1 Jisu kideutu gade nghung luge, mina maadi ge pecai sui ladi. 2 Cidau, kempame ge peda gwang nah pe dwaga koktungmie ranggai, "Rampaubo, nang nsui lie cai, nang acu teimci lubui." 3 Jisu pe ba ketwa mpet pecu deugai eh ranggai, "Ih a lungning da. Mci lu." Ge zette pa pempa de gade mcilu. 4 Ge Jisu pe dage rangdi, "Nang mige dage de ranglia so. Dede mie delwe nkatei npum cingkube de pung lialu nah ratakdung Moses ne rang kebeude teilu, penui ziemne zierang ge kerane."✝

5 Jisu Capernaum* ga lüt luge, haireukedime ge pe da gwang eh pe dade kiegai, 6 nah rang eh "Rampaubo, a kilabe mnoi nah teeisüt eh kilung ga zeu zeulie." 7 Jisu pe dage rangdi, "Ih gwang delwe pecu teingkei beuzie." 8 Dede haireukedibe pe sam keligai eh rangdi, "Rampaubo, Ih ncu peu a kikang ga lüt kera duilie, dede nang sambe rünne ranggai lo, iciude a kilabe yilu zie. 9 Kedanemene Ih de kengkieng kangga kebamme ge, nah Ih a kangga reugwamedung bam. Ih aipaude de, ‘Tetti,’ dege pa tet dila, nah kedabe de, ‘Gwang,’ dege pa gwang dila, nah a kilabe de, ‘Aide teigai,’ de ge pa tei beula." 10 Dede Jisu aide siu luge, pa pe macang eh pecai sui kelame dage rangdi, "Ih nnui dage rangsiakte liazie, Israel ga pe kenlum kedi migede aipaude kenzwa ngau mereu. 11 Dede Ih nnui dage ranggai la, mina kekiee naimiak kepetle nah naimiak kenlütle de gwangzie, nah penui tinggim hegwangram ga Abraham, Isaac, nah Jacob de ngngwa bamzie. 12 Dede hegwangram name dungde* au hegwale kemui gage kelien gai dizie, cikade hap nah geigim bam dizie." 13 Pecai Jisu haireukedibe dage rangdi, "Tetcu! Nah nang nlumkelu nzwa, peu n ziemne teicang kelube tei lulo." Nah pe kilapei cipau bamdakkak dau yilu.

14 Pecai Jisu Peter ki ga gwang keludau, pa Peter nau pui mra eh zeu kebam ngaulu. 15 Jisu pe ba tunggai, ge pa mrata di. Nah pa cuhlu delwe pe gwatei cuhdi. 16 Tinghegi gwang ge, minadung herakesiabe ne ngngwa teu kelame kekiee ge de Jisu da ngngwa gwang. Pa cipau rabedungde de pe sam le mpetdi nah mateei kela leude teingkei beu. 17 Ainzwa eh Isaiah caihakecibe ne sam rangkenzeu de, "Pa ne anui mateeidung luulu nah anui mateeidung pung luda," de kecude teicanglu.✝✝

18 Jisu maadi ge pecu twagwa kebam ngau luge, Pa Galilee jaai keda lebie gim ge tetgai kera pa ledeukelume dage sam kaibeu. 19 Ge laisiukecime ge peda gwang eh rangdi, "Keledeubo, nang keheiga mie liede Ih n caisui zielie." 20 Jisu pe dage rangdi, "Maiserung de pe ki bam, nah tingkam ruinedung de peciep bam, dede Mina Nabe* au pe peu kaizeu kera ni de gah lie." 21 Pe caisuime kedage pe dage rangdi, "Rampaubo, acu peu keraibe gwang delwe a peide kungdi railo."✝ 22 Dede Jisu pe dage rangdi, "A caisuilu, nah ketsaime de peu penuikatei penui paau kung kera püt zeudi."

23 Pa liem ga nlüt luge, pa ledeukelume de pecai sui nlütlu. 24 Ainie, jaaidi ga rahang kedi ge cuhdi, iciu eh liembe dui nswak ne gum puipung ladi. Dede Jisu au ziep zeu. 25 Ge ledeukelume pe da gwang eh pecu ngkia, ranggai, "Anuide kelibeu lo, Rampaubo; anui tsaidi lauda!" 26 Jisu penui dage rangdi, "Daitei nnui ngngi lano, nnui kenlum kecamnadung?" Iciu eh pa cuhlu delwe tingkai nah jaaidi de kesiugai. Ge ngkaam zingdi. 27 Dede minadung penui macangdi eh hangge ge dage rangdi, "Mina aipaude daikenzwa kauge no ai, tingkai nah jaaidi kecang de pesam mzai kecu?"

28 Jisu keda lambie, Gadara deudi ga gwang luge, herakesia ne ngngwa kela mina hangna pecu redaulu. Penai heraudung gade mpetla nah penai zai sia sütla, cine migede cipau lampui ga tetkah luma. 29 Ainie, penai sahbak eh, rang eh ranggai, "Tinggwang Nabo, anai ncu ngngwa daipai tei laino? Nang peting cang kemakne anaide teikeherei kera aika gwang lani?"✝ 30 Cidau hebak hau maadi ge cika mapeei tyeila, penui dade ndei süt kemak gega. 31 Herakesiabedung Jisu dade kie eh ranggai, "Nang anuide gwa mpet ziecai, anuide lang pwa hebak hau gage kai dilo." 32 Ge Jisu penui dage ranggai, "Tetdi!" Cine herakesiadung mpetdi nah hebakdung da miedi; nah ainie, hebak hau pelane hetialwa gade rejaai ga pak reniamie eh penui dui gade tsaidi. 33 Dede hebak kekwamebau pak pwa namdi ga gwanglu delwe ma pelane paubeu, nah herakesia ne ngngwa teu kelabe kenade da daipai tei dibi kecu de si eh paubeu. 34 Ainie, renam gade mina pelane Jisu de redau kera gwang. Penui pecu ngau luge, penui pecu penui cuikui gade tetdi lo kie bidi.