1 Ge pecai Jisu samgwa gade penui dage marang cuhdi: "Mige kubeluh ge talu, cide rie twagwa lu, nah zauniakbam ziemne hekwaki ge kuilu. Nah pa reketbam kehuge teilu, nah luh cide kubeluh ketamedung de nlum beudi, iciu eh pa hebeuh ge tei tetdi. 2 Luhlüt ting dige, pa kilame gede luh ketame dage langgai, kubetsi kesa kubeluh ketame dade ngaulu kerane. 3 Dede penui pecu nimlu eh pecu dap, delwe magede si mene pecu lang caili di. 4 Pecaide pa kila kedage de penui dage langgai dai, ge penui pecu pepeu tei rezamdi nah pecu teu hengam teidi. 5 Pa kedage de lang daigai, ge penui aipau dede teitsetdi. Pa kedame kekiee ge de lang daigai: ge penui kangge de dap nah kedadung de teitsetdi. 6 Pa hangge langgai kera bamreu, cide peku pe nabe. Pa pecule pwa kamtube tei eh penui dage langgai nah pekatei pecu mpau eh ranggai, ‘Penui a napei de rüt luzie.’ 7 Dede luh ketamedung penui hangge ge dage rang eh, ‘Aide ai mapwabe da. Gwanglu, anui pecu teitset digo, iciu de anui pe mabam anui gu luzie.’ 8 Cine penui pecu nimlu eh pecu teitsetdi, delwe ketsai paau de kubeluh gwale ge kelien mpetdi. 9 Cine cu, kubeluh mpaube dai tei lai? Pa gwang eh kubeluh ketamedung de teitsetdi dizie, delwe luh cide mi kedame de peu dizie. 10 Nnui kesanglaisiu aide pei meni?

‘Tangtsu ki keteimedung gikedi de,

aide kimiaktsu* ge tei dida.

11 Aide Rampaube dade,

nah cide anui miak gade miswagahsüt kecu ge.’"✝

12 Ge penui Jisu de tui kera peeidi, dede penui hemaabe de hingdi, kedanemene pa penuide mmau eh samgwa aide rang kegai penui ci kelune. Cine penui pecu gidi eh tetdi.

13 Pecai penui pecu samdung gade mmau eh tuilu kerane Phariseeme nah Herodiame kangge de pe dage langgai. 14 Penui gwang luge, penui pe dage rangdi, "Keledeubo, nang masang lie kecu anui cibam, nah nang mige dade de tsam lama, kedanemene, nang mina de hegwazu pie la kemakne. Meliene, nang Tinggwang zaibe kesangbe gade ledeu lala. Cine Ceasar dage heraha kepeu petau mi meno? Anui cide peu kera mi, peu kerabe meno?" 15 Dede Jisu penui hezai tei kebam cilu eh penui dage rangdi, "Daitei nnui acu kedei lano? Acu denarius ge keugwang beulo iciu eh Ih cide pielu kerane." 16 Cine penui ket keugwang beu. Ge pa penui dage rangdi, "Aide cau mie nah cau zi no?" Penui pe dage rangdi, "Ceasar lie." 17 Cidau Jisu penui dage rangdi, "Ceasar gu Ceasar de peu dilu, nah Tinggwang gu Tinggwang de peu dilu." Ge penui pecu ngau penui swagahdi.

18 Pecai Sadduceeme kangge, mina ketsai gade ringcuhdai laklie rangkelame, peda gwang. Penui pecu keteu eh ranggai, 19 "Keledeubo, Moses anui ziemne raubeu, ‘Mige sinabe pe na gah eh tsaidi eh penau de bang zeu cai, iciu cai pe sinabe tsai kedibe nau de pa ngngwa lunghlu eh penai na de pesinabe tsai kedibe na teilu maisia.’✝ 20 Ndaa kelak ge ga siname hang hena bamla; raitube pe nau teilu nah pe leuh lung mene tsaidi. 21 Cidau pekenabe cipau pui dede pe nau dailu, delwe pe leuh lung mene tsaidi, nah pe kecumbe de cinzwadi. 22 Pe henabe de pe leuh lunghdiak ma. Kamtube mipui de tsaidi. 23 Ketsaime ringcuhdai kecu ga, penui cuhdai kecudau, mipui cide caube nau zieno? Kedanemene, mipui cide siname hanghena pelane nau dide kecune." 24 Jisu penui sam keligai, "Nnui kesanglaisiu de nah Tinggwang kengkieng de cikemak kie de ziemne nnui maci mau la dide meluini? 25 Kedanemene penui ketsai gade cuh kecu dau, penui laktak teilak, mede laktak tei kera gede bam lak, dede penui au tinggim ga tinggimgwame nzwa dizie. 26 Dede ketsaime ringcuh dai kedime ha, nnui Moses laisiukwak ga, Tinggwang pe dage tsinghum gade, ‘Ih au Abraham Tinggwang, nah Isaac Tinggwang, nah Jacob Tinggwang’ de kerang hade pei meni?✝ 27 Tinggwang au ketsaime Tinggwang ma, dede keringme gu. Nnui cetmau sütla dida."

