1 Cipau tingdau ledeukelume Jisu da gwang eh ranggai "Caune tinggim hegwangram gade ditu zieno?" 2 Ge Jisu hename gede pe da quteu gwanglwe penui kakga ge pecu kailu, 3 nah rangdi, "Ih nnui dage rangsiakte gaila, nnui lung nreulwe hename nzwalu kemaktane, nnui madaude tinggim hegwangram ga nlüt gailak. 4 Ciziemne, keheibe de pekatei pecu tei henahpwa hena aipau nade nzwa kelube ne tinggim hegwangram gade ditu zie. 5 Keheibe de hena aikenzwa nade a zi gade ngngwa kelame, acu de ngngwa lula. 6 Dede keheibe de hename acu nlum kelame aidungde hangge de de peu kemau teidi cai, pe ngwang gage keniaktsu kedi keulwe peu jaaidi kecuk gage pecu kegaktset kedibe pe ziemne yiki lie.

7 Ainie mide peu kemau teikelane kideube ziemne! Kemauketei cidungde gwang maisia, dede kemauketei cidungde teugwang kegaime ainie! 8 N ba mede n pi ne ncu peu kemau teidi lacai, cide dangdi delwe keliengi dilu. N ba mede n pi kena punglwe kelungta mijaai gage keliengai kedi swa au rejam eh mede swa eh kering ga nlüt kelube n ziemne yiki. 9 N miak ncu peu kemau teidi lacai, cide letlwe kelien gidi lu. N miak miakna pung eh mijaai gage keliengai kedi swa au miakli eh kering ga nlüt kelube n ziemne yiki.

10 Nnui keceu aidungde hangge de de mneu melu kerane mriak lulo. Kedanemene Ih nnui dage rang gaila, tinggim ga penui tinggimgwame tinggim ga kebam a Pei dwaga bam muila kecune. 11 * [Mina Nabe gah kedime de kelilu zielie gwang kecune.] 12 Nnui dai cetno? Magade mige pe meurün haige bam eh, ket gah dicai, pa riakhekuiehekui de kideutu reudung gade gidi eh mie gah kedina de peeila meni? 13 Magade pa cide peei lucai, Ih nnui dage rangsiakte gaila, gahdi kemak riakhekuiehekui swade pa gah kedi nade peei kelude ziemne pe suiyi kizie. 14 Cide nzwa eh, tinggim kebam nnui Pei de keceu aidungde hangge de peu kapdi kera pesui ma.

15 Magade n sinabe n dage kemau teigai cai, mie delwe nnaikatei kebam dau pe mau ranglia lo. Pa n sam kingnei lucai, nang n sinabe de ngaudai luda. 16 Dede pa n sam kingnei gailak dicai, kedame hangge mede hangnade ncu silu, ciciu eh hangna mede hangcum mui zierang gade sam leune kesanglie lu kerane. 17 Nah pa penui sam kingnei rau dicai, ma cide ngqwa dage ranglo. Pa ngqwabe sam kingnei rau dicai, peu pecu Jewme kemakme nah heraha kehame nzwala dilo. 18 Ih nnui dage rangsiakte gaila, nnui kideu gade ma keheibe ngkui kedibe tinggim gade ngkui dizie; nah nnui kideu gade ma keheibe ngkei kebeube tinggim gade ngkei beuzie. 19 Ih nnui dage rangsiakte dai gaila, nnui kideu ga hangna ma keheibe de penui kelungzwa eh kiecai, tinggim ga kebam a Pei cidungde tei beuzie. 20 A zi gade hangna mede hangcum ngngwa ngkwa kebam ga, Ih de cipaume kakga bamzie."

21 Cipaucai Peter Jisu da gwang delwe rangdi, "Rampaubo, a sinabe a dage pia daikiee ge kemau tei eh Ih pe mau gibeu maisia no? Pia hena zieni?" 22 Ge Jisu pe dage rangdi, "Ih n dade pia hena de rang ma, dede pia riakhena kecu hena kieege lo. 23 Ciziemne, tinggim hegwangram au hegwangme ge pe kilamedung de pe bata riep ranggai lo de kecu nzwa da. 24 Pa cide tei ndeu cuh kecudau, kila hangge pe pau rangkang talent cang kerei* pung kela gede pe da ngngwa gwang. 25 Dede pe pau kap gailak kedine, pe mpaube pecu, pe nau, pe name, nah pegu maleune zwalu delwe pe pau kapdai beu lulo aja kaigai. 26 Cine kilapei koktung mie pe dwaga keumie eh ranggai, ‘A mpaubo, acu kwagai rielo, Ih n pau leune kap daibeu zielie.’ 27 Cine kila mpaube, pecu ngaunggia eh pecu püt peu nah pepau nggah beudi. 28 Dede kila cipaude mpetlwe pe kilame keda hangge pe pau denarii haige* pung kela gede ngaulu. Pa pecu heraklu delwe pecu kekiplu eh ranggai, ‘Nang apau pung kelade kap lulo.’ 29 Ge kilapei, pe zangbe de keukeimie penggia kie eh ranggai, ‘Acu kwagai rielo, Ih n pau kap daibeu zielie.’ 30 Dede kila keraibe de cide tei neu tadi. Meliene, pa mie delwe pecu hebaangki gage kelien gaidi, pau kaplu kemaktane. 31 Ciziemne pe zangme, kila kedamedung cide ngau luge, penui lung sia sütdi. Nah penui gwang delwe penui mpaube dage cipau ha de pelane paubeu. 32 Ge pe mpaupei pecu qulu, delwe pe dage rangdi, ‘Nang kila kesiabo, nang a pau pung kela pelane Ih gikap beu dida, nang a dade n nggia kekiene. 33 Ih ncu ngaunggia kebeu nzwa, nang de kila n zangme de ngaunggia gailak ni?’ 34 Pe mpaupei pe rata eh pepau pelane kaplu kemaktane pecu tei keherei kerame ba gage kaibeudi. 35 Cine tinggim kebam a Pei de aide nzwa nnui dage teigai zie, nnui nnuilung gade nnui siname maudung gibeu mecai."