me nkuũ a Tal a mɛ̃. 26 Kɛn okɛɛn byɛ bam k’ekiool wɛ, me ndɔɔ yɛn byɛ k’eli ba nkel a emɛmɛɛ̃ e mɛ̃ wɛ. 27 Emɛmɛɛ̃ e mɛ̃ ebeyoo nkii a mɛ̃. Mɛ̃, mɛ̃ ngyɛɛ bvɛ, bvool bvɛ ebeluɛɛn a mɛ̃. 28 Mɛ̃ ndyam ewa bɔ elaã li ɔ̃bu nkal ɔ̃bu. Bɔ kieel k’adziɔɔn bam wɛ, bvool mbuul si ngɔmɔ̃ k’akoo k’awɛɛl bvɛ me mviɔɔl ɛ̃ mɛ̃ wɛ. 29 Ki ewi Taal mɛ̃ enduru bvieel. Mbuul k’akoo m’owɛɛl o kyɛ me kuɔɔl e Taal wɛ. 30 Mɛ̃ ye Taal eli mbuul ngɔmɔ̃.» 31 Ayuda bvool atwel ãnkɔɔn m’obam o Yeso me mɔ̃. 32 Yeso olieel bɔ bubu: «Mɛ̃ nsuo byɛ ɛ̃sal mi ngesɛ bibi mi ɛ̃fi ola Taal. Onse ɛ̃sal omyɛ̃, wu ebam byɛ mɛ̃ m’ãnkɔɔn me ndɔɔ a ndɛ wɛn?» 33 Ayuda abveel ndɛ ndiri: «Ki ebam yɛ bee yɛ m’ãnkɔɔn, ke me ndɔɔ ɔ̃sal wa ngesɛ wɛ, me ndɔɔ yi esiaan yɛ nkuũ a Nziã, ke ngwel wɛ, yɛ okal mbuul, yɛ ayɛɛn wɛn yɛ li Nziã!» 34 Yeso obveel bɔ ndiri: «Ákel onse Ngel a byɛ ndiri: "Mɛ̃, mɛ̃ ngyɛɛn wɛn: Byɛ eli anziã!✝" K’obobɔ. 35 Okɛɛn Nziã oti b’ékeyɛɛn endɔɔ e ndɛ me ndɔɔ a bɔ m’anziã, k’akoo m’ombaal o m’ákel wɛ. 36 Bɛn byɛ, byɛ eyɛɛn wu éfaal Tal bvool áyuɔɔl ndɛ onse ɔ̃kiri wɛn: "Yɛ asiaan Nziã!" me ndɔɔ yi ngyɛɛn mɛ̃ wɛn: "Mɛ̃ ndi Muaan a Nziã!" 37 Okɛɛn mɛ̃ k’esa ɛ̃sal ɛ̃ Tal a mɛ̃ wɛ, ebee mɛ̃ okiool. 38 Kɛn okɛɛn mɛ̃ esa ɛ̃sal ɛ̃ Taal, onkyam ŋɛn byɛ k’ekiool mɛ̃ wɛ, ekiool si ekal ɛ̃sal, eyɛɛ bvool okwaal otsɛn wɛn, Taal oli onse mɛ̃, mɛ̃ hɛ̃ ndi onse taal.» 39 Bɔ bvool abii k’asiin ndɛ, kɛn a ndɛ osuɛɛn onse mviɔɔl ɛ̃ bɔ. 40 Ndɛ okɔɔl ongwel a Dzolodɛ̃, ke mboo yi éwi Dzaã baal opongo tsɔɔn, bvool okal oŋɔ̃. 41 Baal bibi ayi ola ndɛ. Bɔ ákeyɛɛn ndiri: «Dzaã k’asi emvieel si ngemɔ̃ wɛ, kɛn a mbueel m’éyɛɛn ndɛ me ndɔɔ a mbuul wu ã́li taa-taa.» 42 Etɔ oŋɔ̃, baal bibi alɔ okiool onse Yeso.