1 Tingcang nuge, cingku kedimedung, hangkiamedung nah laisiukecime nah Jewme baudi pelane gwang ngkwalu. Penui Jisu de kanglwe pecu ngngwa tetdi delwe pecu Pilate ba gage kai beudi. 2 Pilate pecu keteudi, "Nang Jewme Gwangpei deni?" Cine pa pesam keligai, "Nang kerang deda." 3 Ge cingku kedimedung ma kekie gade pecu mmau bamdi. 4 Cine Pilate pecu keteu dai, "Nang sam keli lakzing ni? Pielo, penui ncu daikie ge mmau bambi kecu!" 5 Dede Jisu magede keli si tadi, iciu eh Pilate pe macangdi.

6 Cipau ngyi tingdau, Pilate hebaangme gede lungmpet beu kela hezai bam, mina kie kegai keheibe de. 7 Cipau tingdau mige Barabbas lie kecu mide renia kelame ge hebaangki ga bam, Romme sorkari de renia kecu dau pa mide daptsetdi. 8 Cidau maadibe Pilate da gwang nah penui ziemne tei beu bam kelade tei beulo de kie cuhdi. 9 Cine Pilate penuide keteugai, "Nnui peu acu Jewme Gwangpei de lungmpetbeu neu lani?" 10 Kedanemene, cingku kedimedung Jisu de penui riak kecune pe ba gage kai kebeu pa cibam. 11 Dede cingku kedimedung hemaabe de kecung cuhdi iciu eh peu pecu Barabbas de penui da lungmpet beulu kerane. 12 Cidau Pilate penui sam keli dai eh rangdi, "Ciciu cai nnui Jewme Gwangpei lie nnui qu kelabe de Ih daitei lai?" 13 Dede penui sahbak daigai, "Pecu gwakdi!" 14 Cine Pilate penui de keteudi, "Pa dai teimau nzeuno?" Dede penui sah ntei reureu eh, "Pecu gwakdi," dedi. 15 Cine Pilate hemaabe mnungbe teilu neu eh Barabbas de lungmpet penuide peu. Pa Jisu de dapgai delwe pecu gwakdi kerane Romme reugwame ba gage kai beudi.

16 Ge pecu reugwame ne ngngwa pwa hegwangki ga gwang di (cide deuceudibe tutiak kibung), nah penui reugwame maa pelane de quteu gwang hekwalu. 17 Penui pai giezam kecuge Jisu de peu teulu, nah penui keriak ncüt kelu hetu peurwa teilu delwe cide pepeu gage kai. 18 Iciu eh penui pecu kelum cudi: "Jewme Gwangpei de peu ringtie lo!" 19 Penui tsingtie gele pe peu dap nah pecu mcai msuilwa bamdi. Pecu kerüt zai tei eh penui koktung mie. 20 Penui pecu teu henui tei kedi cai, penui pepai giezam kecude pe dade radi delwe pe paini peu teulu, nah pecu gwaktset kerane ngngwa tetdi.

21 Tetkah kelame ge, Cyreneme Simon (Alexander nah Rufus pei) renam gade gwangla, nah pe kemei tei eh penui peu pecu Jisu krus pwa.

22 Penui Jisu de Golgotha* ga ngngwa gwang (heni aide le pwane, "Peura bam," lie la). 23 Penui zau gage myrrh haikelu pecu peu, dede pa cide sak ma. 24 Pecai penui pecu gwakdi, nah pe paini caube ne dai de keu zie bi dacak eh mzi lu.✝ 25 Bamdakkak pe kecumbe* dau ge pecu gwakdi. 26 Nah pecu kemmau sam ainzwa rau pwa bam: "Jewme Gwangpei." 27 Penui sütketyeime hangna si eh pecu gwakdi, hange pe zetle nah kedabe pe hile. 28 * [Kesanglaisiu ga, ‘Pecu kemaume de si eh peilu’ de eh rau kenzeu de tei canglu]✝ 29 Mina tetkah kegwangme pecu kiidi, penui peungum delwe ranggai, "Aha! Nang kerecaki tei msiadi delwe lang cumne gage teidai luzie lie kelabe de, 30 nkatei ncu kelilu delwe cross gade nghung lulo!" 31 Cinzwa eh cingku kedimedung nah laisiukecime de penui kakgade pecu henui tei bam, nah rangdi, "Pa mide au kelilula, dede pekatei pecu au keli gailak dida. 32 Peu Khrista, Israelme Gwangpei de krus gade cu nghung lulo, iciu eh anui ngau nah nlum lu kerane," nah pecu ngngwa gwak kebam kena de pecu kiidi.

33 Nah bamdakkak pe herokbe* gwang luge, kideu pelane ga muiting bamdi bamdakkak pe hekuibe* di kemaktane. 34 Bamdakkak pe hekuibe ga Jisu sahbak eh sahgai, "Eloi, Eloi, lama sabachthani?" aide pekie, "A Tinggwang, a Tinggwang, daitei nang acu pütdi no?" 35 Ge cika sap kebame kangge pe kwa siulu eh penui rangdi, "Ainie, pa Elijah de qu zeuda." 36 Ge mige pak gwang kehia zau kenlünpai gage kailu delwe cide herwatie gage kailu eh peu pecu cide sak kera pwa peu ranggai, "Pecu kebwak so! Elijah gwang eh pecu teu nghung beu ziemi anui pie go!"✝ 37 Pecai Jisu sahbak gai eh pe ngyi tütti. 38 Cidau kerecaki kehezupai de pe tün gade pe sing ga kecang hakpwa kena teidi. 39 Jisu dwaga sap kebam haireu kedibe Jisu ainzwa eh pe ngyi kamtube tütkedi ngau luge, pa rangdi, "Mina aide Tinggwang Nabe kesang da." 40 Cika mipuidung de kemdei gade pie bam. Penui kakga Mary Magdalene, Mary (Henabe James nah Joses pui), nah Salome de bam. 41 Pa Galilee ga kela dau penui pe caisui nah pe gwatei. Mipuidung keda kekiee ge pecu Jerusalem gade ngngwa hang kecume de cika bam.

42 Pecai tinghegi dige, cipau nai Sabbath benai dwa Maketelei Tingba kedine, 43 Arimathea mepei Joseph, Jewme baudi ga hetwa kepung peupei ge gwang. Pa de Tinggwang hegwangram de kwabam kelame ge. Pa kuu süt delwe Pilate da lüt Jisu paau de kie. 44 Jisu tsaidi delie kecu ci eh Pilate pe swagahdi, cine pa haireu kedibe de qu teugwang Jisu tsaidi demi keteu. 45 Pilate aide haireu kedibe dade ci luge, pa ketsai paau de Joseph peu beu. 46 Cine Joseph langcim pai ge luilu, pecu krus gade pwa nghunglu, langcimpai gage pecu hezuilu, delwe tsura gade bung kelu herau gage kaidi. Pecai pa tangtsukang ge pwa herau de ngkuidi. 47 Mary Magdalene penai Joses pui Mary Jisu de kung kedi ni cide ngau.