1 ପାରସ୍ୟନି ରାଜା କରସ୍‌ନି ଆଦିକାର୍‌ନି ତିନ୍‌ ବାର୍ହୁତ ବେଲ୍‌ଟସତ୍ସର୍‌ ତର୍‌ଦ ଜାଣାଚିନା ଦାନିୟେଲ୍‌ତି କାଜିଂ ର ବିସ୍ରେ ହତାତ୍‌ ଆରି ହେଦାଂ ହାତ୍‌ପା, ହେଦାଂ ର ଗାଜାଜୁଜ୍‌ ବିସ୍ରେ; ଆରେ, ହେୱାନ୍‌ ହେଦାଂ ବୁଜାତାନ୍‌ ଆରି ହେ କ୍ଡେଚ୍‌କଣ୍‌ ବିସ୍ରେ ତାଂ ପୁନ୍ୟା ଆତାତ୍‌ । 2 ହେ ୱେଡ଼ାଲିଂ ଆନ୍‌, ଦାନିୟେଲ୍‌, ବାର୍ତି ତିନ୍‌ ହପ୍ତା ପାତେକ୍‌ ଆଡ଼୍‌ବିସ୍‌ମାଚାଙ୍ଗ୍‌ । 3 ବାର୍ତି ତିନ୍‌ ହପ୍ତା ୱିଜ଼୍‌ନି ପାତେକ୍‌ ଆନ୍‌ ଇମ୍‌ଣାକାପା ହାର୍‌କାଦି ତିନ୍‌ୱାତାଂ, କିବା ଜେଇ କିବା ଅଙ୍ଗୁର୍‌ରାସ୍‌ ନା ୱେଇଦ ହଣ୍‌ୱାତାତ୍‌, କିବା ଆନ୍‌ ମୁଡ଼େ ଚିକାଣ୍‌ କାସ୍‌ଆ ଆୱାତାଂ ।

4 ଆରେ, ପର୍‌ତୁମ୍‌ ମାସ୍‌ନି କଡ଼େଚାର୍‌ ଦିନ୍‌ତ ଆନ୍‌ ହିଦେକଲ୍‌ ତର୍‌ନି ଗାଜାନାଗୁଡ଼୍‌ ଗୁଟିତ ମାନି ୱେଡ଼ାଲିଂ, 5 ଆନ୍‌ କାଣ୍‌ଗା ଜେସି ହୁଡ଼୍‌ତାଂ, ଆରେ ହୁଡ଼ାଟ୍‌, ଡ଼ିଞ୍ଜ୍‌ନି ହେନ୍ଦ୍ରା ଉସ୍ପିତି ର ମାନାୟ୍‌, ତା ମ୍ଡେଙ୍ଗାଙ୍ଗ୍‌ ଉପାସ୍‌ ନିର୍ମଲ ହନା ଗାଚ୍‌ନିତ ଗାଚ୍ୟା ଆଜ଼ି ମାଚାତ୍‌; 6 ପା ତା ଗାଗାଡ଼୍‌ ହନାହାସ୍‌କୁ ଲାକେ ଆରି ତା ମୁମ୍‌ ବିଜ୍‌ଲି ଲାକେ ଆରି ତା କାଣ୍‌ଗା ଆହ୍‌ନି; ଜୁଜ୍‌ରା ଲାକେ, ଆରେ ତା କେଇ ଆରି ପାନା ନିର୍ମଲ୍‌ ପିତାଡ଼୍‌ ଲାକେ ଅଜଡ଼୍‌ ଆରି ତା ବଚନ୍‌ନି କାଟ୍‌ ମାନାୟ୍‌ରାନ୍‌ନି କାଟ୍‌ ଲାକେ । 7 ଆରେ, ଆନ୍‌ ଦାନିୟେଲ୍‌, ରୱାଙ୍ଗ୍ ହେ ଦର୍‌ସନ୍ ହୁଡ଼୍‌ତାଂ; ଇନାକିଦେଂକି ନା ହାଙ୍ଗ୍‌ଦି ଲକୁ ହେ ଦର୍‌ସନ୍‌ ହୁଡ଼୍‌ୱାତାର୍‌; ମତର୍‌ ହେୱାର୍‌ ବେସି କମ୍ପା ଆତାର୍‌ ଆରି ଜାର୍‌ ଜାର୍‌ତିଂ ଡ଼ୁକ୍‌ନି କାଜିଂ ହନ୍ତାର୍‌ । 8 ହେବେ ଆନ୍‌ ରୱାଙ୍ଗ୍‌ ମାନ୍‌ଜି ଇ ଗାଜା ଦର୍‌ସନ୍‌ ହୁଡ଼୍‌ତାଂ ଆରି ନାତାକେ ମୁଡ଼େ ବାଡ଼୍‌କାସ୍‌ ମାନ୍‌ୱାତାତ୍‌; ଇନାକିଦେଂକି ନା ଅଜଡ଼୍‌ ଜିରାନିତ ମେହା ଆତାତ୍‌ ଆରି ଆନ୍‌ ମୁଡ଼େ ବାଡ଼୍‌କାସ୍‌ ଇଟ୍‌ଦେଂ ଆଡ୍‌ୱାତାଂ । 9 ଆତିସ୍ପା ଆନ୍‌ ତା କାତାନି କାଟ୍‌ ୱେଚାଙ୍ଗ୍‌; ଆରେ, ଏଚେକାଡ଼୍‌ଦ ଆନ୍‌ ହେୱାନ୍ତି ବଚନ୍‌ କାଟ୍‌ ୱେଚାଙ୍ଗ୍‌, ହେପାଦ୍‌ନା ଆନ୍‌ ଗୁର୍‌ଜି ଜବର୍‌ ହୁଚ୍‌କାଣ୍‌କୁତ ଗୁର୍‌ଜିମାଚାଙ୍ଗ୍‌ । 10 ଇବେ ହୁଡ଼ାଟ୍‌, ର କେଇ ଡୁଜ଼ି ନାଂ ମେଣ୍ଡା ଆରି ପାଟାକେଇତ ବାର୍‌ସା କିୟ୍‌କିତ୍‌ତାତ୍‌ ।