28 Cidau laisiukecime ge gwang nah ma aide penui mpau kebam siulu. Jisu penui sam keli hemisüt kebam pa ngau kelu dau, pa pe dage keteugai, "Hezai pelane kakga de dai dele raitu kerabe no?" 29 Ge Jisu sam keligai, "Raitube au, ‘kingnei lulo Israel, Rampaube anui Tinggwang, Rampaube au ket rünne.✝ 30 Rampaube n Tinggwang de nang n mlung pelane, n keringria pelane, n lungcet pelane, nah n kengkieng pelane teu hung lulo.’✝ 31 Hezai kai kebeu pe kenabe liecai aide, ‘Nang n kidacaina de nkatei ncu hung kecu nzwa hung lulo.’ Hezai kai kebeu aide swa magede keda kedi bam si meda."✝ 32 Ge laisiukecime pe dage rangdi, "Petauda, Keledeubo! Tinggwang au ket lie kecu nang kesangsiakpe rangda, nah pa gwale migede keda bam si melie kecu. 33 Pecu milung pekiene, nah mi lungcet pelane nah mi kengkieng pelane, nah mikatei mide kehung nzwa kidacaina de hung kera, aide au keru recadung nah ratakdung pelane swade yiki." 34 Pa mteu süt eh pe sam kelikegai Jisu ngau luge, pa pe dage rangdi, "Nang Tinggwang hegwangram gade mdei meda." Cipaucai, migede Jisu dade magede keteu hingdi.

35 Jisu kerecaki ga mide ledeu kebam dau, pa keteugai, "Daitei laisiukecime Khrista de David napei lie eh rang lano? 36 David Kemci Rabe gade pekatei rangdi,

‘Rampaube a Rampaube dage ranggai,

"A ba zetle ga bam lu,

Ih n ngauraume de n pidau tei beudi kemaktane."’✝

37 David pekatei pecu lepwa ‘Rampaubo’ de qu lala, cine dai nzwa pa David napei lulai?" Hemaa maadibe neunga eh pecu kingnei bam di.

38 Jisu ledeu bam eh pa rangdi, "Laisiu kecimedung dade mriak lulo, penui paini ketie teu eh litak nidung ga penuide kelum bam kecu penui suiyi la, 39 nah synagoguedung ga teibam mlangtubedung ga, nah taktyei ngyidung ga henidung mlangtubedung ga. 40 Penui hemipuime kidung kumtyei lala, nah penui mide peu ngau kera ziemne kekie tei tie süt lala. Mina aidungde au saja kedi ngauzie."

41 Pecai Jisu kerecaki ga ma kehekwabung dwaga bamlu; pa mina maadung dainzwa ma kehekwabung gage rangkang kaibam bi pie mcet bam. Makeheimedung makai kekiee kai bam. 42 Pecai makegah hemipui ge gwang tamrine kena kaigai, cide peusa pakke nsam ge. 43 Ge Jisu pa ledeukelume de qulu eh penui dage rangdi, "Ih nnui dage rangsiakte liazie, penui pelane ma kehekwabung gage makai kebam kakte, makegah hemipui makai aidele pwane kietu lie. 44 Kedanemene penui au mabam kekiee ge kebam gade pwa peu bam. Dede hemipui aide au, pe magah gade kebam pekiene, nah pa teu lungsi kera pekiene pa kai dida."