1 Pecai Jisu liem ga nlütlu delwe kahpet pe katei pe nam ga gwangdi. 2 Ainie, penui kemnoime gede perak gage kailwe peda ngngwa gwang. Jisu penui kenlum ngau kegaidau, pa kemnoibe dage rangdi, "A napei, n suiyi lulo. N mau gibeudi delie." 3 Ge ainie, hezai keledeume kangge penuikatei penui kakgade rangdi, "Aipau peide Tinggwang de rangmsia zeu da." 4 Dede Jisu penui lungcet cilu eh rangdi, "Dai ziemne nnui lung gade nnui makesia mning lano? 5 Dai paube rang laki no, ‘N mau gibeu dida,’ de kecube mi, ‘cuhlu eh tetlu,’ de kecube no? 6 Dede Mina Nabe kideu ga mina mau gibeulu kebui kengkieng kebam peu nnuide cilu kerane," pecai pa kemnoibe dage rangdi, "Cuhlu, nzeu pwalu, delwe n kilung ga gwang culo." 7 Ge minabe cuhlu delwe pe kiga gwangdi. 8 Mina maadibe aide ngau luge, penui swagahdi nah Tinggwang, kengkieng cikenzwa mina de kepeube de twadi. 9 Jisu cikade tetpet keladau, pa mige Mathew* lie qukela peige, heraha keha diki ga bam eh ngau. Pa pe dage rangdi, "Acai sui lu." Nah pa cuhlu delwe pecai suidi.

10 Pecai Jisu kilung ga matyei zielie eh lüt bam luge, ainie, heraha kehame nah kemau keteime kekieege de gwang eh Jisu nah pa ledeukelume de ngngwa matyei. 11 Phariseeme kangge cide kengau luge, pa ledeukelume dage penui rangdi, "Daitei nnui keledeube heraha kehame nah kemaumedung de ngngwa matyei lano?" 12 Jisu aide siu luge, pa rangdi, "Mina pe pum kengkingme daru kecime de teu maisia ma, dede keteei keneime rünne teu maisia. 13 Dede nnui mie delwe aipau kiede ci lulo: ‘Ih ratak swade kekube luuneu lie.’ Kedanemene Ih samsang kelamede qu zielie gwang ma, dede kemaume de qu zielie gwang."✝

14 Ge John caisuimedung pe da gwang eh rangdi, "Daitei eh anui nah Phariseemedung mmwang eh bamla, dede nang ne ledeukelume mmwang la meno?" 15 Jisu penui sam keligai, "Meunui ngyi ga kebamme lakciube penui ngngwa kebam dau penui lung sia bam lubui ni? Dede lakciube de penui dade ngngwa tedi kera tingba ge gwang zie, nah pecaine penui mmwang zie. 16 Migede paici pwa pai kehegwa gage kopgai lama, kedanemene kop kegai dene paibe teurak dizie, nah hakmsiaki dizie. 17 Mede migede zauci pwa teigeula kehegwa gage kai lama. Ciciu cai, teigeu de popdi zie, nah zaube tangra dizie, nah teigeula teimsia dizie. Meliene, penui zauci pwa teigeula keheci gage kaila, nah kenana de kwak lula."

18 Pa ma aidungde penui dage rang kebamdau, ainie, synagogue kedime ge gwang eh pe da keumie. Pa rangdi, "A napui cune tsai dida, dede nang gwang eh n ba hwapwa pe dage kaigai lo, iciude pa ring luzie." 19 Ge Jisu cuhlu delwe pecai suidi, nah pa ledeukelume de pecu ngngwa tetdi. 20 Ainie, mipui ge mmi kereiekena ge hejai eh kehereila kedi puige Jisu caile gwang eh pe pairi tung gai. ✝ 21 Kedanemene pa pekatei rang eh, "Magade Ih pe pai tunglu liecai, acu teimmi lubui." 22 Jisu nreugwang eh pecu ngau luge, rangdi, "A napoi, n suiyilu; n kenlum ne ncu tei mmilu delie." Nah cipau ting siakdau mipuibe yingkeilu. 23 Jisu synagogue muiteube ki ga gwangcang luge, terwaine kwakebammedung nah hemaabe mbum kebam ngaulu. 24 Pa rangdi, "Tet dilu, releipui tsai ma, dede pa au ziep bam." Dede penui pecu teu henuitei eh nuidi. 25 Maadibe de peu hegwale mpetdi ge, pa kibung ga lüt nah releipui ba teugai, nah releipui cuhlu. 26 Aipau ha de cipau cuikui pelane ga rang popbak ladi.

27 Jisu cikade tetkah pet ge, miakcitme hangna pecu suigwang. Penai sahbak eh, rangdi, "David napei, anaide ngaunggia gailo." 28 Pa kilung ga nlüt luge, miakcitme kenade peda gwang. Jisu penai dage rangdi, "Ih aide teilu kebui nnai nlum lani?" Penai pe dage keligai, "Yeo, Rampaubo." 29 Ge pa penai miak deugai eh rangdi, "Nnai nlum kebam nzwa peu nnai da teigai lulo." 30 Nah penai miak mraklu. Ge Jisu penai dage rang mtingsüt eh ranggai, "Aide peu migede de ci helo." 31 Dede penai mpetlu nah aipau ha de cipau cuikui pelane ga rangrwa ladi.

32 Cipau pei kenade tetti zeu ge, ainie, maranglu kemakbe pei herakesiabe ne ngngwa kela gede pe da ngngwa gwang. 33 Herakesiabe de gwa mpetdi ge, pe let kegahbe de maranglu. Maadibe penui macang eh, rangdi, "Madaude Israel ga aikenzwa ngau mereu!" 34 Dede Phariseemedung rangdi, "Herakesiabe kedibe kengkieng gade, pa herakesiadung de gwa mpetla."

35 Jisu namdidung nah renamdung leune ga mie. Pa penui synagoguedung* gade mide ledeu jüja eh hegwangram samliakeyi rangpwa mide lia, nah keteeikenei leu nah rapia leu teingkeibeu. 36 Pa mina maadidung de ngau luge, pa penuide pelung siadi, kedanemene meuründung kekwabe kegah nzwa eh, penui penui lung keherei nah kengha kegahne.✝ 37 Pecai pa ledeukelume dage pa rangdi, "Luhlüt kera kieesüt, dede heta tei kerame au cam. 38 Ciziemne luhlüt mpaube dade kie mzet lulo, iciude pa heta keteime de luhlüt kera langgai beulu kerane."