1 Sabbath cai benai, kemtak benai, Mary Magdalene nah Mary kedabe pui de herau de pie kera gwang. 2 Ge ainie, nnuiteu sütdi, kedanemene Rampaube gwame tinggim gade nghung eh tangtsu de kela gidi, nah cika ntum bamdi. 3 Pe rehi tingkehepik nzwa, nah pe painidung ha pwa buising nzwadi. 4 Reketme pecu hing eh mbeudi nah ketsaime nzwadi. 5 Dede tinggimgwabe mipui dage rangdi, "Ngngi so, kedanemene nnui gwaktset kedibe Jisu de peei kela Ih cibam. 6 Pa rang kegai nzwa pa au ringcuh dida nah pa aika bam meda.* Gwang delwe pa kezeuni de pielo. 7 Kelwa mie pa ledeukelumedung de paubeulo, ‘Pa ketsai gade ringcuh dida. Ainie, pa au nnui dwa rai eh Galilee ga miela dida. Cikade nnui pecu ngaulu zie.’ Ainie, Ih nnuide ranglia dida." 8 Penui ngngi nah penui sui yi süt eh herau gade mzet tetdi, nah pa ledeukelumedung de paubeu kera pak miedi. 9 Nah ainie, Jisu penaide redaulu eh ranggai, "Lungciep bam kelube tei lulo!" Penai gwang pe pi tuipwalu eh pecu recadi. 10 Pecai Jisu penui dage rangdi, "Ngngi so. Mie a siname de Galilee ga gwang lulo rang beulo. Cikade penui acu ngau luzie."

11 Mipuidung mie kela dau, ainie, herau kekwame kangge namdi ga mie eh cingku kedime dage tei kedi pelane paubeu. 12 Penui hangkiamedung de redaulu delwe aipau ha de penuide ngngwa kempau luge, penui reugwamedung de rangkang kekiee ge peu, 13 delwe penuide rangbeu, "Minadung dage, ‘Tingmui anui zip kezeu dau ge pa ledeukelumedung gwang pe paau rega pwa dida,’ de lulo beu. 14 Aipau sam de deuceudibe da gwangcang lucai, anui pe lung tei beuzie delwe nnuida peu keherei ga gwang dilak." 15 Cine reugwame rangkang keulu delwe penuide teilo kebeube teilu. Henai kecang de aipau sam de Jewme kakga rangrwa la.

16 Cu ledeukelumedung kereieket bau Galilee ga, Jisu penuide mie kera rang kebeu deutu ga miedi. 17 Penui pecu ngau luge, pecu recadi, dede kangge suihaudi. 18 Jisu gwang eh penui dage ranggai, "Tinggim nah kideu reu kengkieng pelane acu peu dida. 19 Ciziemne mie delwe heleuh leune de peu a caisuime tei lulo. Peibe, Nabe, nah kemci Rabe zi gade penuide duipum teibeu lu. 20 Nah Ih nnui dage rang kebeudung leune mzai lulo ledeu beu lulo. Ainie, Ih au nnuida lamui zie, tingkideu kegah benai kecang de."