1 Cipaucai Jisu synagogue ga lüt dai ge, mige peba tsai kedi ge cika bam. 2 Mina kangge, pa Sabbath benai cipaude de tei mmi beu zie mi lak bi kecu pecu pie ling eh bam, iciu eh pecu mmaulu kerane. 3 Cine Jisu pe ba ketsaibe pei de dage rangdi, "Anui kakga saplu." 4 Pecai pa minadung dage rangdi, "Sabbath benai mi dage ma keyi tei kerabe mi kesia tei kerabe petau no; mide kelilu kerabe mi mide teitset kerabe no?" Dede penui zing de di. 5 Ge pa penui lung ketakne pe lung sia eh pe rata eh nreupet lule ailam penuide pie eh mina cipaude dage rangdi, "N ba nzang pet gailo." Cine pa pe ba nzang pet gaige pe ba tei ngkeilu. 6 Ge Phariseemedung mpetlu delwe zette Herodiame de ngngwalwe dainzwa Jisu de teitset lubui bi riem bamdi.

7 Pecai Jisu ledeukelumedung de ngngwa Galilee jaaidi lebie miedi nah Galilee deuzi gade nah Judea gade mina maadi ge pecai suidi 8 nah Jerusalem gade nah Idumea gade nah Jordan reu lulegim de nah Tyre penai Sidon namdidung gade mina maadi ge pecai suidi. Cidau penui pa tei kela ha de siulu ge mina maadi ge peda gwang. 9 Cine pa hemaabe de peu pecu ziudi melu kerane pa ledeukelumedung de liem keceunage pe ziemne mtei lulo beu. 10 Pa mina kekiee de tei hemi kebeune penui teeinei kela leu pecu deu zielie petai ga gwang. 11 Keheidaude mcikemak rabedung de pecu ngau luge pe dwaga keumie eh sahbak eh rangdi, "Nang au Tinggwang Nabe." 12 Dede pa penuide kesiusüt gai, iciu eh peu penuide midage de pe ha rang melu kerane.

13 Pecai Jisu lamlwa reu nghanglu delwe pe caisui keneume gwang lulo qugai, ge penui peda gwanglu. 14 Pa mina kereiekena de kedetlu (pa penuide langkegaimedung lie msiaklu) iciu eh penuide peu pecu ngngwala lu kerane nah pa penuide langpwa mide ledeu kera, 15 nah herakesiabe de gwalu kera kengkieng bamlu kerane. 16 Pecai pa kereiekena bau de kedetlu: Pa Simon de, Peter lie msiaklu; 17 Zebedee napei James, nah pe sinabe John, pa aipau kena zi msiak pwa Boanerges* qulu, cide pekie Tingceu napei; 18 nah Andrew, Philip, Bartholomew, Matthew, Thomas, Alphaeus napei James, Thaddaeus, Simon Zealot, 19 Nah Judas Iscariot, pecai pecu tuigai kebeube.

20 Piage Jisu nah pe caisuime kige ga lütlu, ge mina maabe gwang ngkwa dailu, cine penui tangku tyeide gailak di. 21 Pe kilungme bau cide siu luge, penui mie pecu ngngwa luzie miedi, kedanemene penui rangdi, "Pa au mie dida." 22 Ge Jerusalem gade nghungkela laisiukecime de rangdi, "Pa Beelzebul de ngngwala dida" nah "Herakesiabe gwang de ngngwa eh pa herakesiabe de gwampetla." 23 Dede Jisu penuide qupwa pedage kailu eh samgwa penui dade rangdi, "Satan dainzwa eh Satan de gwalu laino? 24 Magade hegwangram pekatei pecu pungpang di cai hegwangram cide sap gailak. 25 Ki ge pekatei pecu pungpang di cai ki cide sap gailak dizie. 26 Nah Satan de pekatei pecu renia dicai nah nzipang dicai, pa sap gailak, dede penli ga gwang dila. 27 Iciu de migede kengkiengme gede kanglu rai mene kengkingme ki ga lüt pe gudung rega gailak, kang railu cai, pa pe kilung lüt pe gudung hedi lubui. 28 Ih nnui dage rangsiakte liazie, minadung kemau leune teide nah mide rangkemsia sam leune rangde penui maugi beuzie, 29 dede mina keheibe de Kemci Rabe de rang msia cai madaude gibeu lak, dede kelungta kemau ziemne pecu peu mau dizie", 30 kedanemene penui, "Mcikemak rabe peda la," de eh kerangne.

31 Cidau Jisu pui nah pe siname gwang kisie ga saplu. Penui mide langpwa pecu qu. 32 Nah mina maabe pecu twagwapung ntum bam, ge penui pe dade rangdi, "Ainie! N pui nah n siname ncu peeigwang kisie ga bamlie." 33 Ge pa penui sam keli eh ranggai, "A pui nah a siname cauno?" 34 Ge pa nreugwang pecu twagwapung kebamdung de pie eh rangdi, "Ainie, aika a pui nah a sinamedung! 35 Mina keheibe de Tinggwang suibe tei nah mzai kelume cipaume a siname, a time nah a pui delie."