1 Kɛn a me lio olɔ, baal ayewa Yeso nsia ndiri: «Pilate atam baal a Ngalile obam, me lio li ekewa bɔ Nziã ãkab.» 2 Yeso obveel bɔ bubu: «Byɛ ŋ’etsam wɛn baal a Ngalile b’abam m’emfa okyɛ, b’anduru baal a Ngalile bakyɛ m’ãbi? 3 Hɛɛ̃-hɛ̃! Kɛn a mɛ̃ eyɛɛn byɛ wɛn ŋɛn byɛ k’ekaal ɛ̃kwal ɛ̃ byɛ wɛ, byɛ èkwa bam bueel onge bɔ. 4 Emeetsam me ndɔɔ a baal kuun ye mpuɔ̃ b’ákwi ŋ’ébvi nzɔ yi ɛ̃kiri-ɛ̃kiri yi Silohe: Bɔ b’ánduru baal bam bueel ba Yelusalem m’ãbi? 5 Hɛɛ̃-hɛ̃! Kɛn a mɛ̃ bvool eyɛɛn byɛ wɛn: Okɛɛn byɛ k’ekaal ɛ̃kwal ɛ̃ byɛ wɛ, byɛ èkwa bam bueel onge bɔ.»

6 Obobɔ, Yeso bvool oti bɔ mboo yi: «Mbuul ngɔmɔ̃ áli y’ɔ̃ti wa fig onse nguun a ndɛ yi bvine. Tsoo ngelemɔ̃, ndɛ oyi nsia yi ɔ̃ti ondɛ oka, kɛn a ndɛ ki abɔɔ pyɛ. 7 Obobɔ, ndɛ oyɛɛn ɔ̃sal a ndɛ ndiri: "Yɛ amwɛn! Mvel tyel yɔ bu yɛn mɛ̃ ebeya nsia y’ɔ̃ti wa fig wu obii, kɛn a mɛ̃ ki ebebɔɔ pyɛ. Oŋɔ̃ tsiil kɛn a ndɛ! Ke ngwel wɛ, ndɛ abekɔɔn mboo yi ngwel." 8 Ɔ̃sal obveel ndɛ bubu: "Mfam! Meyɔɔl ndɛ kɛn amekal bvool mvel wu, kwɛn oŋɔ̃ mɛ̃ nsam nsie yiɛɛ-kɔ k’etsɛn e ndɛ, bvool ndɔ ãsɔɔ oŋɔ̃. 9 Owɛɛl ndɛ okoo k’aburu me mvel wu àya, okɛɛn pyɛ, oŋɔ̃ mpii yɛ bu tam kɛn a ndɛ otsiil."»

10 Me tsoo li saba, Yeso áketee onse nzɔ a ãbuɛɛn. 11 Ŋ’esa oŋɔ̃, éli y’ɔ̃kaal ngɔmɔ̃ wɛn ɔ̃fel wu ɔ̃bi-ɔ̃bi áwi elyam ki émeesa ye ndɛ mvel kuun ye mpuɔ̃. Ndɛ ákekal kɛn ɔ̃nguo ebva, bvool k’ákekoo k’asiool dzu si m’etsi-tsiri wɛ. 12 Ŋ’emwɛn Yeso ɔ̃kaal ondɛ, ndɛ oti ndɛ mbel, bvool oyɛɛn ndɛ ndiri: «Ngu, oluu o yɛ ŋ’ofi!» 13 Obobɔ, ndɛ ondɔɔl ndɛ mviɔɔl. Kɛn a me lio olɔ, ɔ̃kaal ondɛ osiool dzu, bu abvi Nziã olweel. 14 Ŋ’emwɛn mfam a nzɔ a ãbuɛɛn obobɔ, ndɛ oyoo nkyee bibi, me ndɔɔ yɛn Yeso obvuul mbuul me tsoo li saba. Kɛn a ndɛ osɔɔn embuul ki eli oŋɔ̃, bu ayɛɛn ndiri: «Eli y’ãtsoo ãsɛɛn m’ɔ̃sal, ebvaan kwɛn byɛ eya ãnzuru ã byɛ oboo m’ãtsoo omɔ̃, ke me tsoo li saba wɛ!» 15 Kɛn a Mfam obveel ndɛ bubu: «Baal ba nzɛɛn-yuaal mpii byɛ! Me tsoo li saba, byɛ ndoo mbuul bwɛn a mbuul abenyiɔɔn ngwɛmbɛ wuo ane a ndɛ swɛ, me ndɔɔ yi abiri ndɛ ke mboo yi anywã ãdza, mfya? 16 K’ɔ̃kaal wu, ndɛ mpii wa yam li Abalayam, bvool wu ésuul Ɔ̃pfu m’okuru fa mvel kuun ye mpuɔ̃. Bɛn kɛn k’ekeenyiɔɔn ndɛ me tsoo li saba wɛ?» 17 Me lio li eyɛɛn Yeso obobɔ, ataal a ndɛ bam bueel opfuru obɔɔ bibi, kɛn embuul ki éli oŋɔ̃ eluul m’esɛ m’ãndɔɔ m’ɛ̃kam m’ékesa ndɛ.

18 Yeso bvool oyɛɛn ndiri: «Okwɛn o Nziã onge emã oli? Mɛ̃ bɔ onge emã ememvɛɛl? 19 Bɔ mpii m’emfa ki oli: Mbuul ngɔmɔ̃ owel esia li mutaade, okwɛn lɔ onse nguun a ndɛ. Lɔ emɛn, eyii ɔ̃ti, bvool anywɛn ayetuu ãnzɔ onse ãpɔɔ̃ ã ndɛ.»

