1 Cidau tingdau duipumketeibe John Judea hetaideu gade mide ledeu gwang eh ranggai, 2 "Helungnreu lulo, kedanemene tinggim hegwangram nnadi delu." 3 Kedanemene mina aipaude caihakecibe Isaiah ne rang kegaibe deda,
"Mige hetaideu gade sahbakla,
‘Rampaube lampui mtei lulo,
pe lampuidung tei mzuilu.’"
4 John aipau de ut mai le pe paini tei nah teigeu kiakang pekia ga kang teula. Pe taktyei au tangrim nah heliadui. 5 Pecai Jerusalem, nah Judea pelane, nah Jordan Reu twakengwa cuikui pelane gade mina peda gwang. 6 Penui maudung petlu eh pa penuide Jordan Reu gade duipum teibeu. 7 Dede Phariseeme nah Sadduceeme mina kekiee ge duipum tei kera peda gwang kela pa ngau luge, pa penui dage rangdi, "Nnui neiduipui leuhmedung, caune nnuide Tinggwang lunghop gwang kela gade pak lulo rangbeu no? 8 Helungkenreu tsi bui lulo. 9 Nah nnui kakgade, ‘Abraham au anui pei lie,’ de eh rang kera cet so. Kedanemene Ih nnui dage rang gaila, Tinggwang au Abraham ziemne hename aipau tangtsudung gade teucuh lubui. 10 Dede mreube tsingbang mah gage kaizeu dida. Cine tsingbang petsi keyi builu kemak keheibe de bi kaudi eh mi gage keliengai dizie. 11 Ih nnuide helungnreulu kerane dui le duipum teibeu. Dede acai gwangkelabe au aswa diki, nah Ih au pe picumdung pwalu kerade duilie. Pa nnuide Kemci Rabe nah mi le duipum teibeu zie. 12 Pe ciudap peba gala, pe hecaipung gui mcigilu kerane, nah ciudung pebau gage hekwalu kerane. Dede pa perie pwa madaude mmüt kelak mi gage ru dizie."
13 Pecai Jisu Galilee gade Jordan Reuki ga John da gwanglu, pe dade duipum tei kerane. 14 Dede John pecu kam kera tei eh, ranggai, "Nangne acu duipum tei kerabe, dede nang ada gwang lani?" 15 Dede Jisu keligai nah pe dage rangdi, "Cu tei kera peulo, kedanemene kemzuibe leune teicang kera anai ziemne petaulu." Cine John suizwalu. 16 Pecu duipum tei luge, Jisu dui gade zette cuhlu, nah ainie, tinggimdung pecu ngkei pwapeu, nah pa Tinggwang Rabe tamhau nzwa hung eh pereu ga mtak kedi ngau. 17 Ge, ainie, makwa ge tinggim gade, "Aide ana akube. Ih pecu a suisüt bam," de eh rangdi.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)