1 Nah Jisu penui dage rangdi, "Ih nnui dage rangsiakte liazie, aika kesap nnui kangge Tinggwang hegwang kengkieng si eh kegwang kengau dwa ketsai msi lak."

2 Lang herokne cai, Jisu Peter, James, nah John penuide nzang lamlwa kehu ge ga penuikatei hangdi. Iciu eh pa penui dwaga de pecu tei ntsamdi. 3 Pe paini mhei liklik eh ha pwa kideu ga paini kehetame nede teiha sigai kelak teidi. 4 Cidau Elijah, Moses de ngngwalwe penuide peu ngaugai, nah penai Jisu de ngngwa mpau bam. 5 Cine Peter Jisu de mpau eh rangdi, "Keledeubo, anui aika bamcai yizie da, nah cine anui paiki kecum teigo, ket nziemne, ket Moses ziemne nah ket Elijah ziemne." 6 (Kedanemene penui ngngiham di eh pa dai rang ziebi cita kedine.) 7 Cidau hemwa ge himgwang penuide gumlu, iciu eh hemwa gade makwa ge gwang, "Aide a Na akube. Pe kwa kingneilu." 8 Zette, penui pie twagwa kegai dau, penui migede de penuida kela ngau sitadi, Jisu de gwale.

9 Penui lamlwa gade nghung keladau, Mina Nabe ketsai gade ringcuh dailu kemaktane penui kengaudung midage de rang helo penuide aja kaigai. 10 Cine makie cide penuikatei kaizeudi, dede penui kakga de penui "Ketsai gade cuh kecuh" pekie dai bi kecu penui katei mpau ladi. 11 Iciu eh penui pecu keteu, "Daitei laisiukecime Elijah gwang rai maisia lie rang lano?"✝ 12 Jisu penuide keligai, "Elijah gwang rai eh maleune teihemi daibeu zie lie la. Iciucai daitei mina Nabe de peu ma kekiee gade keherei nah mlaidi zielie kesanglaisiu ga rauteu lano? 13 Dede Ih nnui dage rangla Elijah gwang kesang da, nah penui pe dage teigai keneube teigai dida, kesanglaisiu ga pe ha rauteu kela nzwa."

14 Jisu nah ledeukelume hangcum lamlwa nghung ledeukelume kedame da gwang ge, maadi ge penuide twagwa pung kebam ngaulu nah laisiu kecimedung penuide ngngwa kesamlim bam. 15 Zette, hemaabe Jisu de ngau luge, penui swagahdi, nah pe da pak nghang eh pecu kelum di. 16 Pa ledeukelumedung* de keteu, "Nnui penuide ngngwa dai ha gade kesamlim bam no?" 17 Maadi gade kangge pecu samkeligai, "Keledeubo, Ih a napeina de n da ngngwa gwangla. Peda marang gaikelak rabe ge la. 18 Cide pecu keliang kecudau pecu teingkau dila, nah pe mui tarum eh pe gei geigim pung nah pa ntingci dila. Ih nang ledeukelume dungde cide de gwampet kera kiegai, dede penui cide tei luma." 19 Pa penuide samkeligai, "Nnui nlumkemak ceheu, Ih nnui de daitie ge ngngwa bam zieno? Daitie ge Ih nnuide ngngwa liabam zieno. Henabe de a da ngngwa gwanglo." 20 Cine penui henabe de peda ngngwa gwang. Herakesiabe Jisu de ngau luge zette eh pecu kelienmie di nah henabe hangdeu ga kauzeu eh mlapwa ladi pemui tarum eh. 21 Jisu pe pei de keteu, "Daitie ge pa aiciu ladi deno?" Ge pepei ranggai, "Pe henane gade. 22 Cide pecu tei ngkapti kerane pecu kelien pwa mi gage nah dui gage kaidi la. Dede nang tei lubui cai anuide ngaunggia eh anuide nghalo," 23 Jisu pe dade rangdi, "‘Nang tei lubui cai lieni’? Nlum kelame ziemne maleune tei lubui." 24 Zette eh henabe pei sahbak eh rangdi, "Ih nlum lie! A kenlum kecam aide de ngha lo!" 25 Ge Jisu maadibe penui da pakgwang kela ngaulu, pa mcikemak rabe de kesiu eh ranggai, "Nang marang gai kelak nah kwenpang rabe, Ih n dage rangla, pe dade mpet dilu, nah madaude nlütdai so." 26 Cide mra gai eh henabe de de tei kelütsüt gai eh mpetti. Henabe ketsaime nzwa di, cine mina kekiee rangdi, "Pa tsai dida." 27 Dede Jisu pe ba teulwe pecu teu ncuhlu nah henabe saplu. 28 Pecai Jisu kilung ga nlüt luge, pa ledeukelume ngkim eh pe dade keteu, "Daitei anui cide de gwa mpet lu meno?" 29 Ge Jisu penuide keligai, "Aikenzwabe kekie nah kemmwang gade mai gwa mpet gailak." *

