1 Cidau Phariseeme kangge nah laisiukecime Jerusalem gade Jisu da gwang. Penui keteu eh, 2 "Daitei eh n caisuimedung paupaime zaidung gikah lano? Penui maketyei dwa penui ba mtiak lama." 3 Pa penuide sam keligai, "Iciu cai nnuide daitei eh nnuikatei nnui zaidung ziemne Tinggwang aja de de gikah lano? 4 Kedanemene Tinggwang aja kai kebeu, ‘N pui n pei de rütlu’ nah ‘Keheibe de pe pei mede pe pui de sam kesia rang cai, cipaude tsai bizie.’ 5 Dede nnui rangla, ‘Keheibe de pepui mede pepei dage, "Nang a dade ngaulu kera kengha de cu au Tinggwang de peu kedi mapeu dida, de eh rangcai,"’ 6 pa pepei de rüt mede yida, dela. Ainzwa eh nnuikatei nnui zaidung ziemne Tinggwang* sam de kemta tei dida. 7 Nnui hezai teikelamedung! Isaiah nnui ha rang kenzeu de petaulie,

8 ‘Mina aidungde penui muileudung le acu rütla,

dede penui mlung au a dade mdeila.

9 Penui acu reca kela au kemta,

kedanemene penui mina ne tei kelu zaidung de pwa penui zaidung nzwa mide ledeu kelane.’"*

10 Ge pa maadibe de qupwa pe dage kailu eh penui dage rangdi, "Kingneilu nah ci lulo, 11 Magede mina mui ga kenlütbe mide teihera lama. Meliene, mimui gade kempetbe ne mide teihera dila." 12 Ge pa ledeukelumedung gwang eh Jisu dage rangdi, "Phariseemedung sam aidungde siu luge penui lung siakedi nang ci meni?" 13 Jisu keligai, "Tsingbang tinggim kebam a Pei ne linggai kemak leune paidi zie. 14 Peu cidungde de ciciu bamlu. Penui au miakcietme muiteume. Miakcietme ge keda miakcietme lampui saulia cai, hangnana de hekwaki ga cakmie dizie." 15 Peter pe dage rangdi, "Samgwa aide anui dage ranglia lo." 16 Jisu rangdi, "Nnui de cude cilu mereu ni? 17 Keheibe de mimui ga kenlütbe mipuk ga gwang dila nah pecai mipum gade mpet dila kecu nnui ci meni? 18 Dede mimui gade mpet keladung au mi mlung gade petla. Cidungde ne mide teihera dila. 19 Kedanemene milung gade lungcet kesia, dapketset, kemmha, kerega, kenret zierang ketei, nah mide rangkemsia petla kecune. 20 Ma aidungde ne mide teihera dila. Dede heba mtiak mene maketyei au mide tei heradi lama."

21 Cipaucai Jisu cipau ni de gidi delwe tetpwa Tyre nah Sidon namdi cuikui lebie gwangdi. 22 Canaanme puige cipau cuikui gade peda gwang. Pa sah eh rangdi, "Rampaubo, David Napei! Acu ngaunggia lo, a napui de herakesiabe ne keliang msiasüt la dida." 23 Dede Jisu pe dage sam gede rang ma. Ge pa ledeukelume pe da gwang eh kiegai, "Pecu lang gidi lo, pa anui caisui eh sahla di delu." 24 Dede Jisu pe sam keli eh ranggai, "Acu mige dage de langgai ma, Israel leuhme gahkedi meuründung dage gwale." 25 Dede mipuibe gwang pe dwa keumie eh ranggai, "Rampaubo, acu ngha gailo." 26 Pa keligai, "Hename* taktyei keulwe heteunadung de kelien pwapeu kedi petau ma." 27 Pa rangdi, "Yeo, Rampaubo, dede heteunadung de pempaume taktyeibam gade tangra kemiebe tyeila." 28 Ge Jisu pe dage rangdi, "Mipuigo, n kenlum dizu; nang luu neu kela nzwa peu n ziemne tei lulo." Cipau bamdakkak siakdau pe napui yilu.

29 Cipaucai Jisu heni cikade tetpwa Galilee Jaai ga taiga ga miedi. Pecai pa hangdeutu reuga hanglwe cika ntumlu. 30 Ge mina maadi ge peda gwang. Penui pepi kesiame, miakcietme, keswame, peletkegahme, nah keteeikeneime keda kekiee de ngngwa peda gwang. Penui pepi gage penuide kaibeu, nah pa penuide teingkeibeu. 31 Iciu eh maadibe pelet kegahme marang kecu, keswame teingkei kelu, pepi kesiame tet kecu, nah miakcietme mangau kelu ngau luge penui macang sütdi. Nah penui Israel Tinggwang de twadi.

32 Pecai Jisu pa ledeukelumedung de qulu eh rangdi, "Ih maadibe de ngaupwa a lungsia dida, kedanemene penui langcumne acu ngngwa dida nah penui magede tyei kera bam meda. Ih penuide matyei mene lang gidi neu ma, mecai penui lampui gade temidi lubui." 33 Ge pa ledeukelume pe dage rangdi, "Mina lungh kemak ni aikade maadi aikiee ge tyei nggeilu kera anui dai gade taktyei ngaulu laino?" 34 Jisu penui de keteu, "Nnui tangku dai kieege bam no?" Penui keligai, "Tangku kwak hena, nah heka keceunadung kecam nage." 35 Ge Jisu hemaabe de hangdeu ga ntum lulo beu. 36 Pa tangku kwak hena nah hekanadung de keulu, nah Tinggwang de hetwa peu kelucai, pa tangku kwadung de teipanglu eh cidungde pa ledeukelume de pwapeu. Ledeukelume cidungde pwa hemaabe de peu. 37 Penui pelane tyeilu nah nggeilu. Pecai penui taktyei tyei kebangbe hebie hena hekwa puilu. 38 Matyei kelume mipei cang mdai, mipui nah hename si mene. 39 Pecai Jisu maadibe de lang gidi, eh liem ga nlütlu delwe tetpwa Magadan* cuikui ga miedi.