1 Pecai penui tetpwa Jerusalem namdi tai Olive Deutu ga Bethphage* penai Bethany nam ga gwanglu, ge Jisu ledeukelume hangna de langgai 2 nah penai dage rangdi, "Mie anuide mcwakebam nam ga lütlo. Nnai cika lütlu siakte pedwa migede cwakemak gada nage de keupwa kebam nnai ngaulu zie. Cide hiaklwe a da teugwang lo. 3 Magade mikangge nnaide, ‘Nnai daitei aide tei lano?’ de eh keteucai, nnai, ‘Rampaube cide teu maisia zeulie, nah aika lang caili zette dai beuzie,’" de ranglu. 4 Cine penai gwang ge puidiki mbie ga kikam ge caiga gada nage de keupwa bam eh ngaulu, nah penai cide hiaklu. 5 Cidau cika sap kebamme midungge penai dage keteudi, "Nnai daitei gada nade heu zeuno?" 6 Cine penai Jisu ne rangkebeu nzwa penuide rangbeu, ge penui penaide keulwe tet lulo beu. 7 Pecai ledeukelume kena de gada nade Jisu da ngngwa gwanglu, nah pereu gage penui pai kamgai beu nah Jisu pereu ga bamlu. 8 Mina kekiee ge penui paini lampuiki gage kamgai, nah kedame tsingkiakdung penui luhdung gade bi keludung kamgai. 9 Jisu dwaga tet kelame de nah pe caisui kelame de sahbak eh,

"Hosanna!* Rampaube zi teu eh gwang kelame samlam pungtu lie.✝

10 Gwang kela anui pau David gwangram samlam pungtu lie!

Hosanna hutube!"✝

11 Pecai Jisu Jerusalem namdi ga lütlu, delwe pa kerecaki ga lütlu eh pa nreu gwang maleune piegai. Cidau tinghegi di, cine pa kereiekenabau de ngngwa Bethany nam ga gwangdi.

12 Pecai benai, penui Bethany gade caili dai kecu dau, pa mzeu di. 13 Cidau kemdei gade tangzüttsi bang ge penei bwa kebam ngau, cine pa cika petsi gede ngaulu kera regui eh pet. Dede pa cika gwang ge, peneidung gwale pa magede ngaulu ma, cidau tangzüttsi kebui ting kemakne. 14 Pecai pa tsingbang de de ranggai, "Mige de n dade n tsi tyei dailak." Nah pa ledeukelume cide siulu.

15 Pecai penui Jerusalem namdi ga gwanglu, delwe pa kerecaki kigu ga lüt eh kerecaki ga mazwa nah lui kebamdung de gwadi. Pa rangkang hiak kebam bamdung, nah ruipuinedung zwa kebam bamdung kwak nkum kapti, 16 nah pa migede de peu kerecaki ga helinia pung kahkegwang tadi. 17 Iciu eh Pa penuide ledeu eh ranggai, "Kesanglaisiu ga raunzeu meni,

‘A ki de lepwa heleuh pelane ziemne kekie ki ge teizie’?

Dede nnui sütketyeime ki ge tei dida."✝

18 Cingku kedimedung nah laisiukecime aide siulu, nah penui pecu teitsetdi kera lampui peiladi. Penui pecu hingdi kedanemene mina maabe pelane pe keledeu ci eh penui macangkap kedine. 19 Tinghegi gwang dige, penui namdibe gade lamna di.

20 Ge penui tingcang tetgwang zeuge, tangzüttsi bang pe mah kecang kii kedi penui ngaulu. 21 Ge Peter nsung daulu eh pe dage rangdi, "Rabbi,* pielo! Tangzüttsi bang nang resetkedi de kii dida." 22 Jisu penui dage rangdi, "Tinggwang de nlum lulo. 23 Ih nnui dage rangsiakte liazie, keheibe de aipau lamlwa dede, ‘Cuhlu delwe jaaidi ga lüt dilu,’ de eh pe lung gade suihau mezing pa rang kegai de tei lubui lie nlum lucai, cide pecu tei beuzie. 24 Cine Ih nnui dage rangla: Maleune de nnui kekie be nah peikelabe, cide nnui ngaulu delie kecu nlum siakte lulo, iciu cai cide nnui gu tei luzie. 25 Nnui kie zielie sapkelu dau, nnui kangge da madungge petau kemak lacai cide nnui gibeurai dilo, iciu cai tinggim kebam nnui Pei de nnui maudung gibeu zie." 26 * [Dede magade nnui gibeu mecai tinggim kebam nnui Pei de nnui maudung gi beulak.]

27 Pecai penui Jerusalem ga gwang dailu. Jisu kerecaki ga rwa lage, cingku kedimedung, laisiukecime, nah hangkiamedung peda gwang. 28 Penui pecu keteudi, "Nang dai kengkieng teu eh ma aidungde teila no, nah caune aide teikera ncu kengkieng peu no?" 29 Jisu penui sam keligai, "Ih de nnui de mage keteu zie. Acu keligai lo, iciu de Ih dai kengkieng teu eh ma aidungde teila bi nnui dage ranglia zie. 30 Acu keligai lo, John tei kela duipum de tinggim gade mi mina dade no?" 31 Penui katei penui kakgade mpau eh ranggai, "Anui dai ranglai? Magade anui, ‘Tinggim gade,’ de rangcai, ‘Iciucai nnui daitei pecu nlum meno?’ de eh pa rangzie.* 32 Dede magade anui, ‘Mina dade,’ de eh rangcai. Penui minadung de ngngidi, kedanemene mileune de John au caihakecime gelie la kedine. 33 Cine penui Jisu sam keligai, "Anui ci melie." Cine Jisu penui dage ranggai, "Ih de dai kengkieng teu eh ma aidungde teila bi nnui dage ranglak."