20 Yeso olweel ndiri: «Mɛ̃ Okwɛn o Nziã bvool y’eluɔ emã emvɛɛl? 21 Bɔ oli onge lebviil etsi-tsiri li ewel ɔ̃kaal ngɔmɔ̃, bu anzoo lɔ onse faline li boo-boo, ke mbee oŋɔ̃ pɔtɔ-pɔtɔ ndyam wueel ofel.»

22 Ŋ’ékeyi Yeso Yelusalem, ndɛ ákebwel onse ãbviil y’ãla bvool áketee. 23 Mbuul ngɔmɔ̃ ofuul ndɛ ndiri: «Mfam, ɔ̃bvɛn a baal b’ekieel ebvuul Nziã kieel akal kɛn ɔ̃tsi-tsiri?» Yeso obveel bɔ bubu: 24 «Esa mpɛn, me ndɔɔ yi esam m’ɔ̃nywã a nzɔ wu ɔ̃tsi-ɔ̃tsi, ke ngwel wɛ mɛ̃ eyɛɛn byɛ wɛn, bibi akieel abii k’asam, kɛn a bɔ k’àkoo m’osam wɛ.

25 Ŋ’èkoo lio, mfam a nzɔ àtɛɛn, bvool àwɔɔl yɔ. Okɛɛn byɛ esiil onkwel-a-nzi, byɛ ol’ebɛɛl edzoo, bvool ol’eluɔɔn ndiri: "Mfam, Mfam, dzweel bee nzɔ!" Kɛn a ndɛ ol’obveel byɛ ndiri: "Mɛ̃ ke ngyɛɛ byɛ wɛ, byɛ bam kwɛn efi!" 26 Kɛn a byɛ ol’ebvi ndɛ oyɛɛn ndiri: "Bee mpii édzi, énywi ye yɛ, yɛ mpii áketee onse abal-bal a bviil e bee." 27 Ndɛ bvool ol’obveel byɛ ndiri: "Mɛ̃ ke ngyɛɛ byɛ wɛ, embal bam tsotsoo a mɛ̃, byɛ baal b’ãbi eli!" 28 Oyɔ mboo yɛn byɛ ekieel elel, bvool edza miin me lio li èmwɛn byɛ Abalayam, y’Isak, ye Dzakab, bvool y’aliaal-ɛ̃kiɛɛn a Nziã bam bueel onse Okwɛn o Nziã. Kɛn a byɛ, àtyal byɛ onkwel-a-nzi! 29 Baal àfa etswi ki epal tal ye ki edziin lɔ, àfa nkio ye nsɛn. Bɔ àyewal ãmboo, me ndɔɔ yi adza onse Okwɛn o Nziã. 30 M’emfa okyɛ, baal bakyɛ bɛn me lio li ali ke mbee, akieel akal ke nkwel, bakyɛ bɛn me lio li ali ke nkwel, akieel akal ke mbee.»

31 Kɛn a me lio olɔ, Afalisaye ke kwɛ asyel tsotsoo a Yeso, bu awi ndɛ ãnkunkwa bubu: «Pal onse nsie yi, yi li yam lela ye ŋã, ke ngwel wɛ Elode odzii k’abam yɛ.» 32 Ndɛ obveel bɔ bubu: «Eyeyɛɛn mbuul wu ãyal ãbi onge mbwel*13.32 M’ɔ̃nywã wa Ngelek, mbwel, nyam wu asuo ndiri mbuul wɛn otsɛn pyɛ, wuo mbuul wu abetsal ãkel ã baal a ndyam. ondɛ ndiri mɛ̃ ngyɛɛn wɛn: "Nonɔ̃, mɛ̃ etswɛɛl ɛ̃fel mi ɛ̃bi-ɛ̃bi bvool eboo anga-ãluu. Ɔ̃suu, mɛ̃ bvool èsa obobɔ. Ongwel ɔ̃suu, mɛ̃ ol’emeembɛɛl ɔ̃sal a mɛ̃." 33 Kɛn a nonɔ̃, y’ɔ̃suu, y’ongwel ɔ̃suu, ebvaan kwɛn mɛ̃ enɔɔn nkuul a mɛ̃. Ke ngwel wɛ, obvie abam ɔ̃liaal-ɛ̃kiɛɛn a Nziã kɛn a ke Yelusalem.

34 Aa, baal a Yelusalem! Baal a Yelusalem! Byɛ b’ebebam aliaal-ɛ̃kiɛɛn a Nziã, b’ebetyal baal b’eyuɔɔl Nziã byɛ ãnkɔɔn! Nsa kwɛ yi édzii mɛ̃ k’ebvool byɛ tsotsoo a mɛ̃ onge b’epfee nswee baan onse ãpab! Kɛn a byɛ k’énzii obobɔ wɛ! 35 Oŋɔ̃, nzɔ a byɛ, ŋ’àyiri yɔ me byam, mɛ̃ eyɛɛn byɛ bam wɛn: Byɛ k’èbemwɛn mɛ̃ bam wɛ, tiil lio li ekieel eyɛɛn byɛ wɛn: "Yɔɔl kwɛn wu aya me nkuũ a Mfam Nziã akal y’ondɔɔl o kuɔɔl!"»