1 Cipaunai Jisu kiga gade tetpet Galilee jaaidi kung ga bamlu. 2 Mina maadi ge ngkwalwe pecu twagwalu, cine pa liem gega lütlu delwe cika bamlu, cidau maadi pelane duikung ga saplu. 3 Ge pa ma kekiee ge penui de samgwa keda eh ranglia, "Ainie, hetaketame ge heleuh nrok zielie mie. 4 Pa heleuh nrok gai ge, heleuh kesa lampui kungga cakmie di, nah nruinedung ne gwang cidungde pa tyeilu. 5 Keda leuhdung tsura reu, tangdei kiee kemak ga cakmiedi. Cidungde pwak zette cuhlu, kedanemene pedeu siu kemakne. 6 Dede tingnaimiak cuh luge, pe mah him ncuklu kemakne mabangdung de pu kidi. 7 Keda leuhdung hetu bangdung kakga cakmiedi. Hetu bangdung lungh cuhlu delwe cidungde de zin tsetdi. 8 Keda leuhdung tangdei keyi ga cakmielu eh petsi builu, kesa hai, kesa riakherok nah kesa camrei. 9 Caugame pe kwen bambi, peu kingnei lulo."

10 Ledeukelumedung Jisu da gwang eh rangdi, "Daitei nang mina maadibe dage samgwa gade marang no?" 11 Pa sam keli eh penui dage ranggai, "Nnui de tinggim hegwangram sam kecukdung de cilu kera peu dida, dede kedame de cide pwapeu ma. 12 Keheibe de ma peda kebamme de peusi zie delwe peu pegu pui nlim luzie. Dede keheibede ma peda kegahbe, peda kebam nade de keuteu dizie. 13 Aide ziemne Ih penui dage samgwa gade marang bam: penui piebam de; penui ngau gailak, nah penui siubam de, penui siu ma, mede ci luma. 14 Caihakecibe Isaiah caihakecisam ainzwa kerangdung de penui da teicang luda.✝

‘Nnui siu kesang zie, dede nnui ci gailak;

nnui pie kesang zie, dede nnui ngau gailak.

15 Kedanemene mina aipaume lung mang dida,

nah penui kwen tak dida,

nah penui penui miak ziangmui dida,

iciu mecai penui penui miak le mangau luzie,

mede penui kwen le masiu luzie,

mede penui mlung le macet ci luzie,

nah penui nreu caili gwang dai zie,

nah Ih penuide teingkei beuzie.’

16 Dede nnui miakdung nah kwendung samlam pungtu lie, penui ngau; nah siu kelane. 17 Ih nnui dage rangsiakte gaila, caihakecime kekiee ge nah makesangme kekiee ge nnui ma kengaudung de ngau neusüt, dede cidungde ngau luma. Nnui ma kesiudung de penui siu neusüt, nah cidungde siu luma. 18 Heta ketame pe leuh gi kegaibe samgwa de kingnei lulo. 19 Keheibede hegwangram sam siulu dede cide cilu kemakme, kesiabe gwang eh pe lung ga linggai pwa kebam de sütteu dila. Aidungde heleuh nrok pwa lampuikung gage kai kedibe delie. 20 Heleuh nrok pwa tsura reu gage kai kedibe cai, sambe siulu delwe pe suiyi süt eh cide zette ngaulu kelube delie. 21 Dede pekatei pe mah him mielu kemakne peting kedui nage gwale penui bamlu lama. Sambe ziemne keherei mede teikeherei kecu kegwang dau, pa zette kaumie dila. 22 Hetu bang kakgage nrokgai keludung de cai, sambe siulu, dede teilung aide nah mabam kehengim ne sam aidungde zin nggahdi eh petsi builu tadi kedibe delie. 23 Heleuh nrokpwa pedeu keyi gage kaikelube au sam cide siu lwe pekie ci kelube delie. Pa pe tsi bui kesang lula. Kangge tsi hai kecang de builu, kangge riakherok nah kangge camrei bui lula."

24 Jisu penui dage samgwa kedage ranglia dai. Pa rangdi, "Tinggim hegwangram au mige heleuh keyibe pe luh gage nrok kegai nzwa delie. 25 Dede mina ziep kezeu dau, pe ngauraume gwang eh reima leuh herei kakgage nrokgai di eh tetdi. 26 Cidungde pwaklu cuh eh pe tsi bui keludau, reimadungde lungh cuhlu. 27 Hangdeu mpaube kilame peda gwang eh rangdi, ‘Kedibo, nang heleuh keyibe n luh gage nrok gai meni? Dainzwa eh reima lungh dino?’ 28 Pa penui dage rangdi, ‘A ngauraume ne aide tei gaida.’ Kilame pe dade rangdi, ‘Iciucai nang peu anuide mie cidungde pai mpetdi neuni?’ 29 Dede mpaube rangdi, ‘Lak. Kedanemene nnui reimadung pai mpet keladau, nnui cidungde si eh wheat de pai dilu builu. 30 Peu penaide luhlüt kemaktane ngngwalung ncüt bamlu. Luhlüt ting daune Ih luh rumkelame dage rangzie, "Keraibe reimadung pai mpetlu eh cidungde kanglwe rudi, dede wheat de a bau gage hekwalu."’"

