Lucas 22

Piɛɛl otwɛn Yeso

54 Ke mbee a ŋ’esiin bɔ Yeso, bɔ abiri ndɛ, bvool aswɛɛl ndɛ onse nzɔ a ngaa-a-Nziã wu ɔ̃nɛn. Piɛɛl ákeluɛɛn a ndɛ lela. 55 Bɔ abvool mbaa kal-a-kal ekɔɔ, bu abvi nsɛn. Piɛɛl hɛ̃ ábvi nsɛn onse bɔ. 56 Ɔ̃sal ngɔmɔ̃ wu ɔ̃kaal omwɛn ndɛ me nsɛn nku-a-nku a mbaa, ndɛ olɔ ndɛ etɔ, bvool olieel bubu: «Mbuul wu hɛ̃ áli ye ndɛ!» 57 Kɛn a Piɛɛl otwɛn ndiri: «Ngu, mɛ̃ ke ngyɛɛ ndɛ wɛ!»

58 Ke mbee ãlio ke kwɛ, mbuul ɔ̃kyam omwɛn ndɛ, bvool olieel ndɛ ndiri: «Yɛ bam li ngɔmɔ̃ onse ayio a mbuul wu.» Piɛɛl otwɛn ndiri: «Mfya, mɛ̃ ke ndi ɔ̃yio a ndɛ wɛ!» 59 Ke mbee a nku-a-nku a lio ngelemɔ̃, mbuul ɔ̃kyam bvool oyɛɛn bam y’ɔ̃tɛɛ̃ ndiri: «Taa-taa bam, mbuul wu hɛ̃ áli ye ndɛ, ke ngwel wɛ ndɛ oli ɔ̃fi-Ngalile.» 60 Piɛɛl bu abveel mbuul ondɛ ndiri: «Ke-bwɛn-ndoo, mɛ̃ ke ngyɛɛ b’edzii yɛ oyɛɛn wɛ.» Kɛn a me lio li ékeyɛɛn ndɛ, nswee okueel.

61 Obobɔ, Mfam okɔɔl otal ndɛ yuul. Piɛɛl bu ayeel ãyɛɛn m’éyɛɛn Mfam ndɛ ndiri: «Ye k’ekuaal nswee nonɔ̃, yɛ àtwɛn nsa tyel wɛn yɛ ke yɛɛ mɛ̃ wɛ.» 62 Piɛɛl bu apal nkwel-a-nzi, obvi elel obool y’ãwua mbueel.