1 Cipau tingdau, mina maadi ge ngkwa dailu, nah penui magede tyei kera gah. Jisu pe caisuimedung de qulu delwe penui dade rangdi, 2 "Ih mina maabe de ngaunggia dida, kedanemene penui lang cumne acu ngngwa la jüja dida nah cu penui magede tyei kera gah. 3 Ih penuide peu matyei mene penui ki gage langgaidi cai, penui lampuiki gade mmei di lubui, nah penui kangge au kemdei gade gwangla." 4 Pa ne ledeukelume pe sam keligai, "Dai gade cauge mina aidungde de peu matyei nggei lu kera renamkang gade ngaulu zieno?" 5 Cine pa penuide keteu, "Nnui tangku daikiee ge bamno?" Penui ranggai, "Hena." 6 Ge pa hemaabe de hangdeu ga bam lulo beu. Pa tangku hena de keulu, Tinggwang de twagai eh tei panglu. Pa cidungde ledeukelumedung depeu iciu eh hemaabe de mzi beulu kerane. Nah penui mina maabe de mzi beu. 7 Penui heka keceunadung gede teula, nah pa cidungde reu gage samlam kelucai, pa penuide aidungde de mzi lulo rangbeu. 8 Penui tyei mnung lu, nah penui kebangbe pesuinadung pa pwa hebie hena puilu. 9 Cika mina cang mdai nsam ge bam. Pecai pa penuide langgi di. 10 Pa pe caisuime de ngngwa kelwa liem ga nlütlu, nah penui Dalmanutha* cuikui ga miedi.

11 Cidau Phariseeme mpetlu eh pecu ngngwa kesamlim cuhdi. Penui pecu kedak eh tinggim gade marehi tei lialo di. 12 Pa pe rabe gade pesui kesia kwa kwa eh rangdi, "Daitei aipau ceheu de marehi pei lano? Ih nnui dage rangsiakte liazie, marehi teipwa aipau ceheude de lia lakta." 13 Ge pa penui de pütdi eh liem ga nlüt dailu, nah Galilee jaai kedale gim gwangdi.

14 Penui tangku pung gwang nsungta di, nah penui da liem ga tangku kwak ge rünne gwale la si tadi. 15 Ge Jisu penuide, "Phariseeme nah Herod tsehi gade nnui mriaksüt lulo," de rang mriakgai. 16 Cine ledeukelumedung ketket de mpau eh, "Cide anui tangku bam kemakne da," dedi. 17 Nah Jisu aide cilu eh penui dage rangdi, "Daitei nnui tangku bam kemak ziemne mpau lano? Nnui cetlu mereuni, mede cilu meni? Nnui lung teitak di deni? 18 Nnui miak bam eh ngau meni? Nah nnui kwen bam eh siu meni? Nah nnui nsung lu meni? 19 Ih mina cang mengei kakgade tangku kwak mengei pang kecudau, pesuina hebie kepuih daikieege pa ludi no?" Penui pe dage rangdi, "Kereiekena." 20 "Ih mina cang mdai kakga de tangku kwak hena pang kecu dau, pesuinadung hebie daikie ge pa ludi no?" Penui pe dage rangdi, "Hena." 21 Cidau pa penui de keteudi, "Dainzwa nnui cude cetlu me reu no?"

22 Pecai penui Bethsaida renam ga gwanglu. Minadung miakcitme ge de peda ngngwa gwang eh pecu deu gailo kiedi. 23 Miakcitbe ba teulu eh Jisu pecu ngngwa renam gwale miedi. Pa pe mcai nsui pwa pe miak gage kai nah pe ba le deu gai eh pecu keteu, "Nang magede ngaumi?" 24 Pa ngangcuh eh rangdi, "Ih minadung tsingbangdung tet kela nzwa ngau." 25 Pecai pa peba kena pwa pemiak gage kai dai, nah minabe pe miak ngkei gai, ge pe miak yilu eh pa maleune ngau mcihegi lu. 26 Ge Jisu pecu pe kilung gage langgai eh ranggai, "Namceu ga lüt helo."

27 Pecai Jisu nah pa ledeukelumedung Caesarea Philippi namceudung ga miedi. Lampuiki gade, pa ledeukelumedung de keteugai, "Mi acu caulie rang lano?" 28 Penui pecu keligai, "Duipumketeibe John lie. Kedame, ‘Elijah lie,’ nah kangge au, ‘Caihakeci hangge lie la.’" 29 Pa penuide keteu, "Nnui be acu le cau lie lano?" Peter pesam keligai, "Nang au Khrista lie." 30 Ge Jisu penuide midage de pe ha ranghelo kaamdi.

31 Pecai pa penui de ledeu cuhdi Mina Nabe ma kekiee ge gade keherei kera, nah hangkiamedung nah cingku kedimedung nah laisiukecime ne pecu mlaidi kera, nah pecu teitsetdi eh lang cumne cai ring cuh dailu kera. 32 Pa sam aide rang mcigi beu. Ge Peter pecu ngngwa tsam mpetlwe pecu kesiu cuhdi. 33 Dede Jisu nreugwang pa ledeukelumedung de piegai nah Peter de kesiu eh rangdi, "Acaile gwangdi Satan! Kedanemene nang Tinggwang hadung de n kecet ga kaima, dede mina hadung cetla." 34 Ge pa maadi nah pa ledeukelumedung de si eh qulwe penui dage rangdi, "Keheibede a caisui neucai, pekatei pecu kezeulu eh pe krus pwalu, delwe a caisuilu maisia. 35 Keheibe de perabe de kelilu neu kelame pa cide tei ngga dizie lu, dede keheibe de a ziemne nah samliakeyibe ziemne pe rabe ngga kegaibe cide kelilu zie. 36 Kedanemene mige kideu pelane gielu liede, pe rabe tei nggah dicai pekemmi dai bamno? 37 Mige pe rabe ding daipai peulu bui no? Magede ma. 38 Kedanemene keheibe de kemmha nah kemau ceheu aide gade a ha nah a sam ziemne ngngam dicai, Mina Nabe de pe pei kendu kemci tinggimgwame de si eh cailigwang kecu dau pe ziemne ngngam dizie."