1 Jisu pa ledeukelume kereiekena de qu hekwalu delwe mcikemak rabe de gwa mpetlu kebui nah keteei keneime leude teingkeilu kebui kengkieng pwa penuide peu. 2 Langkegaime kereiekena zi cai aidungde. Raitube Simon (pecu Peter de qula) nah pe caihereibe Andrew, Zebedee napei James, nah pe caihereibe John; 3 Philip nah Bartholomew; Thomas, nah heraha kehabe Matthew; Alphaeus napei James nah Thaddaeus; 4 Simon Zealot, nah Judas Iscariot, pecai pecu tuigai beu kerabe.

5 Jisu kereiekena aidungde de sam aidungde rang eh lang mpetgai, "Gentileme lampui ga mie so nah Samariame nam ket gade lüt so.✝ 6 Meliene Israelme gah kedi meurünnadung da mielo. 7 Nah nnui kemie dau, ‘Tinggim hegwangram gwang nna ladi delie,’ de ledeu eh ranglo. 8 Keteeikeneime de teingkei lu, ketsaime de kwakcuh lu, kempame de teimci lu, herakesiabe de gwa dilu. Nnui mta ngau kelunzwa mta peu lulo. 9 Nnui rangkang bung gage kecak, rangkanggeu mede hetageu peusa pung so. 10 Nnui beuh ziemne langsung, mede mcwa kena, picum mede hetui aidungde teuso, kedanemene maketeime pepok ngau tyei builu. 11 Nnui renam mede namdi keheiga kelütdau, petau tei kebambe de peeilu, nah nnui tetdai kemaktane cika bamlu. 12 Nnui kiga kelüt dau, ‘Nnui da peu lungciep bam lulo,’ de kelum lu. 13 Magade cipau kelak de petau teicai, nnui lungciep de peu bamlu. Dede petau meliecai, nnui lungciep depeu nnuida cailigwang dilu. 14 Namdi mede kelak nnuide ngngwa ma nah nnui sam kingnei mecai, nnui cikade tet kempet dau, nnui pi gade rebui de kecung dilo. 15 Ih nnui dage rangsiakte liazie, hetuketiak benai cipau namdi de swade Sodom penai Gomorrah lialu yiki zie.✝

16 Ainie, Ih nnuide meurün de heneudung kak gage lang kegai nzwa langgaila, cine heneidung kemriak nzwa mriaklu nah tamhaudung kenciep nzwa ncieplu. 17 Mina dade mriak lulo, kedanemene penui nnuide baudibedung dage tuigai zie, nah penui nnuide synagoguedung gade dap zielu. 18 Pecai nnuide deuceudidung nah hegwangmedung dwaga a ziemne ngngwa gwang zie, penui dage nah Gentileme dage zierang teilu kerane. 19 Penui nnuide tui kegai dau, daipai rang ziebi mede dainzwa rang ziebi cetpwa nnui lung pang so, kedanemene cipau bamdakkak de gwang de daipai rang ziebi nnuide peu zielu. 20 Kedanemene nnui ne cide rang lak, dede Pei Rabe ne nnui lung gade rang zie. 21 Caihereiswacing hangge ge de ketsai gage keretuigai zie, nah pe pei pe na de cinzwa zie. Henamedung penui puipei de renia cuh delwe penuide teitset dizie.✝ 22 A zi ziemne mina leune nnuide ngkau zie. Dede penli kecang lia kelume de kelibeu zie. 23 Penui aipau namdi ga nnuide teikeherei cai, keda nam gage pak gailu. Ih nnui dage rangsiakte gaila, Mina Nabe kegwang dwa Israel namdi pelane ga nnui gwang cang gailak.

24 Ledeukelume au keledeube swa diki ma, mede kilame ge pe mpaube reu ma. 25 Ledeukelume keledeube nzwa lucai mnunglu de yi nah kilame ge pe mpaube nzwa lucai mnunglu de yi. Magade penui kilung mpaube de Beelzebul* lie qucai, pe kilung peupeime de daikenzwa gede siaki eh qu zieno! 26 Cine penuide hing so, kedanemene magede liagai kelak gumpwa kenzeu gah, nah magede ndugai kelak kebaipwa kebam gah. 27 Ih kemui gade nnui dage kerangdung de kebaa gade ranglia lulo, nah nnui kwen gade siu keludung de kipeu reu gade sahgai lulo. 28 Mipumbe de teitsetdi liede mi keringria de teitset gai kelakme de hing so. Meliene, mipumbe nah mikeringria kenana de pwa mijaai gage ngkaplu kebuibe de hing lulo. 29 Tangkine kena de peusa pakge le zwa la meni? Iciude nnui Pei ci mene kette hangdeu cak miedi lama. 30 Dede nnui peu ga tamleidung kecang de peikap luda.✝ 31 Ciziemne hing helo, nnui tangkine kekiee ge swa pemi whungki lu. 32 Cine keheibede mina dwa de Ih Tinggwang nah Rampaube lie rang cai, Ih de tinggim kebam a Pei dwa de pe zierang rang zie. 33 Dede keheibe de mina dwade acu mlai cai, Ih de tinggim kebam a Pei dwa de pecu mlai dizie.

34 Ih kideu ga kezuyi teu gwang kerane gwang lie kecu cet so. Ih kezuyi teugwang kerane gwang ma, dede kiengtie. 35 Kedanemene Ih peu pe napei de pe pei de renia, nah pe napui de pe pui de renia nah pe na nau de penai de renia kerane gwanglie. 36 Nah mige ngauraumedung au pekatei pe kelakmedung dizie. 37 Keheibe de acu swa pe pui pe pei de hungki dicai a caisuime teidui; nah keheibe de acu swa pe napui pe napei de hungki dicai a caisui teidui.✝ 38 Keheibe de pe cross pwa mene a caisui lacai a caisuime teidui. 39 Keheibe de pe teilung kainzeu lu keneume tei nggah dizie. Dede keheibe de a ziemne pe teilung ngkap kedime cide ngau luzie.

40 Keheibe de nnuide ngngwa kelube acude ngngwa lula, nah keheibe de acu ngngwa kelube acu lang kegaibe de de ngngwa lula. 41 Keheibe de caihakecime de, pa caihakecime lu de ngngwa lucai, caihakecime ziehi ngau luzie, nah keheibede makesangme de, pa makesangme lu de ngngwa lucai, makesangme ziehi nzwa ngau luzie. 42 Mina keheibe de, keceu aidung hangge de ledeukelume lu de a zi gade duikung piak nage de sak kera pwa peucai, Ih nnui dage rangsiakte liazie, pa pe ziehi gah dilak lie."