11 ଆରେ, ହେଦେଲ୍‌ ନାଂ ଇଞ୍ଚାତ୍‌, ଏ ବେସି ୱାରିନିଲଗୁ ଦାନିୟେଲ୍‌, ଆପ୍‌ ନିଂ ଇମ୍‌ଣି ଇମ୍‌ଣି କାତା ଇଞ୍ଜ୍‌ନାପ୍‌, ହେଦାଂ ବୁଜାଆ ଆରି ହାଣ୍‌କୁ ଆଜ଼ି ନିଲା; ଇନାକିଦେଂକି ନଂ ଆପ୍‌ ନି ଲାଗାୟ୍‌ ପକ୍ୟା ଆତାପ୍‌ନା; ହେଦେଲ୍‌ ନାଂ ଇ କାତା ଇଞ୍ଚିଲେ ଆନ୍‌ ତ୍ରିଗ୍‌ଜି ତ୍ରିଗ୍‌ଜି ନିଲ୍‌ତାଂ ।

12 ଇବେ ହେଦେଲ୍‌ ନାଂ ଇଞ୍ଚାତ୍‌, ଏ ଦାନିୟେଲ୍‌, ପାଣ୍ଡ୍ରା ଆମା; ଇନାକିଦେଂକି ଏନ୍‌ ଇମ୍‌ଣି ପର୍‌ତୁମ୍‌ ଦିନ୍‍ତାଂ ବୁଜାନି କାଜିଂ ଆରି ନି ପର୍‌ମେସ୍ୱର୍‌ତି ମୁମ୍‌ଦ ଜାର୍‌ତିଂ ହୁଦାର୍‌ କିନି କାଜିଂ ଜାର୍‌ ମାନ୍‌ଦିୟାନ୍‌ କିତାୟ୍‌, ହେ ଦିନ୍‌ତାଂ ନି କାତା ୱେନ୍ୟାତାତ୍‌: ଆରେ, ନି କାତା କାଜିଂ ଆନ୍‌ ୱାତାଙ୍ଗ୍‌ନା । 13 ମତର୍‌ ପାରସ୍ୟ ରାଜିନି ଆଦିକାରି କଡ଼େଏକ୍‌ ଦିନ୍‌ ପାତେକ୍‌ ମାଦାଂ ଉଲ୍‌ଟିବାଦା କିତାନ୍‌; ମତର୍‌ ହୁଡ଼ା, ମୁଡ଼୍‌ ଆଦିକାରିର୍‌ତି ବିତ୍ରେତାଂ ମିକାୟେଲ୍‌ ତର୍‌ଦ ରୱାନ୍‌ ମାଦାଂ ଉପ୍‍କାର୍‌ କିଦେଂ ୱାତାନ୍‌; ଆରେ, ଆପ୍‌ ହେ ବାହାତ ପାରସ୍ୟନି ରାଜାର୍ ଲାହାଂ ମାଚାପ୍‌ । 14 ନଂ, ହାରିହାରା କାଡ଼୍‌ଦ ଲକୁତି କାଜିଂ ଇନାକା ଗିଟାନାତ୍‌, ହେଦାଂ ନିଂ ବୁଜାୟ୍‌କିଦ୍‌ନି କାଜିଂ ଆପ୍‌ ୱାତାପ୍‌ନା; ଇନାକିଦେଂକି ଦର୍‌ସନ୍‌ ଆରେ ଆଦେକ୍ କାଡ଼୍‌ ପାତେକ୍ ମାନାତ୍‌ । 15 ହେଦେଲ୍‌ ନାଂ ଇଲାକେ କାତା ଇନ୍‌ଞ୍ଚି ପାଚେ ଆନ୍‌ ବୁଇଁ ନିପ ମୁମ୍‌ କିଜ଼ି କାବା ଆତାଂ । 16 ଇବେ ହୁଡ଼ାଟ୍‌, ମାନାୟ୍‌ ହିମ୍‌ଣାଂନି ଲାକେ ର ମୁଣିକା ନା ୱେୟ୍‌ଅଟି ଡୁଦ୍‌ତାନ୍‌; ହେବେ ଆନ୍‌ ଜାର୍‌ ୱେଇ ଜେସି ନା ମୁମ୍‌ଦ ନିଲ୍‌ତି ମୁଣିକାଂ ଇଚାଙ୍ଗ୍‌, ଏ ନା ମାପ୍ରୁ, ଇ ଦର୍‌ସନ୍‌ କାଜିଂ ନା ନନାକା ନାଂ ଆସ୍ତାତାତ୍‌ନା ଆରି ଆନ୍‌ ମୁଡ଼େମତର୍‌ ବାଡ଼୍‌କାସ୍‌ ରକ୍ୟା କିଦେଂ ଆଡୁଙ୍ଗା । 17 ଇନାକିଦେଂକି ନା ଇ ମାପ୍ରୁତିନି ଆଡ଼୍‌ୟା ଇନେସ୍‌ବାନି ଇ ନା ହାଉକାର୍‌ ଲାହାଂ କାତାବାର୍ତା କିଦେଂ ଆଡ୍‍ନାଂ ? ହେଦାପ୍ରେ ନା ତାକେ ମୁଡ଼େ ବାଡ଼୍‌କାସ୍‌ କି ନା ବିତ୍ରେ ପୁଣ୍ଡା ମାନ୍‌ୱାତାତ୍‌ ।