30 Pecai Jisu nah ledeukelume cikade tetpet Galilee cuikui kahgwang, dede pa cide peu migede de cineu ma, 31 kedanemene kebwak mene pa ledeukelumedung de ledeu neu kecune. Pa ranggai, "Mina Nabe de tuipwa minadung ba gage kaidi zie, nah penui pecu teitset dizie. Nah pecu teitset kedi lang cumne cai pa ringcuh dai dizie." 32 Dede penui aipau sam de ci luma nah penui pecu keteu kera de hing ladi.

33 Jisu nah pa ledeukelume Capernaum namceu ga gwanglu. Pa kilung ga kebam dau, penui de keteu, "Nnui lampuiki gade daige mpau lano?" 34 Dede penui zing dedi. Penui lampuiki ga keladau caube ne ditu ziebi ha rang kesamlim kelane. 35 Cine pa ntumlwe kereiekenabau de qu hekwalu eh penui dage rangdi, "Magade mige raitu neula cai, pa kamtube nah pelane kila tei maisia." 36 Pecai pa hena keceunage de pwalu eh pecu penui kakgage kailu. Pa pecu pwalu eh penui dage rangdi, 37 "Keheibe de a zi gade hena keceu aiciu kecu nadung de ngngwa kelume acu ngngwa lula, nah keheibe de acu ngngwa kelume, acu rünne meliene, acu langkegaibe de de ngngwa lula."

38 John Jisu dage rangdi, "Keledeubo, anui mige n zi teu herakesiabe de gwala eh ngau, nah anui pecu kaamdi, kedanemene pa anui caisui kemakne." 39 Dede Jisu rangdi, "Pecu kaam diso, kedanemene migede a zi gade makedi tei kelame zette acu rangmsia gai laklu. 40 Kedanemene anui de renia kemakpe au anui lam delu. 41 Kedanemene keheibe de nnui le pwane Khrista gu lie eh pezi gade dui piak ge de sak kera nnuide peu cai, Ih nnui dage rangsiakte liazie, pa pe ziehi tei nggah dilak.

42 Nah keheibe de acu nlum kela keceu aidung hangge de de teimsia cai, keniaktsu kedige pe ngwang gage keu punglwe jaaidi gage kelien gai kedibe yiki lie. 43 Magade n ba ncu teimsia cai, cide dang di. N ba kena teupung eh mijaai ga kenlüt swa au swah delwe kering ga kenlüt be nziemne yiki kecune. 44 * [Cika penui kaude tsai lama, nah mi de mmüt lama.] 45 Nah n pi ncu teimsia cai cide dangdi. N pi kena bam eh mijaai gage kelien gai kedi swa au swah eh kering ga kelüt be n ziemne yiki lie. 46 * [Cika penui kau de tsai lama nah mi de mmüt lama.] 47 Nah magade n miak ncu teimsia cai, cide letdi. N miak kena bam eh mijaai gage kelien gai kedi swa au miakli eh Tinggwang hegwangram ga kenlüt be au yiki, 48 cika penui kau tsai lama nah mi de mmüt lama.✝ 49 Kedanemene keheibe de de mi le pwa mcai tei eh mrwak kap zie. 50 Mcai au yi, dede mcai pekum gah dicai, nang daipai pwa cide tei kumlai? Mcai de peu nnui lung ga bamlu nah ketket de ngngwa kezuyi lulo."