1 Langnaige Jerusalem namdi gade gwang kebam Phariseemedung nah laisiukecime petai ga gwang ngkwalu. 2 Nah ledeukelumedung kangge penui ba mci mene, cide penui ma mtiak mene, matyei kebam penui ngaulu. 3 (Phariseeme nah Jewme pelane de penui ba mtiak di kemaktane matyei lama, kedanemene penui penui paume zai mzai kelane. 4 Penui litakni gade gwang keludau, duipia kemakne matyei lama, nah keda makekiee penui mzaikela ge bamsi reu: hepiakdung nah lidung nah hetageu lidung hui kela de si.) 5 Phariseeme nah laisiukecime Jisu dade keteu, "Daitei nang ledeukelume anui paume zai rehi gade tet meno, dede penui ba mtiak mene matyei lano?" 6 Dede pa samkeli eh penui dage rangdi, "Isaiah ndaa nnui hezai teikelamedung caiha rang delie, pa raugai,

‘Mina aidungde penui muileu gade acu rütla,

dede penui nlungbe au a dade mdei lala.✝

7 Penui acu kemta gade reca la,

penui mina ne ketei zaidung le hezaibe teilwe ledeu.’✝

8 Nnui Tinggwang sam kaikebeudung gidi eh mina ne tei kelu zaidung mzai siakte la dida." 9 Pa penui dage rang sigai, "Nnui ciem ci süt eh Tinggwang sam kaikebeu de gi dida, iciu eh nnui paumedung zai de kaizeulu kerane! 10 Kedanemene Moses rangla, ‘Nnui pui nnui pei de rütlu,’ nah ‘Keheibe de pe pui mede pe pei de rang msia kelame tsaibi dizie.’✝ 11 Dede nnui rang kecu, ‘Magade mige pe pui mede pe pei dage, "Makeheibe de nang a dade gie kelube au Corban"’ (cide pekie, ‘Tinggwang de peu dida’), de eh rangcai, 12 nnui pecu peu pe pei mede pe pui dage magede tei kera peu lama. 13 Nnui nnui paume zai de le Tinggwang sam kemta tei dida. Nah nnui cikenzwa makekiee ge teila." 14 Pecai pa mina maabe de qu dailu eh penui dage rangdi, "Nnui pelane de a kwa kingnei lu eh ci lulo. 15 Magede hegwale de mina lung lüt eh pecu tei heradi kela gah. Dede pelung gade kepetbe dungne pecu teihera dila." 16 * [Keheibe de kingneilu kera pekün bam cai pecu peu kingnei lulo.] 17 Cu Jisu hemaabe de pütti eh kilung ga nlüt luge, pa ledeukelume samgwa ha keteu. 18 Pa penui sam keligai, "Nnui de maci mene aiciu lareu ni? Hegwale de mina lungga kelüt bene pecu teihera dila kemak nnui ngau meni, 19 Kedanemene cide pe mlung ga lüt lama, dede pe za ga lüt dila; iciu delwe heteuki ga gwang dila?" (Ciziemne ketyeipuk pelane mci.) 20 Dede pa rangdi, "Mina dade kepet dene mina de teihera dila. 21 Kedanemene mina lung gade, nlung gade, lungcet kesia, kemmha, kerega, teiketset pet la, 22 Kemmha, makehengin, kenlien, mide kecwa, miriak kecu, mide kii kecu, ngang kecu, kemie. 23 Makesia cidungde pelane milung gade petla, nah cidungde mina de tei herala."

24 Pecai pa Galilee gade Tyre penai Sidon cuikui lebie gwangdi. Pa kilung ge ga lütlu, nah migede de peu cineu ma, dede pa mbai gailak di. 25 Cidau mipui ge pe napui da mcikemak rabe ne keliangteu kela pui ge pe ha siulu eh pa gwang pe pi ga keumiedi. 26 Aipau puide Greekme ge, Syrophoeniciame pui. Pa pe napui dade herakesiabe de gwa gidi beulo pedade kie di. 27 Jisu pe dage rangdi, "Peu hename de nggei rai lulo. Kedanemene hename gu tangku de keulu eh heteu de pwa kepeu petau melu." 28 Dede pa samkeligai eh peda rangdi, "Yeo, Rampaubo, heteudung de taktyei bam kangga hename ne tei tangra kedibe pa tyeila." 29 Pecai pa cipau puide dage rangdi, "Sam aide ziemne, tetcuh. Herakesiabe n napui dade mpetti da." 30 Pa kilung caili gwang ge henanabe zeu ga zeubam nah herakesiabe mpet kedi ngaulu.

31 Ge Jisu nah pe caisuime Tyre cuikui gade tetpwa Sidon kegwang Galilee jaaidi nah Decapolis cuikui kecang gwang. 32 Penui cika mige kwenpang nah keletlaume ge de peda ngngwa gwang, nah pe reuga pe ba hwagai beulo penui kiedi. 33 Jisu pecu hemaabe dade ngngwa ntsam kelucai, pa pekün gage pe zurang kerigai, nah pa pe ncai pe ba gage kailwe pemleu tunggai. 34 Ge pa tinggim ngang pie eh pelung keherei kwa kwa eh pe dade rangdi, "Ephphatha!"* (pekie, "Ngkei dilu!"). 35 Nah pa masiulu, nah pe mleu kangria ngheudi eh pa marang mcigi lu. 36 Jisu penuide midage de ranghelo beu. Dede pa penuide kaam reuge penui rang ndu reureu ladi. 37 Penui macang sütti eh ranggai, "Pa maleune tei hemi beu da. Pa kwenpangme de peu siulu nah peletkegahme de peu maranglu da."