18 ହେଏଚେକାଡ଼୍‌ଦ ମାନାୟ୍‌ନି ଲାକେ ରୱାନ୍‌ ଲଗୁ ଆରେରଗ ନାଂ ଡୁଜ଼ି ବାଡ଼୍‌କାସ୍‌ କିତ୍‌ତାନ୍‌ । 19 ଆରେ, ହେୱାନ୍‌ ଇଚାନ୍‌, "ଏ ବେସି ୱାରିନିଲଗୁ ମାନାୟ୍‌, ପାଣ୍ଡ୍ରାମା; ନି ସୁସ୍ତା ଆୟେତ୍‌, ବାଡ଼୍‌କାସ୍‌ ଆ, ବାଡ଼୍‌କାସ୍‌ ଆ!" ହେୱାନ୍‌ ନାଂ ଇଦାଂ ଇଞ୍ଚିଲେ, ଆନ୍‌ ବାଡ଼୍‌କାସ୍‌ ଆଜ଼ି ଇଚାଙ୍ଗ୍‌, "ନା ମାପ୍ରୁ ଇଞ୍ଜା ଇନାକିଦେଂକି ଏନ୍‌ ନାଂ ବାଡ଼୍‌କାସ୍‌ କିତ୍‌ତାୟ୍‌ନା ।"

20 ହେବେ ହେୱାନ୍‌ ଇଞ୍ଚାନ୍‌, "ଆପ୍‌ ଇନାକିଦେଂ ନି ଲାଗାୟ୍‌ ୱାତାପ୍‌ନା, ହେଦାଂ କି ଏନ୍‌ ପୁନାୟ୍‌ ? ନଂ ଆପ୍‌ ପାରସ୍ୟନି ଆଦିପତି ଲାହାଂ ଜୁଜ୍‌ କିନି କାଜିଂ ମାସ୍‌ଦି ହାନାପ୍‌; ଆରେ, ଆପ୍‌ ହତିସ୍‌, ହୁଡ଼ା, ଗ୍ରିସ୍‌ନି ଆଦିପତି ୱାନାନ୍‌ । 21 ମତର୍‌ ହାତ୍‌ପା ପତିତ ଇନାକା ଲେକା ଆତାତ୍‍ନା, ହେଦାଂ ଆପ୍‌ ନିଂ ୱେଚ୍‌ଚାନାପ୍‌; ଇୱାର୍ତି ବିରୁଦ୍‌ତ ମାଦାଂ ଉପ୍‌କାର୍‌ କିନି କାଜିଂ ମି ଆଦିକାର୍‌ ମିକାୟେଲ୍‌ ପିସ୍ତି ଆରେ ଇନେର୍‌ ହିଲୁର୍‌ ।"