31 Jisu penui dage samgwa kedage ranglia dai. Pa rangdi, "Tinggim hegwangram au mige ziegitsi leuh teumie pe luh gage nrok kegai nzwa delie. 32 Kesang cide au heleuh pelane kakgade ceutuna ge. Dede cide lungcuh keludau, cide hegurie ga mabangdung swade di. Cide tsingbang tei lula, iciu eh ting ruinedung gwang pe kiakdung gage pe ciep teu lula."* 33 Pecai Jisu penui dage samgwa kedage ranglia dai. "Tinggim hegwangram au mipui ge tsehi keulwe tokkui mdet kecum* gage ruiza lu eh nggau cu kemaktane kaizeu kela nzwa delie."

34 Jisu ma aidungde pelane samregwa gade maadidung dage ranggai; nah pa samgwa teu mene penui dage magede rang ma. 35 Aiciu kecu au caihakecibe dade kerang de teicanglu kerane,

"Ih a mui ngkeigai eh samgwa rangzie.

Kideu teikelu gade kebai teu keladung de Ih rangzie."

36 Cidau pa maadidung de gidi eh kilung ga nlütdi. Pa ledeukelumedung peda gwang eh, ranggai, "Luh ga reimadung samgwade anui dage rangmci lialo." 37 Pa keligai eh rangdi, "Mige heleuh keyibe nrok kegaibe de au Mina Nabe delie." 38 Heluh au kideube delie; nah heleuh keyibe cai, hegwangram namedung da. Reimabedung cai kesiabe namedung delie, 39 Nah ngauraube reima nrok kegaibe de au herakesiabe delie. Luhlüt ting au peting penli deda, nah luh rumkelame au tinggimgwame delie. 40 Ciziemne, reima hekwapwa mi gage ru kedi nzwa, peting penli dau de cinzwa zie. 41 Mina Nabe pe gwamedung de langmpet gai zie, nah pe hegwangram gade penui kemau ketei pelane nah mina kesiata tei kelamedung de penui hekwa luzie. 42 Penuide kelien pwa mi heu kebam gage kai dizie, kehap nah geigim pung kebam ga. 43 Iciu de mina makesangme penui Pei hegwangram gade tingnaimiak nzwa baa dizie. Keheibe de pe kwen kebambe de peu kingnei lulo.

44 Tinggim hegwangram au luh gage mahei kebai kenzeu nzwa delie, mige cide ngaulu eh kebaidi. Cipaude pe suiyi kedine, pa gwang delwe pegu kebam leune zwa ciaudi, delwe cipau luh de luilu. 45 Aipaucai de, tinggim hegwangram au mige heli keteime ge tsuga pemi kewhungdung peei kela nzwa da. 46 Pa tsuga ket pemi whungsüt kecu ge ngau keludau, pa pegu kebam leune zwalu eh mie cide luilu.

47 Aipaucai de, tinggim hegwangram au mige helang ge kelien pwa jaaidi gage kai eh heka ketsamtsam hekwa kelu nzwa delie. 48 Cide pui luge, heka ketuimedung cide teumpet duikung gage kailu. Cidau penui bamlwe heka keyibe hekwa pwa mabungdung gage hekwalu, dede kesiabedung penui kelien gidi. 49 Kideu cangkedi benai aiciu dizie. Tinggimgwame gwang eh mina kesiame de makesangme kakgade keu ntsam dizie. 50 Penuide kelien pwa miheu kebam gage kai dizie, kehap nah geigim pung kebam ga.

51 Nnui ma aidungde pelane cilu deni? Ledeukelume keligai, "Yeo." 52 Ge Jisu penui dage rangdi, "Cine laisiukecime leune tinggim hegwangram caisuime teikelumedung au mige kilung mpaume ge pe mabambung gade makeheci penai kehegwa li mpet kecu nzwa delie."

53 Pecai Jisu samgwa aidungde rangcang dige, pa heni cikade tetdi. 54 Ge Jisu pe nam, Nazareth ga gwang, nah penui gu synagogue gade mina de ledeu. Cide ngaulwe penui macang eh rangdi, "Aipau peide, pe maci aipaude nah miswakegah kengkieng bata aidungde daiga de ngaulu no? 55 Aipau pei de tsingta keteibe napei meni? Pepui Mary lie qu kelapui de meni? Pe caihereime James, Joseph, Simon nah Judas meni? 56 Pe time pelane de anuide ngngwa bam meni? Iciu cai pa dai gade aidungde pelane ngaulu dino?" 57 Penui au pecu mlaidi. Dede Jisu penui dage rangdi, "Caihakecime de au pekatei pe ram ga nah pe kilungme gwale mi pecu rüt kemak gah." 58 Pa cika miswakegah bata tei kiee ma penui nlumlu kemakne.