1 Pecai Jisu de herakesiabe de peu kedei kerane Kemci Rabe ne hetaideu gage ngngwa gaidi. 2 Pa tingba zie riakdai nah tingmuizie riakdai mmwang kelucai, pa mzeudi.✝ 3 Ge kedei kecube gwang eh pe dage rangdi, "Magade Nang Tinggwang Na liecai, tangtsu aidungde de tangku mmi lulo beulo." 4 Dede Jisu pecu keligai eh rangdi, "Kesanglaisiu ga ainzwa rauteula, ‘Mina tangku rünne tyei eh lungh gailak, dede Tinggwang mui gade kepet sam leune gade zie.’"✝ 5 Pecai herakesiabe pecu kemci namdi ga ngngwa gwanglu delwe pecu peu kerecaki hutube ga bamlu,✝ 6 nah pe dage rangdi, "Magade nang Tinggwang Na liecai, nkatei ncu kelien gailo, kedanemene ainzwa raupwala,

‘Pa n ma pielu kerane pe gwame de aja kai beuzie,’✝

nah, ‘Penui penui ba gage ncu teucuh luzie,

ciu eh nang n pi tangtsu ge reu gage de rejam melu kerane.’"✝

7 Jisu pe dage rangdi, "Iciu de ainzwa rau pwala, ‘Nang Rampaube n Tinggwang de kedei so.’"✝ 8 Pecaide, herakesiabe pecu kideutu husüt kecu ga ngngwa nghang nah pecu kideube hegwangram leune, penui kendu leune de si eh keulia. 9 Herakesiabe Jisu dage rangdi, "Ma aidung leune Ih ncu pwa peuzie, nang keumie eh acu recalu cai." 10 Ge Jisu pe dage rangdi, "Aika de tet dilu, Satan! Kedanemene ainzwa rau pwala,

‘Nang Rampaube n Tinggwang de reca zie, nah nang pe gwa rünne teizie.’"✝

11 Ge herakesiabe pecu pütdi, nah ainie, tinggimgwamedung gwang eh pe gwatei di.

12 Cidau John de tui pwa kedi Jisu siu luge, pa Galilee lambie gwangdi. 13 Pa Nazareth de pütti eh Capernaum namdi ga mie lunghdi, cide Galilee Jaaidi tai kemna ge ga, Zebulun penai Naphtali deu ga. 14 Isaiah caihakecibe rang kenzeu de teicanglu kerane aide teigai,

15 "Zebulun deu nah Naphtali deu,

jaaidi lambie, Jordan kahpet,

Gentileme Galilee!

16 Kemui ga kebamme minadung

kebaa kedi ge ngaulu da,

nah ketsai cuikui nah ketsai sung ga bam kelame,

reuga kebaa ge cuh dida."

17 Cipau ting gade Jisu sam ledeu eh, "Nnui lung nreulu, kedanemene Tinggim hegwangram nna bam dida," de eh rang gwang.

18 Jisu Galilee Jaaidi kung ga tet gwang keladau, pa siname hangna, Peter lie qu kelabe Simon, nah pecaihereibe Andrew, jaaidi gade helang sam bam eh ngau, kedanemene penai heka ketuime kecune. 19 Jisu penai dage rangdi, "Gwanglu, acai suilu, nah Ih nnaide mina de ketuime teibeu zie." 20 Ge penai langdung püt zette di delwe pecai suidi. 21 Jisu tetgwang kezeudau cikade, pa siname keda hangna, Zebedee napei James, nah pecaihereibe John de ngaulu. Penai pei Zebedee de ngngwa eh liem ga penui helangdung retak bam. Pa penaide qugai, 22 ge penai liem nah penai peide püt zette di delwe pecai suidi.

23 Pecai Jisu Galilee deu pelane ga rwa gwang eh penui synagoguedung ga mide ledeu, nah hegwangram samliakeyi de ledeu, nah mateei kehei leune nah minadung kakga keteeikeneei leune de teingkeibeu. 24 Pe ha Syria deuceu pelane ga ci gwangdi, nah minadung peda mateei ketsamtsam kebam leune de nah teei eh keherei kebam, nah herakesia ne ngngwateu kelame, nah kehekimme nah kemnoime de ngngwa gwang; nah Jisu penuide teingkeibeu. 25 Maadidung Galilee gade, nah Decapolis*, nah Jerusalem, nah Judea, nah Jordan reuki gwale gade pecai sui ladi.