1 Jisu kerecaki gade tet mpet keladau, pa ledeukelume pecu kereca kidung saulia zie lie gwang. 2 Dede penui dage rangdi, "Nnui aidungde ngau meni? Ih nnui dage rangsiakte gaila, cidungde tei msia ciak dizie. Tangtsu gede kedage reuga keswa pwa bamlak."

3 Pa Olive Deutu reu gwang bam luge, pa ledeukelumedung ngkim peda gwang ranggai, "Daidau aidungde tei gwang ziebi anuide ranglia lo? Nang gwang daikera nah kideu cangdi kera marehi de daikenzwa ge zieno?" 4 Jisu penui sam keligai, "Nnuide peu mide cwadi melu kerane sünne lulo. 5 Kedanemene mi kekiee ge a zi teu eh gwang zie. Penui, ‘Ih Khristabe delie,’ de eh rang zie, nah mi kekiee gede cwa dizie. 6 Nnui hereudung ketei nah hereudung ketei ha kerang de siu zie. Dede nnui lung keherei diso, kedanemene aidungde gwang bi maisia; dede penlibe au mereu. 7 Heleuh ge heleuh keda gede ngaurau, nah hegwang ge hegwang kedage de ngaurau dizie. Heni ketsamtsam ga herakum kum nah nnui teu dizie. 8 Dede aidungde au hena kemna tedteei* keraibede cai sima. 9 Pecai penui nnuide pwa tei keherei nah nnuide teitset dizie. Heleuh leune nnuide a zi ziemne ngaurau dizie. 10 Pecai mi kekiee ge kau dizie, nah hangge ge de cwa nah ngkau dizie. 11 Kenret caihakecime kekiee ge cuh zie nah kekiee gede cwateu dizie. 12 Kedanemene kesiabe kiee reureu dizie, nah mi kekiee ge kekukehung ngkung dizie. 13 Dede penli kecang liakelube de au kelilu zie. 14 Hegwangram samliakeyi aide kideu pelane dage pau zie, heleuh pelane dage zierang tei eh. Pecai penlibe gwang zie.

15 Ciziemne, nnui makesia kengkau ketei, caihakecibe Daniel ne kerangde, kemci ni ga sap eh ngau keludau" (peu kepeime de ci lulo),* 16 iciude Judea ga kebamme de peu lamlwatudung ga pakgai dilu, 17 peu kiniem ga kebambe de pe ki gade magede keulu zie lie nghung so, 18 nah pe luh ga kelabe de peu pe pai keu kera cailigwang so. 19 Dede cipau tingdau mipui tetlak kelame nah nepam kelame ziemne ainie! 20 Nnui kepak tingde tingtiak mede Sabbath benai melu kerane kekie teilu. 21 Kedanemene cipaucai keherei süt kecu gwang zie, kideu ndeu kelu gade cu kecang, mede pecaide teidai kelak reirei zie. 22 Cipau tingba ziedung de teimduidi mecai, migede de keliu gailak. Dede kedetkelume ziemne, cipau tingba ziedung de teimdui dizie. 23 Ciu eh mige ncu, ‘Ainie, aika Khrista bam!’ mede, ‘Pa cika bamda!’ de eh rang de cide nlum so. 24 Kedanemene Khrista kemak nah kenret caihakecimedung gwang zie nah marehi kedi nah miswakegahdung tei liazie, iciu eh teilu buicai, kedetkelumedung de de cwateu dilu kerane. 25 Ainie, Ih nnui dage nrai ranglia zeu delie. 26 Ciziemne, penui nnui dage, ‘Ainie, pa au hetaideu gala,’ de rangde cika mie so. Mede, ‘Pielo, pa kibung pelung ga bam,’ de rangde cide de nlum helo. 27 Naimiak kepetlede ting hepik kegai naimiak kenlüt le de ngau gwang kela nzwa, Mina Nabe kegwang de ciciu zie. 28 Makaune tsai kebam leuga, heraruidung gwang ngkwa bamzie.

29 Dede keherei ciciu kedicai zette tingnaimiak mui dizie, nah hekei baabeu ta dizie, nah heghidung tinggim gade cakmie zie, nah tinggim kengkieng de teu kelai dizie. 30 Pecai Mina Nabe rehi tinggim gade ngau dizie, nah pecai kideu ga heleuh leune hap dizie. Penui Mina Nabe kengkieng nah kendu kedige teu delwe hemwa reu gade kegwang ngauzie. 31 Khrista pe tinggimgwamedung de langgai eh telui kwa sahbak gaizie, nah penui kedetkelume de tinggim kungdung mdai lebie de hekwa luzie, tinggim penli ket lamde keda lambie kecang.

32 Samgwa aide tangzüttsi bang gade ci lulo. Pe kiak renu kedi dau nah penei bwapet dai kecu dau, nnui hepwakting nna dida de kecu cilu la. 33 Cinzwa eh, nnui ma aidungde pelane ngau kelu dau, nnui Khrista nna dida nah heriekidung ga bam dida de kecu cilu maisia. 34 Ih nnui dage rangsiakte gaila, ma aidungde tei gwang canglu kemaktane aipau ceheu de gahdi lak. 35 Tinggim nah kideu gah dizie, dede a samdung au madaude gah dilak.

36 Dede cipau tingba nah pe bamdakkak de migede cima, tinggimgwame de nah Nabe de, Apei rünne gwale. 37 Noah tingdau nzwa, Mina Nabe kegwang daude cinzwa zie. 38 Kedanemene cipau tingdau, duinai kegwang dwa, penui matyei nah sak bam, nah henautei hemeumeu bam, Noah liem ga nlüt kecu benai kecang, 39 nah duinai gwang penui pelane de tiapung tetdi kemaktane penui magede cima, Mina Nabe kegwang dau de cinzwa zie. 40 Cidau hangna luh ge ga lazie, hangge de ngngwa teu dizie, nah hangge de gidi zie. 41 Mipui hangna ciu tau bamzie, hangge de ngngwa teu dizie, nah hangge de gi dizie. 42 Ciziemne nnui mriak bam lulo, kedanemene nnui Rampaube daipau nai gwang zie bi nnui ci melu. 43 Dede aide cilu, ki mpaube keregabe daipau tingdau gwang zie bi kecu ci liecai, pa kwabam zie nah peu pe ki mide raklüt lak. 44 Ciziemne, nnui de mtei lwe bamlu maisia, kedanemene Mina Nabe nnui cet mene kebam bamdakkak ga gwang zielu.

45 Ciciu cai samsang nah kemteu kilabe cau no, pe mpaube pe kilungme de pie rengei nah peting siakdau taktyei peu kera kengkieng kepeube de? 46 Pe mpaube kegwang dau, aidungde tei bam eh ngaukelu kilabe au samlam pungtu lie. 47 Ih nnui dage rangsiakte gaila, pe mpaube cipaude de pe gudung pelane pierengei kera peuzie. 48 Dede kila kesiabe, pe lung gade, ‘A mpaube gwang ri dida,’ de eh rang 49 delwe pe zangme kila kedadung de dap cai, nah zau kesakme de ngngwa tyei nah sak bam cai, 50 pecai kila cipaude mning mezing kebam dau nah pe bamdakkak ci kemak tingdau pe mpaube gwangzie. 51 Pa pecu dang kecai dizie delwe hezaiteiketeime da peu bam dizie, kehap nah geigim pung kebam ga.