1 Aide Tinggwang Nabe Jisu Khrista samliakeyi ndeu kelube da.

2 Caihakecibe Isaiah raupwa kebam nzwa,

"Ainie, Ih nzu kengau dwa a samgwabe de lang gaila,

pa n lampui teleibeu kerabe da.✝

3 Mige hetaideu gade sahbakla,

‘Rampaube lampui telei lulo;

pe lampui tei mzui lulo.’"✝

4 Samgwabe John, hetaideu lamde mimau gilukera helungkenreu duipum sam teu mide ledeu eh gwang. 5 Cidau Judeame deudi pelane gade nah Jerusalem namdi ga mina peciakne peda miedi. Penui maudung petlu eh Jordan Reuki* gade pe ba gade penui duipum tei kaplu. 6 John au ut maile tei kelu paini teula nah teigeu kiakang le pe kia kangpung la, nah pa tangrim penai heliadui tyeila.

7 Cidau pa mide ledeu eh ranggai, "Aswa digwa kecuge acai gwangzie, Ih au keukeimie pe picumria de hiak kera de luimelie. 8 Ih au dui gade nnuide duipum tei beula, dede pa au Kemci Rabe gade nnuide duipum tei beuzie."

9 Cipau tingdau Jisu Galilee deu Nazareth nam gade gwang eh Jordan Reuki gade John ne pecu duipum teilu. 10 Nah Jisu dui gade mpetlu siak pa tinggim letgai nah Kemci Rabe tamhau nzwa pe reuga nghung kela ngau. 11 Cidau tinggim gade makwa ge gwang, "Nang au a na akube. Ih ncu a suisüt bam."

12 Jisu duipum teiluge, zette Kemci Rabe pecu hetaideu ga mie kera ketang di. 13 Pa hetaideu ga zie riakdai bamdi, Satan ne pecu kedei eh. Cidau pa renaam kaune de ngngwa bam, dede tinggimgwame ne pe ma piebeu.

14 John de tui kedicai, Jisu Galilee ga gwanglwe Tinggwang samliakeyi paurwa cuhdi. 15 Pa rangdi, "Peting cang dida* nah Tinggwang hegwangram nna bam dida. Helungnreulu nah samliakeyi de nlum lulo."

16 Pa Galilee Jaaidi* kung ga tetgwang keladau, pa Simon nah pe sinabe Andrew helang pwa jaaidi gage sambam eh ngau, penai heka tuikelame kecune. 17 Cine Jisu penai dage rangdi, "Gwanglu, acai suilu, iciude Ih nnaide peu mina de ketuime tei beuzie." 18 Ge penai helang de zette pütdi eh pecai suidi. 19 Ipaucai de Jisu tet mdei si pet ge, pa Zebedee napei kena James penai pe sinabe John liem ga penai helang retak bam eh ngaulu. 20 Nah Jisu zette penaide qugai ge penai pei Zebedee de penai liem gade liteu kela kilame de si eh pütdi, delwe penai pecai suidi.

21 Ge Jisu nah pe caisuime Capernaum namceu ga gwanglu, nah Sabbath benai Jisu synagogue ga lüt eh mide ledeu. 22 Cidau Jisu au laisiukecime nzwa mene, dede kengkieng kebamme nzwa eh penuide ledeu kedine pe keledeu samdung ne penui ma canghdi. 23 Cipau ting siakdau mcikemak rabe ne ngngwa kela mipei ge penui synagogue ga bam eh pa sahbak eh, 24 ranggai, "Nazarethme Jisu, anui ncu ngngwa dai tei laino? Nang anuide teimsia dizie lie gwang lani? Nang caubi Ih ci, nang Tinggwang gu Kemcibe da!" 25 Dede Jisu herakesiabe de kesiu eh ranggai, "Zing dedi nah pe dade mpet dilu!" 26 Ge mcikemak rabe cipau peide de tei ngkau gai nah mra sahbak gai eh pe dade mpetdi. 27 Mina pelane penui swagah eh hangge ge de keteu eh ranggai, "Aide daino? Kengkieng kebam keledeu keheci ge! Pa mcikemak rabedungde de kesiu gai eh penui pesam mzai lula kecu!" 28 Cine Galilee cuikui leune ga lule ailam zette pe ha rang zangra gwangdi.

29 Cipaucai synagogue gade mpetlu herizi, penui Simon penai Andrew ki ga, James penai John de si eh gwanglu. 30 Cidau Simon nau pui mra eh zeu bam, nah penui zette eh pe ha Jisu dage rangbeu. 31 Cine pa peda gwang, pe ba teulu, delwe pecu kwak ncuhgai. Ge kemra pecu pütdi, nah pa penui gwatei bamdi.

32 Cu tinghegi tingnaimiak nlüt dige* penui mateei kelame nah herakesiabe ne ngngwa kela pelane de peda ngngwa gwangbeu. 33 Nah namdi cika mina pelane gwang kikam ga ngkwalwe bamdi. 34 Cine pa mateei ketsamtsam mra kelame kekiee leude teingkei beu nah herakesiabe kekieede de gwadi, dede pa herakesiabedung de peu marang ma kedanemene penui pecu ci kedine.

35 Pecai tingcang nuge, mui kezeune, Jisu cuhlwe zing de kecu ni ga tetpet di, delwe cikade pa kekie tei. 36 Cidau Simon nah pecu ngngwa kelame pecu peeidi. 37 Penui pecu ngau luge, penui pe dade rangdi, "Mina kekiee ge ncu peeila dida." 38 Dede pa penui dage rangdi, "Anui tetpwa twagwa kebam namceu kedale miego, ciciu eh Ih cika de zierang teilu kerane. Kedanemene cide ziemne Ih gwangbam delu." 39 Cine Jisu nah pe caisuime Galilee deu pelane ga mie, penui synagoguedung* ga mide ledeu nah herakesiabedungde de gwampet eh.

40 Ge kempame ge Jisu da gwang, pe ngha kie eh keumie. Pa pe dage ranggai, "Nang nsui cai acu teimci lubui." 41 Ge Jisu ngaugia le puipung eh pe ba hwapwa pecu deugai nah pe dage ranggai, "Ih asui da. Mcilu." 42 Zette kempa de pe dade tetdi, nah pecu tei mcilu. 43 Dede Jisu pecu marang sünne gai eh zette pecu lang gidi. 44 Nah pa pe dage rangdi, "Nang mige dage de magede rang selo, dede mie, cingkupei de ncu pwalia lo, delwe ncu teikemci ratakdung Moses rang kenzeu de tei lulo, penui dade zierang ge lu kerane."✝ 45 Dede pa mpet eh cipau ha de rangrwa ladi nah luga aika minadung de peu ci gwang kiee kedine, Jisu namceu ga mtei miakngau tei lütlu lakdi. Cine pa mie mina kegah heni ga bamdi, cipau caide mina lule ailam de Jisu da gwang cu mtaklu tadi.