1 Jisu penui dage samgwa gade marang daigai, 2 "Tinggim hegwangram au hegwangpei ge pe napei ziemne laktak ngyi ge mteikelu nzwa delie. 3 Pa laktak ngyi ga gwang lulo de qu kenzeume de qu kerane pe kilame de langgai, dede penui gwang raudi. 4 Hegwangpei pe kila kedadung de langgai dai eh ranggai, ‘Qu kenzeume de rang lo, "Ainie, Ih taktyei mtei luda. A tumseudung nah hetumna pelui keyibe gi pwa bam dida, nah ma pelane mtei pwa bam dida. Laktak ngyi ga gwang lulo.’" 5 Dede penui cide malie tadi eh tetdi, hangge pe luh ga miedi, keda ge pe litak lebie miedi. 6 Kedame hegwangpei kilamedung de tuilu eh penuide teu hengngam tei, delwe penuide teitsetdi. 7 Hegwangpei pe ratadi, nah pa pe reugwame de langgai eh mide dapketsetmedung de teitsetdi nah penui namdi rudi. 8 Pecai pa pe kilamedung dage rangdi, ‘Laktak ngyi mtei luda, dede qu kenzeumedung au gwang dui dida. 9 Ciziemne nnui puihaidung kekah ga mie delwe mina ngau kelu leune de laktak ngyi gage qu gailu.’ 10 Kilame cidungde puidikidung ga mie delwe mina keyi kesia leune de qu hekwa teu gwanglu. Cine laktak kibung ga pe giame ne puilu. 11 Dede hegwangpei pe giame de pie zie lie nlüt luge, cika mige laktak paini teu mene kebam pa ngaulu. 12 Ge hegwangpei pa dage rangdi, ‘Azangbo, nang laktak paini *teu mene dai nzwa aika lütlu dino?’ Dede minabe marang gailak di. 13 Pecai hegwangpei kilamedung dage rangdi, ‘Mina aipaude pi nah pe ba kanglu, delwe pecu hegwale kemui gage kelien gai dilu, cikade hap nah geigim pung bam dizie.’ 14 "Kedanemene qu kelu au mina kieesüt, dede kedetkelume au kecam nage."

15 Pecai Phariseemedung mie delwe dai nzwa penui pecu pe samdung gade pecu tuilu ziebi kecu riem ladi. 16 Cipaucai penui caisuimedung nah Herodiame de penui pe dage langgai. Penui rangdi, "Keledeubo, nang samsang kecu anui ci, nah nang kesangsiak gade Tinggwang zai mide ledeu la. Mikeheibe de daipai cet zie bi kecu nang lungpang lama, kedanemene nang mina sap de de piela kemakne. 17 Cine nlung cet anui dage ranglia lo? Caesar *de heraha habeu kera hezai mi meno?" 18 Dede Jisu penui ciem kesiadung cilu eh rangdi, "Daitei nnui acu kedei lano, nnui hezaiteikelamedung? 19 Heraha hakela rangkanggeu acu keulia lo." Cidau penui pe dage denarius ge* teugwang beu. 20 Jisu penui de keteu, "Aide caube mie nah caube zi no?" 21 Penui pe da, "Caesar," de rangdi. Ge Jisu penui dage rangdi, "Iciucai Caesar gu Caesar de peu dilu nah Tinggwang gu Tinggwang de peu dilu." 22 Penui cide siu luge, penui macangdi. Pecai penui pecu pütdi eh tetdi.

23 Cipaunai Sadduceemedung kangge, ringcuhdai kelu gahlie rangkelame, pe da gwang. Penui pecu keteugai, 24 "Keledeubo, Moses, ‘Mige pe name lungh mene tsaidi cai, pe sinabe de peu pe nau de luulu delwe pe sinabe name lunghlu maisia,’ debeu.* 25 Cu anui kakga sinamedung hang hena bamla. Cingtube pe nau teilu ge pena lungh mene tsaidi. Nah pa pe caihereibe de pe naude gidiak. 26 Ge pe sina pekenabe de cinzwa teidi, pecai pekecumbe de cinzwa jüja pehenabe kecang. 27 Penui pelane tsai kedi cai, mipuibe de tsaidi. 28 Cu ringcuhdai kecu benai, cipau puide sinamedung hang hena gade caube nau zie no? Kedanemene penui pelane de pecu luulu de kecune." 29 Dede Jisu penuide keligai, "Nnui cet maula dida, kedanemene nnui Kesanglaisiu mede Tinggwang kengkieng de ci kemakne. 30 Kedanemene ringcuhdai kecu benai laktak tei mede hemeu meu lak. Meliene, penui au tinggim ga tinggimgwame nzwa dizie. 31 Dede nnui ketsaime ringcuhdai kecu ha, Tinggwang ne nnui dage kerang de Kesanglaisiu gade pei meni, 32 ‘Ih au Abraham Tinggwang, Isaac Tinggwang nah Jacob Tinggwang’? Tinggwang au ketsaime Tinggwang ma, dede keringme gu lie."* 33 Maadibe aide siu luge, pe keledeu samdung ziemne penui macangdi.

34 Dede Phariseemedung Jisu Sadduceeme sam deu nggah kedi siu luge, penui gwang ngkwalu. 35 Penui kakga hezaikecime ge hangge, pecu kedei eh mage keteu, 36 "Keledeubo, hezai kaikebeu gade dai dele ditu no?" 37 Jisu pe sam keligai, "‘Rampaube n Tinggwang de n nlung pelane, n keringria pelane nah n lungcet pelane teu hung lulo.’* 38 Aide hezai kaikebeu raitu nah ditube da. 39 Nah hezai kaikebeu pekenabe cai, ‘Nkatei ncu keku nzwa n kidacaina de ku lulo,’ de kecu deda. 40 Caihakecime samdung nah hezai* pelane aipau kena ga ngngei pwabam."

41 Phariseemedung gwang ngkwa kebam dau, Jisu penui dage mage keteu. 42 Pa keteugai, "Nnui Khrista ha daipai ge cet lano? Pa cau napei no?" Penui keligai, "David napei." 43 Ge Jisu penui dage rangdi, "Iciu cai dainzwa David Tinggwang Rabe gade pecu Rampaubo de qu eh,

44 ‘Rampaube a Rampaube dage rangdi,

"A ba zetle bamlu,

Ih n ngauraume de pwa n pidau teidi kemakta,"’ de eh rang no?*

45 David Khrista de ‘Rampaubo,’ de qu cai dainzwa pa David na lu laino?" 46 Migede sam tie ge de teu pe sam kelilu tadi, nah cipaunai gade, migede pe dade ma keteu hingdi.