1 Mide mmau so, iciude Tinggwang de nnuide mmau melu kerane. 2 Kedanemene nnui mide kemmau kenzwa, nnuide de mmau zie, nah nnui mide mdet pwapeu kela mdetde le, nnuide de mdet beuzie. 3 Daitei eh n sinabe miak ga kehera keceuna ge kebam de pie lano, dede nkatei n miak ga tsinglwa kebam de be ngau lama no? 4 Mede dainzwa n sinabe dage, ‘N miak gade kehera de peu acu keu mpetlu,’ de eh nang ranglu laino, ainie, nkatei n miak ga tsinglwabe bam mene? 5 Nang hezai teikelabe! Keraibe nkatei n miak gade tsinglwa kebam de keumpet dilu, nah pecai n sinabe miak ga kehera kebam de ngau mcigi eh keumpet luzie. 6 Ma kemcibe heteudung de peu so, nah ngu tangtsu hebak hau dwa gage kelien gaiso. Mecai penui pi le cidungde daudi lubui, delwe nreu gwang eh ncu teu rak kecai dizie.

7 Kielu, ciciude nnuide pwapeu zie. Peeilo, iciude nnui ngau luzie. Ketunglu, iciude nnuide ngkei beuzie. 8 Kie kelame leune, ngau lula; nah peei kelabe, ngau lula; nah ketung kelabe de, ngkei beuzie. 9 Mede nnui kakga mina cauge, pe napei pe dade tangkukwak ge kiege, pa pecu tangtsu pwapeu lano? 10 Mede pa heka ge kiege, pa pecu henei pwapeu lano? 11 Ciziemne, nnui kemaume de nnui name de mapeu keyi peu kera ciem ci liecai, tinggim ga kebam nnui Pei Tinggwang pe dade kie kelame de ciswa kemzu mapeu keyi peu zie meluini?✝ 12 Ciziemne, ma pelane gade, mide peu nnui dage teigai keneube, nnuide cinzwa midage teigai lulo, kedanemene aide hezai nah caihakecimedung sam delu.

13 Herieki kenrumbe gade lütlu. Kedanemene kengkap gage ngngwagwang beukela rieki au mza nah lampui de dilu, nah mina kekiee cikage tet gaila. 14 Kedanemene kering gage ngngwa gaibeu kela herieki de au nrum nah lampui de au tet keherei, nah cide ngaulu kelame au mina kecam nage.

15 Kenret caihakecimedung dade mriaklu, meurün paini kailu eh nnui da gwangla, dede helung lebie de au, penui au tuiketyei heneudung.✝ 16 Nnui penuide penui tsidung gade cilu zie. Mina hetubang gade kubetsi railu lani, mede hetubang gade tangzüttsi railu lani? 17 Cinzwa eh, tsingbang keyi leune petsi keyi bui lula, dede tsingbang kesiabe petsi kesia bui beula. 18 Tsingbang keyi ge petsi kesia bui gailak, mede tsingbang kesiabe petsi keyi bui gailak. 19 Tsingbang petsi keyi builu kemakpe leune bi kaudi eh mi gage kelien gai dila. 20 Cine, nnui penuide penui tsidung gade ci luzie. 21 A cule, ‘Rampaubo, Rampaubo,’ de rang kelame leune tinggim hegwangram ga nlüt gailak, dede tinggim ga kebam a Pei lungning teilu kelame rünne zie. 22 Mina kekiee ge cipaunai* a dage rangzie, ‘Rampaubo, Rampaubo, anui nzi gade caihakecisam rang meni, nah n zi gade herakesiadung de gwa meni, nah n zi gade miswakegah bata kekiee tei meni?’ 23 Cidau Ih penui dage rang zie, ‘Ih nnuide madau gede cima! A dade mbai dilu, nnui kesiata tei kelamedung!’✝

24 "Ciziemne, keheibe de a sam aidungde siulu delwe tei mzai kelame au makecime ge tsura reu gage pe ki tei kelume ge nzwa da. 25 Tingrui hung, nah duidi gwang nah tingkai gui gwang delwe ki cide de samlwa, dede cide kau dima, kedanemene cide tsura reu gage tei kelune. 26 Dede keheibe de a sam aidungde siulu delwe cidungde tei mzai kemakme au kemieme ge heciangreu gage pe ki tei kelube nzwa da. 27 Tingrui hung, nah duidi gwang, nah tingkaidung gui gwang delwe ki cide de sam, nah cide kaudi, nah cide kengkap au dizu."

28 Jisu sam aidung de rang cang luge, maadidung pe keledeu sam de ziemne penui swa gahdi, 29 kedanemene pa penuide kengkieng teu kebamme nzwa, nah penui laisiukecime nzwa mene ledeu kecune.