1 Herod hegwang ketei tingdau Judea deu Bethlehem* nam gage Jisu de mna kelucai, ainie, makecimedung naimiak kepetle deu lamde Jerusalem ga gwang, 2 keteu, "Daiga Jewme Gwang mna kenzeube de bamno? Anui naimiak kepetle cuikui de pe gi ngau eh pecu reca kerane gwangla."✝ 3 Dede hegwangpei Herod sam aide siu luge, pa pelung keherei sütdi, nah pecu ngngwa Jerusalem ga kebam pelane cinzwadi. 4 Pecai Herod cingku kedimedung nah laisiukecime pelane de qu hekwalu, delwe pa penui dage keteu, "Khrista de dai gage mna zielie lano?" 5 Penui pe dage rangdi, "Judea deu Bethlehem gage, kedanemene caihakecibe ainzwa rau nzeulu,

6 ‘Dede nang Bethlehem, Judahme deu gade,

Judah ga kedimedung kakgade ceutunabe meda,

kedanemene nda de hegwang ge gwang zie

a mina Israel mapie kerabe.’"✝

7 Pecai Herod ngkim eh makecimedung de qulu, daidau ting siakdau hegi petti bi kecu penui dade keteu kerane. 8 Pecai pa penui de Bethlehem gage langgai eh ranggai, "Mie delwe henanabe de peei sünne lu. Nnui pecu ngaulu de, acu ranglia lo, ciude Ih de gwang eh pecu recalu kerane." 9 Penui hegwangpei rang kegaide siu kelucai, penui lampui gage tet gaidi, nah ainie, naimiak kepetlebie penui hegi kengau de penui dwarai jüja mie, henanabe kebam peureu ga gwang mtakdi kemaktane. 10 Penui hegi de ngau luge, penui suiyisüt eh bamdi.✝ 11 Pecai penui kilung ga lütlu delwe henanabe de pepui Mary ne ngngwa kebam ngaulu. Penui keumie eh pecu reca. Penui mabamdung de hiaklu eh kecak, perimkehengui nah maca mapeudung pwa pecu peugai. 12 Dede hemang gade Tinggwang penuide Herod da cailigwang dai helo beu, cine penui lampui kedale de penui deudi rip gage tetgaidi.

13 Penui tet kedicai, ainie, Joseph mangle de Rampaube gwame ge peda gwang eh ranggai, "Cuhlu, henanabe de nah pepui de ngngwa eh Egypt gage pakgailu. Ih n dage sam kaibeu kemaktane cika bamdi lu, kedanemene henanabe de teingkapdi kerane Herod pecu peei gwang zielu." 14 Cine cipau ziu, Joseph cuhlu, nah henanabe penai pepuide ngngwa pwa Egypt gage tet gaidi. 15 Herod tsaidi kemaktane penui cika bamdi. Aide Rampaube caihakecime dage, "Ih Egypt gade anade qu mpetlu," de eh rang kegai de teicanglu kerane.✝

16 Pecai Herod, makecimedung pecu nuineu kebam pa ngaulu ge, pe rata sütti. Cine pa langgai eh Bethlehem nah cipau cuikui pelane ga kebam mipeina hename leune, mmi kena nah pe ngkangme de teitsetdi, pa makecime dade peting ci siakte kelu rehi gade. 17 Iciu eh caihakecibe Jeremiah rang kenzeu de teicanglu, pa ranggai,

18 "Ramah gade makwa ge siudi,

kehap nah misuisiasüt kecu ge,

Rachel pe namedung ziemne kehap,

nah pa pelung taumla neu tadi, kedanemene penui gah kedine."✝

19 Herod tsai kedicai, ainie, Rampaube gwame ge Egypt gade Joseph da pemang lede gwang eh, 20 ranggai, "Cuhlu nah henanabe penai pepuide ngngwalu delwe Israel deu gage tet gailu, kedanemene henanabe keringria ngkapdi kera peei kelame tsaidi delu."✝ 21 Pecai Joseph cuhlu, delwe henanabe penai pepuide ngngwalu, delwe Israelme deu ga gwangdi. 22 Dede Archelaus pe pei Herod bam leu eh Judea deu ga kengkieng teu kebam ha Joseph siu luge, cika tetgai kera pa ngngidi. Pemang lede Tinggwang pe dage marang kegaicai, pa Galilee cuikui lege tet gaidi, 23 nah mie delwe Nazareth lie qukela namdi ga lunghdi. Ainzwa eh, caihakecime pecu Nazarene lie de qu zie de rangpwa kelade teicanglu.✝