1 Pecai kerecaki gade Jisu tet mpetdi zeu ge, pa ledeukelume hangge pe dage rangdi, "Pielo keledeubo! Miswakegah tangtsu aidungde nah misuikegah kidung de!" 2 Jisu pe dage rangdi, "Nnui ki kedi aidungde ngau bam mi? Tangtsu ket de keda reu ga keswa pwa bam lak, kelien miedi mene."

3 Cu Jisu kerecaki de kencwa Olive Deutu reuga ntum kebam dau, Peter, James, John, nah Andrew pe da ngkim gwang eh keteugai, 4 "Ma aidungde daidauge tei ziebi anuide ranglia lo? Ma aidung de tei canglai kezeudau daipai rehidung teidi zieno?" 5 Ge Jisu penui dage rang eh, "Mriak bamlu, peu migede de nnuide cwateu di kelakne. 6 Mina kekieege a zi teu gwang eh, ‘Ih pa da,’ de rangzie, iciu eh penui mina kekieege de cwateu dizie. 7 Nnui hereu regi kecu nah hereu regi kebam hadung siu kelu dau, nnuilung keherei diso; ma aidungde tei maisia bam, dede cide au kamtube di mereu. 8 Heleuh ge ne heleuh keda gede ngaurau cuh dizie, nah hegwang ge ne hegwang keda gede regi zie, luga aika nnuiteu dizie, nah herakumkum dizie. Ma aidungde au kemna tedteei keherei keraidung da.✝

9 Nnui nnuikatei de mcet siakte bamlu maisia. Penui nnuide baudidung nah synagoguedung dwaga teu gwang zie, nnuide dapzie, nah a ziemne nnui deuceudidung nah hegwangmedung dwa sap zie, iciu eh cide penui dage zierang ge zie. 10 Dede keraibe samliakeyi heleuhbe pelane dage paulia rai maisia. 11 Penui nnuide tuilwe mi ba gage kedi kera dau, nnui dai rang zie bi cet pwa nnui lung keherei diso. Dede peting siak dau Tinggwang nnuide ranglo kebeu de ranglu; kedanemene sam kerang de au nnui lak, dede Kemci Rabe ne zielu. 12 Sinabe pe sinabe de ketsai gage tuigai zie, nah pepei ne pena de cinzwa tei zie. Henamedung penui puipeidung de mlai eh reniacuh zie, iciu eh penuide teitsetdi kera tei zie. 13 Mileune a zi ziemne nnuide ngaurau dizie. Dede kamtube ga kecang lia kelube, cipaude de kelilu zie.

14 Dede nnui kengkap kengkau ketei de pa sap kera kemak ga sap bam eh kengau dau (sam aide peu kepeibe de pekie ci lulo), cide kegwang dau Judea cuikui ga kebammedung de peu kwaklu kerane lamlwadung ga pak gailu maisia,✝ 15 Kiniem reuga kebambe de peu nkangle nghung so, mede peu pekilung nlüt magede keu mpet kera tei so, 16 nah luh ga kelabe dede pe pai keu kera peu pe ki cailigwang so. 17 Dede cipau tingdau telak kelame nah hename de nepam kelame ainie! 18 Cide tingtiak dau teidi melu kerane Tinggwang dade kie bamlu. 19 Kedanemene cidau ting keherei süt dizie kecune, Tinggwang dam kegai raitu gade cu kecang ci kenzwa rei ma, mede pecai caile de ci kenzwa reidai lak lugu.✝ 20 Nah Rampaube cipau tingbaziedung de teimdui di melie cai, migede kelilu gailak dizie. Dede pa kedetkelume zi gade tingbaziedung cide pa teimdui dida 21 Cine mikeheige n dade, ‘Ainie, Khrista aika bamda!’ mede, ‘Ainie, pa cika bamda!’ de rang de nlumdi helo. 22 Kedanemene kemret Khrista kekiee nah caihakeci kemretdung gwang dizie nah marehidung nah miswakegahdung teizie, iciu eh teilu buicai, kedetkelume de cwalu kerane.✝ 23 Cine nnui mriak bamlu! Ainie, peting dwa Ih nnui dage maleune mrai ranglia beu dida.

24 Dede cipau tingdau, keherei kelu cai,

tingnaimiak mui dizie,

nah hekei pe kebaa peuta dizie;✝

25 hegidung tingkam gade cakmie bam dizie,

nah tinggimdung ga kengkieng kebamdung de de teukelai dizie.✝

26 Pecai Mina Nabe hemwa gade kengkieng nah kendu teu eh gwangkela nnui ngau dizie. 27 Pecai pa tinggimgwame de langgai zie nah pa kedetkelume de tingkai mdai gade, kideutu nli gade tingkam nli kecang hekwalu zie.

28 Cine tangzüttsibang samgwa de gade ci lulo. Pe kiak renu eh penei bwa kepet dau, nnui hepwak ting mna dida de kecu ci lula. 29 Cinzwa delwe, nnui ma aidung de tei gwang kengau dau, nnui pa nna la dide lie kecu ci luzie, kimuiki ga bam dida de kecu. 30 Ih nnui dage rangsiakte liazie, ma aidung pelane tei gwang kemaktane cudau ceheu aide gahdi lak. 31 Tingkam nah kideu gah dizie, dede a samdung au madaude gah dilak.

32 Dede cipau tingba de nah pe bamdakkakbe au migede cima, tinggim ga tinggimgwame de, mede Nabe liede, dede Peibe rünne ci.

33 Cine mriak bamlu! Kwa nah kie eh bamlu, kedanemene nnui peting be daidau ziebi ci melu. 34 Cide au mige hebeuh tei kelame ge nzwa da, pa pe ki gidi eh pe kilame ketket kecu de peta ramcau peudi, nah pa kekwabe de mriak eh bam lulo sam kaibeu kedi. 35 Ciziemne mriak eh bamlu, kedanemene ki mpaube dai dau gwang ziebi nnui ci melu, tinghegi dau ziemi, muisum dau ziemi, mede nrui kekwa dau ziemi, mi tingcang ziebi, 36 mede magade pa zette gwang dicai, pa nnui zipbam eh ngau di lubui. 37 Cine Ih nnui dage rang kegai de Ih mileune dage ranggai la: Mriak eh bamlo!"