1 Pecai Sabbath nai cang kedicai, Mary Magdalene, nah James pui Mary, nah Salome marim kehengui pwa Jisu paau keniak kerane gwang. 2 Mtakkak raitu benai nuge, tingnaimiak kepet dau penui herau ga miedi. 3 Penui hangge ge dage ranggai, "Caune anui ziemne herau kimui gade tangtsu de kela gi beulai?" 4 Dede penui ngangcuh pie gaige, tangtsu cide kela kedi ngaulu, tangtsu cide disüt kecu ge. 5 Iciu eh penui herau lung ga lütge rehangme ge pai keha teulwe zetle ntum bam eh ngaulu, ge penui macangdi. 6 Dede pa penui dage rangdi, "Nnui ngngi diso. Nnui gwak kedibe, Nazarene, Jisu de peeila. Pa au ring cuh dida! Pa au aika bam meda. Penui pecu kai kezeu ni de pielo. 7 Dede mie pa ledeukelumedung nah Peter dage rang lialo, ‘Pa nnui dwarai eh Galilee ga gwangla dida. Cika de nnui pecu ngau luzie, pa nnuide rang kebeu nzwa.’"

8 Pecai penui mpetlu delwe herau gade pakdi, kedanemene penui ncui nah penui macangh süt kedine. Penui magede mige dage de rang ma, kedanemene penui ngngisüt kedine. 9 * [Mtakkak raitu benai nuge, pa ringcuh kedicai, pa Mary Magdalene, pe ne dade herakesia hena gwampet kedibe pui dage pecu lia raitu gai. 10 Pa mie Jisu de ngngwa bam kelame de pau beu, pelung sia nah hap kebamme de. 11 Penui pa ringbam nah Mary Magdalene pecu ngau delie kecu siu, dede penui nlum luma.

12 Aipau cai pa pe caisuime hangna namdi gwale tet gwang kela dau, pecu perehi ketsamtsam gade peu ngaugai. 13 Penai gwang lwe keda caisuimedung dage ranglia, dede penui penaide nlumlu tadi.

14 Pecai Jisu kereieket bau taktyeibam ga ngngwa maktyei kebam dau pecu peu ngaugai, nah pa penui nlumkemak nah penui mlung ketakne penuide kesiu, kedanemene pa ketsai gade ringcuh kedi kengaumedung de de penui nlumta kedine. 15 Pa penui dage rangdi, "Kideu pelane ga mie culo, nah mina pelane dage samliakeyi de ledeu lo. 16 Keheibe de nlumlu eh duipum tei kelube de kelilu zie, nah nlumlu kemakbe de mmau dizie. 17 Marehi aidungde nlum kelume leune da lazie: Penui a zi gade herakesiadung de gwagi dizie. Penui helet keheci rang dizie. 18 Penui bale penui heneidung keucuh zie, nah penui hering sakde, cide penuide gi msia dilak. Penui keteeikeneime reu gage penui ba hwa gaizie, nah penui yi luzie."

19 Rampaube penuide mpau kegaicai, pecu tinggim ga ngngwa nghang di nah Tinggwang ba zetle bamdi.✝ 20 Ledeukelume kehei leuga mie ledeu ladi, nah Rampaube penuide ngngwa bata tei nah miswakegah batadung tei eh sambe kesang lie kecu rang mci lia.]